Songsihon Himlepashi
Bou cheei jembü chem koulom ka ngean hao ngebü kho lauda. Sensimaang akibü younak che chasem ka chem che ae paida, hoba saoeibü dambü kümtikei hoba jembü yaksa nyangko ki dogo ngebü nashou cheei hao haüyoda. Haoei masu shatshang ae loubü tegü phai semda.
7 1Kü shou, ngeibü ngüh jungeiashi, hoba ngeibü ngühkhüm shuong kaibü maangpona phoashi.
2Ngeibü ngühkhüm jungeiashi hoba langashi; kaibü nyekei dühko chühbü shongbe tegü ngeibü songlen lomashi. 3Khübü kho kaibü ikjishoua khühashi; khübü kho kaibü maangpona doan phoashi.
4Songsihon to laushi, “No kü na ki,” hoba ditenbü kho kaibü sanoubü thangbou dogo ngaashi, 5khünei noubüsoubü yaksa ka, ngüh lenglengbü lauko kibü yenbou ka no püetla shanga.
6Aishanga kü chem koulom ka ngei kü latthetbü danko chühan yantikei, 7hoba ngei sensimaang akibü shuong yoa hapbei, younak shuong yoa ngean apbei, sensimaang ühüpenbü nashou che, 8saoeibü chemnyek napheinei khong danko paian, saoeibü chem aeto lam jungan, 9chasem lubüa, chanyu nepan, nangnak nakthühbü hoba mühyaaka.
10Hobaje chühashi, yaksa cheei hao haüyola louada, suonlamnyu tegü hele kaian, maangpona lepbolangbü ki. 11Saoeibü ngüh kaangbü hoba saoei ngüh aditbü ki; saoeibü you chema akilabü. 12Touje khonga, touje lambheka, saoei chemnyek pendoua haiteida. 13Saoei hao shingan hoba hao to sembung shepbei, hoba thenyek kaangbüei hao to laukei:
14“Ngei sangmai lembü kula shanga kikei; tat ngei ngeibü takletbü muthüng kua. a a v14 Sangmai lembü kho lem che tegü shoyoan shaukei — saoei chema shausiyung haiteiko ki hoba chema olinla shanga mang che ki dogo lenda. 15Khoei ngo no haüyola longkei, no aicheküman chüheila shanga, hoba ngei no hapa. 16Ngei kü yepshang to küplepbü neiei seikua, Ijep ka longbü hele thüngthüngbüei. 17Ngei kü yepshang to ponlemhibü, aloen hoba shikmeimaitibüei shikmei maitikua. 18Louan, sen ngeyang sühko sanoubü haübüei yungkho; sen sanoubüa seneibü lulu maukho. 19Aishanga kü lao chema aki; haoei lam yaangbü to haukei. 20Haoei neimok che leikei hoba litnyu kaanglabü sühko hao chema alongeilabü.”
21Saoeibü ngüh maangdakbü pendouei hao nyaakeitikei; saoeibü sembung lenglengbüei hao baman sungkei. 22Mangde ong haoei sao phai sembei, haitila haubü masu pongsu tegü, sung ka shenlepla haubü meishi tegü, 23laujinei haoeibü kelang sepbulabü sühko; sung to laangjung atbü au tegü, kho haoeibü langkei muthüng kilabü dogo haoei ange.
24Tou kheijinei, kü shousi shuong, ngo to ditashi, hoba ngei laubü kho aweenashi. 25Kaibü maangpon saoeibü lama tesepei; saoeibü lamnyua teshoongaiti. 26Aishanga saoei juongnyu tuongtila kua; saoeibü haitibü shuong tan yaangbü che ki. 27Saoeibü chem kho hee aeto haubü lam ki, hailabü shemjang to shijung ngaibü.
