Hezekaya Nọ nʼỌnụ Ụzọ Ọnwụ

Mgbe Nna anyị gwara ya na ọ gaghị agbake, Hezekaya chere ihu ya na mgbidi, kwaa ákwá. A tụkwasịrị ya afọ iri na ise, onyinyo anyanwụ alaghachikwa azụ dị ka ihe ama. Ekpere o dere edere anaghị ezochi egwu ọnwụ, ọ na-ejedebekwa na ịmara na ndị dị ndụ na-eto ya.

Isi 38.

Nʼụbọchị ndị ahụ, Hezekaya daara ọrịa nke ga-egbu ya. Aịzaya onye amụma, nwa Amọz, bịakwutere ya sị, “Nke a bụ ihe Nna anyị kwuru: Dozie ụlọ gị, nʼihi na ị ga-anwụ; ị gaghị agwọ ọrịa.”

Mgbe ahụ, Hezekaya chigharịrị ihu ya chee nʼebe mgbidi dị, kpee ekpere nye Nna anyị, sị, “Biko, Nna m, cheta ka m si jiri obi m niile jee ije nʼikwesị ntụkwasị obi nʼihu gị, meekwa ihe dị mma nʼanya gị.” Hezekaya bere akwa nke ukwuu.

Mgbe ahụ, okwu Nna anyị rutere Aịzaya aka, sị:

“Gaa gwa Hezekaya sị, ‘Nke a bụ ihe Nna anyị, bụ Nna nna gị ochie Devid, kwuru: Anụla m ekpere gị, hụkwa anya mmiri gị. Lee, ana m atụkwasịkwara ndụ gị afọ iri na ise.’” Aga m anapụta gị na obodo a site nʼaka eze Asịrịa; aga m echekwa obodo a.

“Nke a bụ ihe ịrịba ama gị site nʼaka Nna anyị nke na-egosi na ọ ga-eme ihe o kwere na nkwa: Lee, aga m eme ka onyinyo nke anyanwụ gbadatụworo nʼelu ihe nrigo Ehaz laghachi azụ nzọ ụkwụ iri.” Ya mere anyanwụ laghachiri azụ nzọ ụkwụ iri ahụ ọ gbadatụworo.

Ihe Hezekaya, eze Juda, dere, mgbe ọ rịasịrị ọrịa ma gwọọ: Ekwuru m sị, “Nʼetiti ụbọchị ndụ m, aga m esi nʼọnụ ụzọ ama ili gafee; a napụla m afọ ndụ m fọdụrụ.” Ekwuru m sị, “Agaghị m ahụ Nna anyị nʼonwe ya nʼala ndị dị ndụ; agaghị m elekwa mmadụ anya ọzọ, nʼetiti ndị bi nʼụwa a na-agafe agafe. A hopuru ebe obibi m, bupụ ya site nʼebe m nọ dịka ụlọikwuu onye ọzụzụ atụrụ. Apịakọtala m ndụ m dịka onye na-akpa akwa; ọ na-ebipụ m site nʼigwe ịkpa akwa; site nʼụbọchị ruo nʼabalị, ị na-eme ka m kwụsị. Eji m nwayọọ chere ruo ụtụtụ, ma dịka ọdụm, ọ na-agbaji ọkpụkpụ m niile; site nʼụbọchị ruo nʼabalị, ị na-eme ka m kwụsị. Dịka eleke maọbụ ụgbala, ka m na-eti mkpu; ana m asụ ude dịka nduru. Anya m na-ada mba nʼilerụ anya nʼelu. O Nna, Onye kachasị ihe niile, a na-emegbu m; kwee m nkwa na ị ga-echekwa m!” Gịnị ka m ga-ekwu? O gwaala m okwu, ya onwe ya emekwaala ya. Aga m eji nwayọọ jee ije ụbọchị ndụ m niile nʼihi ilu nke mkpụrụobi m. O Nna, Onye kachasị ihe niile, ọ bụ site nʼihe ndị dị otu a ka ndị mmadụ ji adị ndụ, ọ bụkwa nʼime ihe ndị a niile ka ndụ nke mmụọ m dị. Ya mere, mee ka ahụ dị m mma ọzọ, ka m dịrị ndụ! Nʼezie, ọ bụ maka ọdịmma nke m ka m ji taa ahụhụ ilu dị otu a. Nʼịhụnanya gị, i gbochiri ndụ m ịba nʼolulu mbibi, nʼihi na ị tụpụla mmehie m niile nʼazụ gị. Nʼihi na ili apụghị ito gị; ọnwụ apụghị ịbụ abụ otuto gị. Ndị na-arịda nʼolulu apụghị inwe olileanya nʼikwesị ntụkwasị obi gị. Ndị dị ndụ, ndị dị ndụ—ha na-eto gị, dịka m na-eme taa; nna na-eme ka ụmụ ya mara ikwesị ntụkwasị obi gị. Nna anyị ga-azọpụta m, anyị ga-akpọkwa abụ m nʼụbọ eriri ụbọchị ndụ anyị niile, nʼụlọ Nna anyị.

Aịzaya ekwuwo, sị, “Ka ha were ogbe mkpụrụ fig, tee ya nʼakpụ ahụ, ọ ga-agwọkwa.” Hezekaya jụwokwa, sị, “Gịnị bụ ihe ịrịba ama na-egosi na m ga-arịgo nʼụlọ Nna anyị?”