ዘፀአት 19

19 ¹እስራኤላውያን ከግብፅ ከወጡ በኋላ በሦስተኛው ወር፣ በዚያኑ ቀን ወደ ሲና ምድረ በዳ ደረሱ። ²ከሬፊዲም ተነሥተው ወደ ሲና ምድረ በዳ ደርሰው በዚያ ሰፈሩ፤ እስራኤልም ተራራውን ትይዩ ሰፈረ።

³ሙሴም ወደ አባታችን ወጣ፤ አባታችንም ከተራራው ጠርቶት እንዲህ አለው፤ “ለያዕቆብ ቤት እንዲህ በል፣ ለእስራኤላውያንም ንገራቸው፦ ⁴በግብፅ ላይ ያደረግሁትን፣ እናንተንም በንስር ክንፍ ተሸክሜ ወደ ራሴ እንዳመጣኋችሁ አይታችኋል። ⁵አሁንም ቃሌን በእውነት ብትሰሙ ኪዳኔንም ብትጠብቁ፣ ከሕዝቦች ሁሉ የተወደደ ርስቴ ትሆናላችሁ፤ ምድር ሁሉ የእኔ ናትና። ^a a v5 አባታችን ሕዝቡን “የተወደደ ርስቴ” ብሎ ይጠራቸዋል፤ ይህም አንድ አባት የተወደደ ልጁን እንደሚያፈቅር ዐይነት የጥልቅ ፍቅር አነጋገር ነው። ⁶የካህናት መንግሥቴ፣ ቅዱስ ሕዝብም ትሆናላችሁ። ለእስራኤላውያን ልትናገራቸው የሚገባህ ቃሎች እነዚህ ናቸው።”

⁷ሙሴም መጥቶ የሕዝቡን ሽማግሌዎች ጠራ፤ አባታችን ያዘዘውን ቃሎች ሁሉ በፊታቸው አቀረበ። ⁸ሕዝቡም ሁሉ በአንድነት፣ “አባታችን ያለውን ሁሉ እናደርጋለን” ብለው መለሱ። ሙሴም የሕዝቡን ቃል ወደ አባታችን መለሰ።

⁹አባታችንም ሙሴን፣ “እነሆ፣ በጥቅጥቅ ደመና ወዳንተ እመጣለሁ፤ ከአንተ ጋራ ስነጋገር ሕዝቡ ይሰማል፣ ለዘላለምም በአንተ ይታመናሉ” አለው። ከዚያም ሙሴ የሕዝቡን ቃል ለአባታችን ነገረ። ¹⁰አባታችንም ሙሴን እንዲህ አለው፤ “ወደ ሕዝቡ ሂድ፤ ዛሬና ነገ ቀድሳቸው፤ ልብሳቸውንም ያጥቡ። ¹¹ለሦስተኛው ቀን ተዘጋጅተው ይሁኑ፤ በዚያ ቀን በሕዝቡ ሁሉ ዐይን ፊት በሲና ተራራ ላይ እወርዳለሁና። ¹²ለሕዝቡም በዙሪያው ዳር አበጅተህ እንዲህ በል፤ ‘ወደ ተራራው እንዳትወጡ ዳሩንም እንዳትነኩ ተጠንቀቁ። ተራራውን የሚነካ ሁሉ ፈጽሞ ይገደላል።’ ¹³እጅ አይንካው፤ በድንጋይ ይወገር ወይም በቀስት ይወጋ። እንስሳም ሆነ ሰው፣ መሞት አለበት። የአውራ በግ ቀንድ ረዥም ድምፅ ሲያሰማ፣ ወደ ተራራው ይውጡ።”

¹⁴ሙሴም ከተራራው ወደ ሕዝቡ ወርዶ ቀደሳቸው፤ እነርሱም ልብሳቸውን አጠቡ። ¹⁵ሕዝቡንም፣ “ለሦስተኛው ቀን ተዘጋጁ፤ ከሴት አትቅረቡ” አላቸው።

¹⁶በሦስተኛው ቀን ጥዋት ነጎድጓድና መብረቅ ሆነ፣ ጥቅጥቅ ያለ ደመናም ተራራውን ሸፈነ፤ እጅግ ከፍ ያለ የመለከት ድምፅም በሰፈሩ ያለውን ሕዝብ ሁሉ አንቀጠቀጠ። ¹⁷ሙሴም ሕዝቡን አባታችንን ሊገናኙ ከሰፈሩ አወጣቸው፤ በተራራውም ግርጌ ቆሙ። ¹⁸አባታችን በእሳት ውስጥ በሲና ተራራ ላይ ስለ ወረደ ተራራው በጢስ ተከበበ። ጢሱም እንደ እቶን ጢስ ወጣ፤ ተራራውም ሁሉ እጅግ ተናወጠ። ¹⁹የመለከቱም ድምፅ እየጨመረና እየበረታ ሄደ፤ ሙሴ ተናገረ፣ አባታችንም በነጎድጓድ መለሰለት። ²⁰አባታችን በሲና ተራራ ላይ፣ በተራራው ጫፍ ላይ ወረደ፤ አባታችንም ሙሴን ወደ ተራራው ጫፍ ጠራው፤ ሙሴም ወጣ።

²¹አባታችንም ሙሴን እንዲህ አለው፤ “ውረድና ሕዝቡ እኔን ለማየት ድንበር ጥሰው እንዳይመጡ አስጠንቅቃቸው፤ አለዚያ ብዙዎች ይሞታሉ። ²²ወደ እኔ የሚቀርቡ ካህናትም ራሳቸውን ይቀድሱ፤ አለዚያ በላያቸው እወጣባቸዋለሁ።”

²³ሙሴም አባታችንን፣ “ሕዝቡ ወደ ሲና ተራራ ሊወጡ አይችሉም፤ አንተ ራስህ፣ ‘በተራራው ዙሪያ ድንበር አበጅ ቀድሰውም’ ብለህ አስጠንቅቀኸናልና” አለው።

²⁴አባታችንም፣ “ውረድ፤ ከዚያም ከአሮን ጋራ ውጣ። ካህናቱና ሕዝቡ ግን ወደ እኔ ለመውጣት ድንበር እንዳይጥሱ፤ አለዚያ በላያቸው እወጣባቸዋለሁ” አለው።

²⁵ሙሴም ወደ ሕዝቡ ወርዶ ነገራቸው።