Isaiah 38

38 ¹Ní àwọn ọjọ́ wọ̀nyẹn, Hesekiah ní àìsàn ikú. Wòlíì Isaiah ọmọ Amosi wá sọ́dọ̀ rẹ̀, ó sì wí fún un pé, “Báyìí ni Baba wa wí: Palẹ̀mọ́ ilé rẹ, nítorí ìwọ yóò kú; ìwọ kì yóò sàn padà.”

²Nígbà náà ni Hesekiah yí ojú rẹ̀ sí ara ògiri, ó sì gbàdúrà sí Baba wa, ³ó sì wí pé, “Jọ̀wọ́, Baba mi, rántí bí mo ti fi òtítọ́ rìn níwájú rẹ pẹ̀lú odindi ọkàn, tí mo sì ṣe ohun tí ó dára lójú rẹ.” Hesekiah sì sọkún kíkorò.

⁴Nígbà náà ni ọ̀rọ̀ Baba wa tọ Isaiah wá pé:

⁵“Lọ sọ fún Hesekiah pé, ‘Báyìí ni Baba wa wí, Baba Dafidi baba ńlá rẹ: Mo ti gbọ́ àdúrà rẹ, mo sì ti rí omijé rẹ. Mo ń fi ọdún mẹ́ẹ̀ẹ́dógún kún ọjọ́ ayé rẹ.’ ⁶Èmi yóò gbà ọ́ àti ìlú yìí sílẹ̀ lọ́wọ́ ọba Assiria; Èmi yóò sì dáàbò bo ìlú yìí.

⁷“Èyí ni àmì rẹ láti ọ̀dọ̀ Baba wa pé yóò ṣe ohun tí ó ti ṣèlérí: ⁸Wò ó, Èmi yóò yí òjìji padà ní ìgbésẹ̀ mẹ́wàá tí oòrùn ti sọ̀kalẹ̀ lórí àtẹ̀gùn Ahasi.” Báyìí ni oòrùn ṣe yí ìgbésẹ̀ mẹ́wàá tí ó ti sọ̀kalẹ̀ padà.

⁹Ìwé tí Hesekiah ọba Juda kọ, lẹ́yìn tí ó ṣàìsàn tí ó sì sàn padà: ¹⁰Mo wí pé, “Ní àárín ọjọ́ mi ni èmi gbọdọ̀ gba ẹnu-ọ̀nà isà òkú kọjá; a ti gbà mí ní ìyókù ọdún mi.” ¹¹Mo wí pé, “Èmi kì yóò rí Baba wa fúnra rẹ̀ ní ilẹ̀ alààyè; èmi kì yóò wo ọmọ ènìyàn mọ́, láàrín àwọn tí ń gbé ní ayé tí ń kọjá lọ yìí. ¹²A fa ibùgbé mi tu, a sì gbé e kúrò lọ́dọ̀ mi bí àgọ́ olùṣọ́ àgùntàn. Mo ti ká ọjọ́ ayé mi jọ bí ahunṣọ; ó gé mi kúrò ní ibi ìhunṣọ; láti ọ̀sán dé òru ni ìwọ fi òpin dé mi. ¹³Mo fi sùúrù dúró títí di òwúrọ̀, ṣùgbọ́n bí kìnnìún ni ó fi ń dá gbogbo egungun mi; láti ọ̀sán dé òru ni ìwọ fi òpin dé mi. ¹⁴Bí alápáǹdẹ̀dẹ̀ tàbí àkọ̀ ni mo ṣe ń ké; mo ń kérora bí àdàbà. Ojú mi ti rẹ̀ nítorí wíwo òkè. Baba Olódùmarè, ìpọ́njú bá mi; ṣe ẹ̀rí ààbò mi!” ¹⁵Kí ni èmi lè wí? Ó ti bá mi sọ̀rọ̀, òun fúnra rẹ̀ sì ti ṣe é. Èmi yóò máa rìn pẹ̀lẹ́pẹ̀lẹ́ ní gbogbo ọdún mi nítorí ìkorò ọkàn mi. ¹⁶Baba Olódùmarè, nípa àwọn nǹkan báyìí ni ènìyàn ń yè, àti nínú gbogbo wọn ni ìyè ẹ̀mí mi wà. Nítorí náà, mú mi padà bọ̀ sí ìlera, kí o sì jẹ́ kí n yè! ¹⁷Nítòótọ́, fún àǹfààní ara mi ni mo ṣe jìyà ìkorò bẹ́ẹ̀. Nínú ìfẹ́ rẹ ni ìwọ dá ọkàn mi dúró kúrò nínú ihò ìparun, nítorí ìwọ ti sọ gbogbo ẹ̀ṣẹ̀ mi sẹ́yìn rẹ. ¹⁸Nítorí isà òkú kò lè yìn ọ́; ikú kò lè kọ orin ìyìn rẹ. Àwọn tí ń sọ̀kalẹ̀ lọ sínú ihò kò lè ní ìrètí fún òtítọ́ rẹ. ¹⁹Alààyè, alààyè—àwọn ni wọ́n ń yìn ọ́, bí èmi ti ń ṣe lónìí; baba ń sọ òtítọ́ rẹ di mímọ̀ fún àwọn ọmọ. ²⁰Baba wa yóò gbà mí là, àwa yóò sì máa fi ohun èlò olókùn ṣe orin mi ní gbogbo ọjọ́ ayé wa, ní ilé Baba wa.

²¹Isaiah ti wí pé, “Ẹ jẹ́ kí wọ́n mú àkàrà èso ọ̀pọ̀tọ́, kí wọ́n fi lé oówo náà, yóò sì sàn.” ²²Hesekiah ti béèrè pé, “Kí ni àmì náà tí èmi yóò fi gòkè lọ sí ilé Baba wa?”