Phatirira Udziwi Papafupi
Baba anaona pa djanela yace asafotokoza pidaona iye. Mphale wakusaya nzeru asaenda kunyumba ibodzi madzulo, mbagumanika na nkazi adakonzeka kale, anadziwa kuti mamunace kulibe. Iye asantowera ninga ng'ombe inaenda kukaphiwa.
7 1Mwananga, koya mafala anga, mbubvungaza matongero anga n'kati mwako.
2Koya matongero anga toera ukhale na umaso; koya cipfundziso canga ninga mboni ya diso yako. 3Amange pa minwe yako; alembe mu ntima mwako.
4Panga udziwi kuti: “Iwe ndiwe mulongo wanga,” mbucemera kubvesesa ninga xamwali wako wapantima, 5toera akutsidzikize kuna nkazi wakukhondeswa, kuna nkazi wacilendo ule ana mafala akunyengerera.
6Thangwi pa janela ya nyumba yanga, ndayang'ana pantsi mukupita pa mariddi anga, 7mbandiona pakati pa anthu akupusa, ndadzindikira pakati pa aphale, m'phale wakusowa nzeru, 8mbapita munjira cifupi na ngodya yace, mbakwata njira yakuenda kunyumba kwace, 9pa n'dzidzi wa madzulo, mukhamala ntsiku, mu cidima ca masiku na n'thunthu.
10Na penepo, nkazi abwera toera kudzan'gumana naye, akubvala ninga nkazi wa ulukwali, na manyengo mu ntima mwace. 11Iye ndi waphokoso na wakuuma nsolo; miyendo yace nkhabe kukhala panyumba. 12N'dzidzi unango munjira, n'dzidzi unango m'mabwalo, iye asabisala pa ngodya zonsene. 13Iye an'phata mbampsompsona, na nkhope yakukhonda manyadzo ampanga tenepa:
14“Ndikhali na ntsembe za ntendere toera kupereka; lero ndalipa mapiciro anga. a a v14 Ntsembe ya ntendere ikhagawirwa ninga phwando — iye asafuna kulonga kuti ana cakudya cakukhunganyika na thangwi yakusekerera panyumba. 15Na tenepo ndabuluka toera kudzakugumana, toera kukusaka mwaphinga, mbandikugumana. 16Ndayala kama yanga na nguwo zakufukira, na machira a mikhundu akubuluka ku Edjitu. 17Ndathira pa kama yanga cakununkhira ca mura, aloe na kanela. 18Bwera, timwe kufuna mwakukwana mpaka namacibese; tisangalale mu kufuna. 19Thangwi mamunanga nkhabe panyumba; iye aenda ulendo wakulapha. 20Iye akwata nthumbo wa kobiri, mbaenda naye, nkhabe kubwerera panyumba mpaka pa mwezi wakukwana.”
21Na mafala ace onsene akunyengerera, iye an'thimbirusa; na milomo yace yakubveka mwadidi, iye an'kwewa. 22Mwakucimbiza, iye antowera, ninga ng'ombe inaenda kukaphiwa, ninga ntsefu inapita mu nsampha, 23mpaka museve ukutwe mu cifu cace; ninga mbalame inabhululukira mu nsampha, iye nkhabe kudziwa kuti pinam'luza umaso wace.
24Na tenepo, ana anga, ndibverani, mbimusetekera pinalonga ine. 25Lekani ntima wanu utsauke kuenda munjira zace; lekani kuyendayenda m'maseu ace. 26Thangwi iye agwisa anthu azinji; anthu adaphiwa na iye ndi mwinji ukulu. 27Nyumba yace ndi njira yakuenda kunthumbi, yakutcitira pantsi mu makwartu a kufa.
