ജ്ഞാനത്തെ മുറുകെ പിടിക്കുക

തന്റെ ജാലകത്തിലൂടെ നോക്കിനിന്ന ഒരു അപ്പൻ താൻ കണ്ടത് പറയുന്നു. ബുദ്ധിയില്ലാത്ത ഒരു യുവാവ് സന്ധ്യാസമയത്ത് ഒരു പ്രത്യേക വീടിനു നേരെ നടക്കുന്നു; തന്റെ പദ്ധതികൾ ഒരുക്കിവെച്ചവളും ഭർത്താവ് വീട്ടിലില്ലെന്ന് അറിയുന്നവളുമായ ഒരു സ്ത്രീ അവനെ എതിരേൽക്കുന്നു. അറുക്കാൻ കൊണ്ടുപോകുന്ന കാളയെപ്പോലെ അവൻ പിന്നാലെ പോകുന്നു.

അധ്യായം 7.

മകനേ, എന്റെ വാക്കുകൾ പാലിക്കുക; എന്റെ കല്പനകൾ നിന്റെ ഉള്ളിൽ സംഭരിച്ചുവയ്ക്കുക.

എന്റെ കല്പനകൾ പാലിച്ച് ജീവിക്കുക; എന്റെ ഉപദേശം നിന്റെ കണ്മണിപോലെ കാത്തുസൂക്ഷിക്കുക. അവയെ നിന്റെ വിരലുകളിൽ കെട്ടുക; നിന്റെ ഹൃദയഫലകത്തിൽ അവ എഴുതുക.

ജ്ഞാനത്തോട്, “നീ എന്റെ സഹോദരി” എന്ന് പറയുക; വിവേകത്തെ നിന്റെ ഉറ്റ സ്നേഹിത എന്ന് വിളിക്കുക, വിലക്കപ്പെട്ട സ്ത്രീയിൽനിന്നും മധുരവാക്കുകൾ പറയുന്ന അന്യസ്ത്രീയിൽനിന്നും നിന്നെ കാക്കേണ്ടതിന്.

ഞാൻ എന്റെ വീടിന്റെ ജാലകത്തിൽനിന്ന് കിളിവാതിലിലൂടെ താഴേക്കു നോക്കിയപ്പോൾ, ബുദ്ധിഹീനരുടെ ഇടയിൽ ഞാൻ കണ്ടു, യുവാക്കളുടെ ഇടയിൽ ഞാൻ ശ്രദ്ധിച്ചു, വിവേകമില്ലാത്ത ഒരു യുവാവിനെ, അവളുടെ മൂലയ്ക്കരികെ തെരുവിലൂടെ കടന്നുപോയി, അവളുടെ വീട്ടിലേക്കുള്ള വഴി പിടിച്ചു, സന്ധ്യാനേരത്ത്, പകൽ മങ്ങുമ്പോൾ, രാത്രിയുടെ ഇരുട്ടിലും അന്ധകാരത്തിലും.

അപ്പോൾ ഒരു സ്ത്രീ അവനെ എതിരേൽക്കാൻ വന്നു, വേശ്യയെപ്പോലെ വസ്ത്രം ധരിച്ച്, ഹൃദയത്തിൽ കൗശലവുമായി. അവൾ ഒച്ചയിടുന്നവളും ധിക്കാരിയുമാണ്; അവളുടെ കാലുകൾ വീട്ടിൽ അടങ്ങിയിരിക്കുകയില്ല. ഇപ്പോൾ തെരുവിൽ, ഇപ്പോൾ ചത്വരങ്ങളിൽ, ഓരോ മൂലയിലും അവൾ പതിയിരിക്കുന്നു. അവൾ അവനെ പിടിച്ച് ചുംബിച്ചു, നിർല്ലജ്ജമായ മുഖത്തോടെ അവനോട് പറഞ്ഞു:

“സമാധാനയാഗങ്ങൾ അർപ്പിക്കാൻ എനിക്കുണ്ടായിരുന്നു; ഇന്ന് ഞാൻ എന്റെ നേർച്ചകൾ നിറവേറ്റി. ^a അതുകൊണ്ട് നിന്നെ എതിരേൽക്കാൻ ഞാൻ പുറത്തുവന്നു, നിന്നെ ആകാംക്ഷയോടെ അന്വേഷിച്ചു, നിന്നെ കണ്ടെത്തുകയും ചെയ്തു. ഞാൻ എന്റെ കിടക്ക വിരിപ്പുകൾകൊണ്ടും ഈജിപ്തിലെ വർണ്ണച്ചണവസ്ത്രങ്ങൾകൊണ്ടും വിരിച്ചിരിക്കുന്നു. ഞാൻ എന്റെ കിടക്ക മീറയും അകിലും കറുവാപ്പട്ടയുംകൊണ്ട് സുഗന്ധമാക്കിയിരിക്കുന്നു. വരൂ, പ്രഭാതംവരെ നമുക്ക് പ്രേമം നിറയെ നുകരാം; പ്രേമത്തിൽ നമുക്ക് ലയിച്ചുചേരാം. എന്റെ ഭർത്താവ് വീട്ടിലില്ല; അദ്ദേഹം ദൂരയാത്ര പോയിരിക്കുന്നു. അദ്ദേഹം ഒരു സഞ്ചി പണം കൂടെ എടുത്തുകൊണ്ടുപോയി, പൗർണമിവരെ വീട്ടിൽ മടങ്ങിവരികയില്ല.”

തന്റെ സകല വശീകരണവാക്കുകൾകൊണ്ടും അവൾ അവനെ വശത്താക്കി; മധുരമായ അധരങ്ങൾകൊണ്ട് അവനെ വശീകരിച്ചു. പെട്ടെന്നുതന്നെ അവൻ അവളുടെ പിന്നാലെ ചെന്നു, അറുക്കാൻ പോകുന്ന കാളയെപ്പോലെ, കെണിയിലേക്കു കാലെടുത്തുവയ്ക്കുന്ന മാനിനെപ്പോലെ, ഒരു അമ്പ് അതിന്റെ കരൾ തുളയ്ക്കുന്നതുവരെ; കെണിയിലേക്കു കുതിച്ചുചെല്ലുന്ന പക്ഷിയെപ്പോലെ, അത് തന്റെ ജീവൻ അപഹരിക്കുമെന്ന് അവൻ അറിയുന്നില്ല.

ആകയാൽ, മക്കളേ, എന്നെ ശ്രദ്ധിക്കുവിൻ, ഞാൻ പറയുന്ന വാക്കുകൾ ശ്രദ്ധയോടെ കേൾക്കുവിൻ. നിന്റെ ഹൃദയം അവളുടെ വഴികളിലേക്കു വ്യതിചലിക്കരുത്; അവളുടെ പാതകളിൽ ഉഴന്നുനടക്കരുത്. അവൾ അനേകം ഇരകളെ വീഴ്ത്തിയിരിക്കുന്നു; അവൾ കൊന്നൊടുക്കിയവർ ഒരു വലിയ കൂട്ടമാണ്. അവളുടെ വീട് ശവക്കുഴിയിലേക്കുള്ള വഴിയാണ്, മരണത്തിന്റെ അറകളിലേക്കു ഇറങ്ങിച്ചെല്ലുന്നു.