Jethro amar Pitri laga pahar te ahhise

Jethro pora Moses laga maiki aru chokra khan ke wapas loi ahe, amar Pitri ki-ki korise etu sob hune, aru aradhana kore. Tar pichete tai Moses ekla-ekla rati-puwa pora sanjh tak bichar kori thaka dikhe, aru sapha koi: eitu bhal nohoi, tumi thaki jabo. Hunar thaka, hosa manuh khan ke hazar, eksho, pochas aru dos manuh khan uporte basi dii.

Adhyay 18.

Midian laga purohit, Moses laga sasur, Jethro pora amar Pitri Moses aru Tar manuh khan Israel karne ki ki korise, aru Israel ke Egypt pora bahar ulai anise, eitu sob hunise. Etiya, Moses pora tai ke ghor te pathai diya piche, Moses laga sasur Jethro pora Moses laga maiki Zipporah ke loi loise, tai laga duita chokra logot te—ekjon laga nam Gershom thakise, kilemane Moses koise, “Moi dusra desh te ekjon bideshi thakise,” dusra laga nam Eliezer thakise, kilemane tai koise, “moi laga baba laga Isor pora moi ke modot korise, aru Pharaoh laga tarwar pora moi ke bachai loise.” ^a Moses laga sasur Jethro pora Moses laga chokra khan aru maiki ke loi kene, tai jongol te thaka jagah, amar Pitri laga pahar te, tar logot ahhise. Tai pora Moses ke koise, “Moi, tumar sasur Jethro, tumar maiki aru tai laga duita chokra ke loi kene ahhi ase.”

Moses tar sasur ke lok koribole bahar ulaise, matha jhukai kene, aru tar ke chuma dise. Tarkhan ekjon-ekjon ke salam korise aru ekjon-ekjon laga bhal-biya hudise, titia tombu bhitor te jaise. Moses pora tar sasur ke, amar Pitri pora Israel karne Pharaoh aru Egypt ke ki ki korise, rasta te tarkhan ke aha sob dukh, aru Tai pora tarkhan ke kineka bachai loise, eitu sob koise. amar Pitri pora Israel karne kora sob bhal kaam karne, aru tarkhan ke Egypt laga hath pora bachai diya karne, Jethro khushi hoise. Jethro koise, Dhonyo ase amar Pitri, kun pora tumikhan ke Egypt laga hath aru Pharaoh laga hath pora bachai loise, kun pora manuh khan ke Egypt laga hath nichete pora bachai loise. Etiya moi jani loise amar Pitri sob debta khan pora dangor ase, kilemane tarkhan ki te phutani korise, etu te Tai pora tarkhan ke jiti loise. Moses laga sasur Jethro pora amar Pitri karne ekta jolai diya boli aru bolidan khan anise; aru Aaron aru Israel laga sob bura manuh khan amar Pitri laga usor te Moses laga sasur logot roti khabole ahhise.

Dusra din te Moses manuh khan ke bisar koribole bohise, aru manuh khan phojur pora saam tak tar chari-fale khara thakise. Tar sasur pora manuh khan karne tai ki ki korise eitu sob dikhise, titia tai koise, “Tumi ki kori ase? Kile tumi ekla bohi ase, aru sob manuh phojur pora saam tak tumar chari-fale khara ase?”

Moses pora tar sasur ke koise, “Kilemane manuh khan amar Pitri ke bisaribole moi logot ahhe; jitia tarkhan jhagara kore, tarkhan moi logot ahhe; moi ekjon aru tar ghor-manuh majot bisar kore, aru amar Pitri laga niyom aru hukum khan bujhai dise.” Moses laga sasur pora tar ke koise, “Tumi ki kori ase eitu bhal nohoi. Tumi aru eitu manuh khan thaki jabo—eitu kaam tumar karne bisi bhari ase; tumi ekla eitu koribo napare. Etiya moi laga kotha huni bi: moi tumi ke upodesh dibo—amar Pitri tumar logot thakibi. Tumi manuh khan karne Tar age te khara hoi jabi aru tarkhan laga kotha khan Tar logot loi anibi. Tarkhan ke niyom aru hukum khan sikhai dibi, aru kun rasta te berabole aru ki kaam koribole, eitu dikhai dibi. Sob manuh khan majot pora, amar Pitri ke bhoi kora, hosa thaka aru biya labh ghin kora, eneka khyomota thaka manuh khan ke basi lobi; aru tarkhan ke hajar laga, soh laga, pachas laga, aru dosh laga mukhiya kori kene rakhibi. Tarkhan ke hodai somoi te manuh khan ke bisar koribole dibi, aru dangor kotha sob tumar logot loi anibo kintu chutu kotha sob tarkhan nijor pora faisla koribo—tumar logot eitu bhar bukhi kene tumar bhar halka kori dibo. Jodi tumi eitu kore aru amar Pitri pora tumi ke hukum dise, titia tumi sojor koribo pare, aru eitu sob manuh khan shanti pora tarkhan laga jagah te jabo.”

Titia Moses pora tar sasur laga kotha hunise aru tai ki koise eitu sob korise. Moses pora sob Israel majot pora khyomota thaka manuh khan ke basi loise aru tarkhan ke manuh khan uporte mukhiya kori dise—hajar laga, soh laga, pachas laga, aru dosh laga mukhiya khan. Tarkhan hodai somoi te manuh khan ke bisar korise, aru digdar kotha khan Moses logot anise kintu chutu kotha khan tarkhan nijor pora bisar korise. Titia Moses pora tar sasur ke tar rasta te pathai dise, aru tai nijor desh te wapas jaise.