Ka Riƙe Hikima da Ƙarfi

Wani uba yana kallo daga tagarsa ya ba da labarin abin da ya gani. Wani saurayi marar hankali yana tafiya zuwa wani gida da magariba, sai wata mace ta tarye shi, wadda ta riga ta shirya makircinta, ta kuma san mijinta ba ya nan. Ya bi ta kamar sa da ake kai wa yanka.

Babi na 7.

Ɗana, ka kiyaye kalmomina, ka kuma ajiye umarnaina a cikinka.

Ka kiyaye umarnaina ka kuma rayu; ka tsare koyarwata kamar ƙwayar idonka. Ka ɗaura su a yatsotsinka; ka rubuta su a allon zuciyarka.

Ka ce wa hikima, “Ke 'yar'uwata ce,” ka kuma kira fahimta ƙawarka ta ƙut-da-ƙut, domin su kiyaye ka daga mace haramtacciya, daga baƙuwa mai zaƙin baki.

Gama a tagar gidana na leƙa ƙasa ta ragar taga, na kuma ga a cikin marasa azanci, na lura a cikin samari, wani saurayi marar hankali, yana wucewa ta titi kusa da kusurwarta, yana bin hanya zuwa gidanta, da yamma, sa'ad da rana ta faɗi, cikin duhun dare mai kauri.

Sai ga wata mace ta fito ta tarye shi, saye da tufafi kamar na karuwa, da makirci a zuciyarta. Ita mai surutu ce da taurin kai; ƙafafunta ba sa zama a gida. Wani lokaci a titi, wani lokaci a dandali, tana fako a kowace kusurwa. Ta kama shi ta sumbace shi, da fuska marar kunya ta ce masa,

“Ina da hadayun salama da zan kawo; yau na biya alkawurana. ^a Saboda haka na fito in tarye ka, in neme ka da marmari, kuma na same ka. Na shimfiɗa gadona da mayafai, da lilin mai launuka daga Masar. Na sa wa gadona turare na mur, da al'ul, da kirfa. Zo, mu ƙoshi da ƙauna har safiya; mu nutse cikin soyayya. Gama mijina ba ya gida; ya tafi tafiya mai nisa. Ya ɗauki jakar kuɗi tare da shi, ba zai dawo gida ba sai cikar wata.”

Da dukan kalmominta masu rarrashi ta jujjuya shi; da leɓunanta masu zaƙi ta ja shi. Nan da nan sai ya bi ta, kamar bijimin da ake kai wa mayanka, kamar barewar da ke taka tarko, har sai kibiya ta soki hantarsa; kamar tsuntsun da ke ruga cikin tarko, bai san cewa zai rasa ransa ba.

To yanzu, 'ya'yana, ku saurare ni, ku kuma kula da abin da nake faɗa. Kada zuciyarka ta karkata zuwa hanyoyinta; kada ka bauɗe cikin turbobinta. Gama ta jefar da mutane da yawa; waɗanda ta kashe kuwa taro ne mai yawan gaske. Gidanta hanya ce zuwa kabari, mai gangarawa zuwa ɗakunan mutuwa.