Eksodho 20 FHB Father's Heart Bible™

20 ¹Na tenepo Baba wathu alonga mafala onsene awa:

²“Ine ndine Baba wanu, ule adakubulusani n'dziko ya Edjipitu, m'nyumba ya ubitcha.

³“Lekani kukhala na milungu inango patsogolo panga.

⁴“Lekani kudzisemera cifanuko, peno cakulandana na cinthu ciri kudzulu, peno pantsi pano, peno m'madzi pantsi pa dziko. ⁵Lekani kuagodamira peno kuatumikira; Ine, Baba wanu, ndine Baba wa bibvu, anabweresa madawo a anyakubala pa ana mpaka ku ubalwa wacitatu na wacinai wa ale anandiwenga, ⁶mbwenye mbapangiza kufuna kwa cibverano kuna pikwi pya ale anandifuna na kukoya matongero anga.

⁷“Lekani kuphatisira dzina ya Baba wanu mwapapezi, thangwi Baba wathu nkhabe kunlekerera munthu anaphatisira dzina yace mwapapezi.

⁸“Kumbukani ntsiku ya Sabudu, toera kuikoya yakucena. ⁹Mu ntsiku zitanthatu munabasa mbamucita mabasa anu onsene, ¹⁰mbwenye ntsiku yacinomwe ndi Sabudu ya Baba wanu. Lekani kucita basa iriyonsene pa ntsiku ineyi—imwe, mwananu wamamuna, mwananu wankazi, ntumiki wanu wamamuna peno wankazi, pifuyo pyanu, peno mlendo ali n'kati mwa misuwo yanu. ¹¹Thangwi mu ntsiku zitanthatu Baba wathu acita kudzulu, dziko, bara, na pyonsene piri mwenemu, buluka penepo apuma pa ntsiku yacinomwe; na tenepo Baba wathu apasa nkhombo ntsiku ya Sabudu mbaikoya yakucena.

¹²“Lemedzani babanu na manu, toera ntsiku zanu zikhale zizinji n'dziko inakupasani Baba wanu.

¹³“Lekani kupha.

¹⁴“Lekani kucita upombo.

¹⁵“Lekani kuba.

¹⁶“Lekani kupereka umboni wauthambi kutsutsana na ndzanu.

¹⁷“Lekani kusirira nyumba ya ndzanu. Lekani kusirira nkazi wa ndzanu, ntumiki wace wamamuna peno wankazi, ng'ombe yace peno buru wace, peno cinthu ciriconsene ca ndzanu.”

¹⁸Mbumba yonsene yaona kutatarika kwa mabingu, kuphanthika kwa njazi, kuliza kwa nyanga, na phiri mbiripita utsi. Pidapiona iwo, atetemera mbalimira kutali.

¹⁹Iwo apanga Mozesi tenepa: “Imwe longani na ife, ife tinabvesera. Mbwenye lekani kutawirisa Baba wathu alonge na ife, nee tinafa.”

²⁰Mozesi apanga mbumba tenepa: “Lekani kugopa; Baba wathu abwera toera kukuyeserani, toera kun'gopa Iye kukhale na imwe, toera mukhonde kudawa.” ²¹Mbumba yapitiriza kulimira kutali, mbwenye Mozesi afendedzera ku cidima cikulu kukhali Baba wathu.

Mozesi Asafendedzera

²²Na tenepo Baba wathu apanga Mozesi tenepa: “Panga Aizarayeli: Imwe mwaona mwekhene kuti Ine ndalonga na imwe kubulukira kudzulu. ²³Lekani kucita milungu ya parata toera ikhale pabodzi na Ine, nee kudzicitira milungu ya ouro. ²⁴Ndicitireni guwa ya dothi, pa iyo muperekere ntsembe zanu zakupisa na ntsembe za ntendere, mabira anu na ng'ombe zanu. Pa mbuto yonsene yakukumbukira dzina yanga, Ine ndinabwera kuna imwe mbandikupasani nkhombo. ²⁵Mungandicitira guwa ya miyala, lekani kuimanga na miyala yakusema, thangwi kuphatisira cida canu pa iyo kusaipswipisa. ²⁶Lekani kukwira pa makwiriro toera kuenda pa guwa yanga, toera maliseka anu akhonde kuoneka pa iyo.”