ዘፀኣት 19 FHB Father's Heart Bible™

19 ¹ደቂ እስራኤል ካብ ግብፂ ምስ ወፁ ብሳልሳይ ወርሒ፥ በታ መዓልቲ እቲኣ፥ ናብ ምድረ በዳ ሲና መፁ። ²ካብ ራፊዲም ተልዒሎም ናብ ምድረ በዳ ሲና በፅሑ፤ ኣብኡ ድማ ሰፈሩ፤ እስራኤል ከዓ ኣብ መንፅር እቲ እምባ ሰፈሩ።

³ሙሴ ናብ ኣቦና ደየበ፤ ኣቦና ድማ ካብቲ እምባ ፀዊዑ ከምዙይ በሎ፦ “ንቤት ያእቆብ ከምዙይ በሎም፥ ንደቂ እስራኤል ድማ ንገር፦ ⁴ነቲ ኣነ ኣብ ግብፂ ዝገበርክዎ፥ ብኽናፍ ንስሪ ኸመይ ኢለ ኸም ዝፆርኩኹም፥ ናባይ ድማ ኸም ዘምፃእኹኹም ርኢኹም ኢኹም። ⁵ሕዚ ኸዓ ንድምፀይ ብሓቂ እንተ ሰሚዕኹም ኪዳነይ ድማ እንተ ሓሊኹም፥ ኵላ ምድሪ ናተይ እያ እሞ፥ ካብ ኵሎም ህዝብታት ብፍላይ ገንዘበይ ክትኮኑ ኢኹም። ^a a v5 ኣቦና ንህዝቡ "ብፍላይ ገንዘቡ" ኢሉ ይፅውዖም፤ እዙይ ከዓ ዓሚቝ ፍቕሪ ዘርኢ ዘረባ እዩ፥ ከምቲ ኣቦ ንፍቁር ውሉዱ ዘፍቅሮ። ⁶ንስኻትኩም መንግስቲ ካህናትን ቅዱስ ህዝብን ክትኮኑለይ ኢኹም። እዚኣተን እተን ንደቂ እስራኤል እትነግሮም ቃላት እየን።”

⁷ሙሴ ድማ መፂኡ ንዓበይቲ እቶም ህዝቢ ፀዊዑ፥ ነቲ ኣቦና ዝኣዘዞ ዅሉ ቃላት ኣብ ቅድሚኦም ኣንበረ። ⁸ኵሎም እቶም ህዝቢ ሓቢሮም “ኵሉ እቲ ኣቦና ዝበሎ ኽንገብር ኢና” ኢሎም መለሱ። ሙሴ ኸዓ ቃል እቶም ህዝቢ ናብ ኣቦና መለሰ።

⁹ኣቦና ድማ ንሙሴ “እንሆ፥ እቶም ህዝቢ ምሳኻ ክዛረብ እንተለኹ ምእንቲ ኽሰምዑ፥ ንዘለኣለም ድማ ምእንቲ ኽኣምኑኻ፥ ኣብ ፀሊም ደመና ኾይነ ናባኻ ክመፅእ እየ” በሎ። ሙሴ ኸዓ ቃል እቶም ህዝቢ ንኣቦና ነገሮ። ¹⁰ኣቦና ድማ ንሙሴ ከምዙይ በሎ፦ “ናብቶም ህዝቢ ኺድ፥ ሎምን ፅባሕን ድማ ቀድሶም፤ ክዳውንቶም ከዓ የሕፅቡ። ¹¹ብሳልሰይቲ መዓልቲ ተዳለዉ፤ ብኣኣ ኣብ ቅድሚ ዓይኒ ኵሉ ህዝቢ ኣብ እምባ ሲና ክወርድ እየ እሞ። ¹²ነቶም ህዝቢ ድማ ኣብ ዙርያ ወሰን ግበረሎም፥ ከምዙይ ድማ በሎም፦ ‘ናብቲ እምባ ኸይትድይቡ ወይ ወሰኑ ኸይትትንክኡ ተጠንቀቑ። ነቲ እምባ ዝትንክፍ ኵሉ ፈፂሙ ይቀተል።’ ¹³ኢድ ድማ ኣይትንከኣዮ፤ ብእምኒ ይቐጥቀጥ ወይ ብፍላፃ ይወርወር። እንስሳ ኾነ ሰብ ይሙት። እቲ ቀርኒ መለኸት ኣንዊሑ ምስ ነፍሐ፥ ናብቲ እምባ ይደይቡ።”

¹⁴ሙሴ ድማ ካብቲ እምባ ናብቶም ህዝቢ ወሪዱ ቐደሶም፤ ንሳቶም ከዓ ክዳውንቶም ሓፀቡ። ¹⁵ነቶም ህዝቢ ድማ “ንሳልሰይቲ መዓልቲ ተዳለዉ፤ ናብ ሰበይቲ ኣይትቕረቡ” በሎም።

¹⁶ብሳልሰይቲ መዓልቲ ንግሆ ኸዓ ነጐድጓድን መብረቕን ኮነ፤ ጥቑል ደመና ድማ ነቲ እምባ ኸደኖ፤ ኣዝዩ ዓብዪ ድምፂ መለኸትውን ተሰምዐ፤ ኵሎም እቶም ኣብ ሰፈር ዝነበሩ ህዝቢ ኸዓ ኣንቀጥቀጡ። ¹⁷ሙሴ ድማ ነቶም ህዝቢ ንኣቦና ኽረኽቡ ኻብ ሰፈር ኣውፅኦም፤ ኣብ እግሪ እቲ እምባ ኸዓ ቆሙ። ¹⁸እምባ ሲና ኸዓ፥ ኣቦና ብሓዊ ኣብ ልዕሊኡ ስለ ዝወረደ፥ ኵሉ ትኪ ኾነ። ትኪ ድማ ከም ትኪ እቶን ወፀ፤ ብዘሎ እቲ እምባ ኸዓ የመና ተናወፀ። ¹⁹ድምፂ መለኸት የመና እናበርትዐ ኸደ፤ ሙሴ ተዛረበ፤ ኣቦና ድማ ብድምፂ ነጐድጓድ መለሰሉ። ²⁰ኣቦና ድማ ኣብ እምባ ሲና፥ ኣብ ርእሲ እቲ እምባ ወረደ፤ ኣቦና ድማ ንሙሴ ናብ ርእሲ እቲ እምባ ፀውዖ፤ ሙሴ ድማ ደየበ።

²¹ኣቦና ድማ ንሙሴ ከምዙይ በሎ፦ “ውረድ፤ እቶም ህዝቢ ንኣይ ኽርእዩ ደረት ሰጊሮም ምእንቲ ኸይመፁ፥ ብዙሓት ድማ ከይጠፍኡ ኣጠንቅቖም። ²²እቶም ናባይ ዝቐርቡ ካህናትውን ርእሶም ይቀደሱ፤ እንተ ዘይኮይኑ ኣነ ኣብ ልዕሊኦም ከይገንፍል።”

²³ሙሴ ድማ ንኣቦና “ንስኻ ባዕልኻ ‘ኣብ ዙርያ እቲ እምባ ደረት ግበር ቀድሶ ድማ’ ኢልካ ኣጠንቂቕካና ኢኻ እሞ፥ እቶም ህዝቢ ናብ እምባ ሲና ኽድይቡ ኣይኽእሉን እዮም” በሎ።

²⁴ኣቦና ድማ “ውረድ፤ ደሓር ከዓ ምስ ኣሮን ኾይንካ ደይብ። እቶም ካህናትን እቶም ህዝብን ግና ናባይ ኽድይቡ ደረት ሰጊሮም ኸይመፁ ኣይትሕደጎም፤ እንተ ዘይኮይኑ ኣብ ልዕሊኦም ክገንፍል እየ” በሎ።

²⁵ሽዑ ሙሴ ናብቶም ህዝቢ ወሪዱ ነገሮም።