Ekta Bhasa, Ekta Manuh Jati

Ekta bhasa, ekta plan: ekta dangor ghor aru ekta nam, manuh khan titili jabole nalage karne. Amar Pitri nami ahise, tarkhan laga bhasa mishai dise, aru tinu bhi tarkhan ke titili dise. Titia ei adhyay Terah laga ghor-manuh khan Ur pora ulai juwa phale chuti hoi jai, aru Sarai pora bacha jonom dibole napare.

Adhyay 11.

Etiya pura prithibi te ekta bhasa aru eke kotha he thakise. Aru tarkhan purab phale jai thaka homoi te, Shinar desh te ekta samatol jaga pai kene ta te thaki jaise. Tarkhan ekjon-ekjon ke koise, “Ahhibi, ami ita bonai kene bhal pora puribo.” Tarkhan pathor laga bodli te ita, aru chuna laga bodli te tar cholaise. Tetiya tarkhan koise, “Ahhibi, ami nijor karne ekta sheher aru akas tak laga chuti thaka ekta uncha ghor bonabo, aru ami nijor karne ekta nam bonabo, titia ami pura prithibi laga uporte titili najabo.”

Kintu manuh khan bonai thaka hei sheher aru uncha ghor tu sabole amar Pitri namikene ahhise. ^a

Aru amar Pitri koise, “Sabi, tarkhan ekta bhasa thaka ekta manuh jati ase, aru tarkhan ki koribo etu laga shuru he ase. Etiya tarkhan ki koribole bhabe, etu tarkhan pora na-koribole eku bhi nathakibo. Ahhibi, ami ta te nami kene tarkhan laga bhasa ke mishai dibo, titia kun manuh bhi tar usor manuh laga bhasa bujhi napabo.”

Titia amar Pitri pora tarkhan ke ta te pora pura prithibi laga uporte titili dise, aru tarkhan sheher bonai thaka rukhi dise. Etu karne etu laga nam Babel rakhise, kilemane ta te amar Pitri pora pura prithibi laga bhasa ke mishai dise, aru ta te pora tarkhan ke pura prithibi laga uporte titili dise. ^b

Shem laga Bongsho

Eitu Shem laga bongsho laga kotha ase: ban-pani huwa dui saal pichete, tar eksoh saal umur te tar pora Arpachshad jonom hoise. Arpachshad ke jonom diya pichete Shem pansoh saal jivit thakise, aru tar dusra chokra aru chukri khan bhi hoise.

Arpachshad tintis saal jiya homoi te, tai Shelah ke jonom dise. Shelah ke jonom diya pichete Arpachshad charsoh tin saal jivit thakise, aru tar dusra chokra aru chukri khan bhi hoise.

Shelah tis saal jiya homoi te, tai Eber ke jonom dise. Eber ke jonom diya pichete Shelah charsoh tin saal jivit thakise, aru tar dusra chokra aru chukri khan bhi hoise.

Eber chowtis saal jiya homoi te, tai Peleg ke jonom dise. Peleg ke jonom diya pichete Eber charsoh tis saal jivit thakise, aru tar dusra chokra aru chukri khan bhi hoise.

Peleg tis saal jiya homoi te, tai Reu ke jonom dise. Reu ke jonom diya pichete Peleg duisoh nou saal jivit thakise, aru tar dusra chokra aru chukri khan bhi hoise.

Reu battis saal jiya homoi te, tai Serug ke jonom dise. Serug ke jonom diya pichete Reu duisoh sat saal jivit thakise, aru tar dusra chokra aru chukri khan bhi hoise.

Serug tis saal jiya homoi te, tai Nahor ke jonom dise. Nahor ke jonom diya pichete Serug duisoh saal jivit thakise, aru tar dusra chokra aru chukri khan bhi hoise.

Nahor untis saal jiya homoi te, tai Terah ke jonom dise. Terah ke jonom diya pichete Nahor eksoh unnis saal jivit thakise, aru tar dusra chokra aru chukri khan bhi hoise.

Terah sottor saal jiya homoi te, tai Abram, Nahor aru Haran ke jonom dise.

Terah laga Poribar

Etiya eitu Terah laga bongsho khan ase. Terah pora Abram, Nahor aru Haran ke jonom dise; aru Haran pora Lot ke jonom dise. Haran tar laga baba Terah jivit thaka homoi te, tar jonom huwa jaga Chaldea khan laga Ur te mori jaise. Abram aru Nahor shadi korise; Abram laga maiki tu Sarai thakise, aru Nahor laga maiki tu Milcah thakise, jun Haran laga chukri thakise, aru Haran he Iscah laga baba bhi thakise. Etiya Sarai bacha nohuwa maiki thakise; tar eku bacha nathakise. Terah pora tar chokra Abram ke, aru Haran laga chokra tar nati Lot ke, aru tar buari Sarai, Abram laga maiki ke loi kene, Canaan te jabole Chaldea khan laga Ur pora ulai jaise; tarkhan Haran te ponchi kene ta te thaki jaise. Terah duisoh pans saal jivit thakise, aru Haran te mori jaise.