Jidesie Amamihe Ike

Nna na-ele anya site na windo ya na-akọ ihe ọ hụrụ. Nwokorobịa na-enweghị uche na-aga nʼụlọ otu onye mgbe chi na-ejiwanye, nwanyị ahụ nke kpara nkata ya ma mara na di ya anọghị nʼụlọ zutere ya. Ọ na-eso ya dịka ehi a na-aga igbu.

Isi 7.

Nwa m, debe okwu m, chekwaakwa iwu m nʼime gị.

Debe iwu m ka ị dị ndụ; chee ozizi m nche dịka mkpụrụ anya gị. Kee ha na mkpịsịaka gị; dee ha nʼelu obi gị.

Gwa amamihe sị, “Ị bụ nwanne m nwanyị,” kpọọkwa nghọta ezi enyi gị, ka ha chebe gị site nʼaka nwanyị akwadoghị, site nʼaka nwanyị ọbịa ahụ ji okwu dị nro.

Nʼihi na site na windo ụlọ m, esi m nʼoghere mkpuchi ya lee ala anya, ahụrụ m nʼetiti ndị amamaghị ihe, achọpụtara m nʼetiti ụmụ okorobịa, otu nwa okorobịa nke uche kọrọ, ọ na-agafe nʼokporo ụzọ nke dị nso na nkuku ya, na-eso ụzọ na-aga nʼụlọ ya, nʼoge uhuruchi, mgbe ụbọchị na-agwụ, nʼọchịchịrị abalị na nʼime oke ọchịchịrị.

Ma lee, otu nwanyị pụtara izute ya, nke yi uwe dịka akwụna, jiri aghụghọ nʼobi ya. Ọ na-eme mkpọtụ ma na-enupụ isi; ụkwụ ya adịghị anọgide nʼụlọ. Ugbu a ọ nọ nʼokporo ụzọ, ugbu a ọ nọ nʼámá, ọ na-eche nzuzo na nkuku ọ bụla. Ọ jidere ya, susuo ya ọnụ, jiri ihu ike gwa ya okwu sị:

“Enwere m àjà udo m ga-achụ; taa emezuola m nkwa m. ^a Ya mere m ji pụta izute gị, ịchọsi gị ike, achọtalakwa m gị. Agbasaala m ihe mkpuchi nʼelu ihe ndina m, jirikwa ákwà agba agba nke si Ijipt. Efesaala m mmanụ isi ụtọ nʼelu ihe ndina m, ya bụ máá, aloos, na sinamọn. Bịa, ka anyị ṅụjuo afọ nʼịhụnanya ruo ụtụtụ; ka anyị tụfuo onwe anyị nʼịhụnanya. Nʼihi na di m anọghị nʼụlọ; ọ gaala njem dị anya. O weere akpa ego ya, ọ gaghịkwa alọta ruo mgbe ọnwa ga-adị nʼuju.”

O ji okwu ya niile na-arafu arafu mee ka o kwenye; o jirikwa egbugbere ọnụ ya dị nro dọta ya. Na mberede, ọ gbasoro ya, dịka ehi na-aga ebe a ga-egbu ya, dịka mgbada na-aba nʼọnya, ruo mgbe àkụ ga-amapu imeju ya; dịka nnụnụ na-efeba ngwa ngwa nʼọnya, ọ maghị na nke a ga-efu ya ndụ ya.

Ya mere ugbu a, ụmụ m, geenụ m ntị, ṅaakwanụ ntị nʼokwu m na-ekwu. Ekwela ka obi gị chigharịa gaa nʼụzọ ya niile; akpafukwala banye nʼokporo ụzọ ya. Nʼihi na o gbudaala ọtụtụ mmadụ; ndị o gburu bụ igwe dị ukwuu. Ụlọ ya bụ okporo ụzọ nke na-eduba nʼili, nke na-arịda ruo nʼọnụ ụlọ ọnwụ.