ኢሳይያስ 38

38 ¹በዚያን ዘመን ሕዝቅያስ ለሞት የሚያደርስ ሕመም ታመመ። የአሞጽ ልጅ ነቢዩ ኢሳይያስ ወደ እርሱ መጥቶ እንዲህ አለው፤ “አባታችን እንዲህ ይላል፦ ትሞታለህና ቤትህን አደላድል፤ አትድንም።”

²ሕዝቅያስም ፊቱን ወደ ግድግዳው አዙሮ ወደ አባታችን ጸለየ፤ ³እንዲህም አለ፤ “አባቴ ሆይ፣ በፊትህ በፍጹም ልብ በታማኝነት እንዴት እንደ ተመላለስኩ፣ በዐይንህም ፊት መልካም የሆነውን እንዳደረግሁ እባክህ አስብ።” ሕዝቅያስም መራራ ልቅሶ አለቀሰ።

⁴የአባታችንም ቃል ወደ ኢሳይያስ እንዲህ ሲል መጣ፦

⁵“ሂድና ሕዝቅያስን እንዲህ በለው፤ ‘የቀድሞ አባትህ የዳዊት አባት አባታችን እንዲህ ይላል፦ ጸሎትህን ሰምቻለሁ፤ እንባህንም አይቻለሁ። እነሆ፣ በዕድሜህ ላይ ዐሥራ አምስት ዓመት እጨምርልሃለሁ።’ ⁶አንተንና ይህችን ከተማ ከአሦር ንጉሥ እጅ አድናለሁ፤ ይህችንም ከተማ እጋርዳለሁ።

⁷“ቃል የገባውን እንደሚፈጽም ከአባታችን የሚሰጥህ ምልክት ይህ ነው፦ ⁸“እነሆ፣ ፀሐይ በአካዝ ደረጃ ላይ የወረደውን ጥላ ዐሥር ደረጃ ወደ ኋላ እመልሳለሁ።” ፀሐይም የወረደችውን ዐሥር ደረጃ ወደ ኋላ ተመለሰች።

⁹የይሁዳ ንጉሥ ሕዝቅያስ ታሞ ከሕመሙ ከዳነ በኋላ የጻፈው ጽሑፍ፦ ¹⁰እንዲህ አልሁ፤ “በዕድሜዬ እኩሌታ በመቃብር በሮች ማለፍ ይገባኛል፤ የቀረውም ዓመታቴ ተቀምቻለሁ።” ¹¹እንዲህ አልሁ፤ “አባታችንን እርሱን ራሱን በሕያዋን ምድር አላየውም፤ ከዚህ ኀላፊ ዓለም ነዋሪዎች መካከል ከእንግዲህ ሰውን አልመለከትም። ¹²ማደሪያዬ ተነቅሎ እንደ እረኛ ድንኳን ከእኔ ተወስዷል። ሕይወቴን እንደ ሸማኔ ጠቅልያለሁ፤ ከሸማ ድር ይቈርጠኛል፤ ከቀን እስከ ሌሊት ትጨርሰኛለህ። ¹³እስከ ማለዳ በጸጥታ ተጠባበቅሁ፤ እርሱ ግን እንደ አንበሳ ዐጥንቶቼን ሁሉ ይሰብራል፤ ከቀን እስከ ሌሊት ትጨርሰኛለህ። ¹⁴እንደ ዋኖስ ወይም እንደ ጨረባ እጮኻለሁ፤ እንደ ርግብም አቃስታለሁ። ወደ ላይ እያየሁ ዐይኖቼ ደከሙ። ጌታ አባት ሆይ፣ ተጨንቄአለሁ፤ ዋስትናዬ ሁን!” ¹⁵ምን ልበል? እርሱ ተናግሮኛል፤ ራሱም ፈጽሞታል። በነፍሴ ምሬት ምክንያት ዓመታቴን ሁሉ በቀስታ እመላለሳለሁ። ¹⁶ጌታ አባት ሆይ፣ ሰዎች በእንደዚህ ያሉ ነገሮች ይኖራሉ፤ የመንፈሴም ሕይወት በእነርሱ ሁሉ ውስጥ ነው። እንግዲህ ጤናዬን መልስልኝ፤ ሕያውም አድርገኝ! ¹⁷በእውነት እንዲህ ያለውን ምሬት የተቀበልሁት ለራሴ ጥቅም ነበር። በፍቅርህ ሕይወቴን ከጥፋት ጕድጓድ ጠብቀሃል፤ ኀጢአቴን ሁሉ ከጀርባህ ኋላ ጥለሃልና። ¹⁸መቃብር ሊያመሰግንህ አይችልምና፤ ሞትም ምስጋናህን ሊዘምር አይችልም። ወደ ጕድጓድ የሚወርዱ ታማኝነትህን ተስፋ ሊያደርጉ አይችሉም። ¹⁹ሕያው የሆነ፣ ሕያው የሆነ እርሱ ዛሬ እኔ እንደማደርገው ያመሰግንሃል፤ አባት ለልጆቹ ታማኝነትህን ያስታውቃል። ²⁰አባታችን ያድነኛል፤ በሕይወታችን ዘመን ሁሉ በአባታችን ቤት መዝሙሮቼን በክራር እንጫወታለን።

²¹ኢሳይያስም እንዲህ ብሎ ነበር፤ “የበለስ ጥፍጥፍ ወስደው በቍስሉ ላይ ይለጥፉ፤ እርሱም ይድናል።” ²²ሕዝቅያስም፣ “ወደ አባታችን ቤት እንደምወጣ ምልክቱ ምንድን ነው?” ብሎ ጠይቆ ነበር።