Hezekiah Mrityu laga Dorja te
Amikhan laga Pitri pora tai bhal nohobo koi kene kowa pichete, Hezekiah tai laga mukh dewal phale ghurai kene kandi thake. Pondhra saal jura kori diye, aru prowan nimite suruj laga saya pichete jai. Tai laga likha prarthana te mori jowa laga bhoi bisoy te eku bhi lukai nathake, aru jinda manuh khan he Tai ke prosongsa kore koi kene jani kene khotom hoi.
38 1Hei din khan te Hezekiah mori bole laga bemar hoise. Amoz laga putro bhabobadi Isaiah tar logot te ahhi kene koise, “Amar Pitri eneka koi ase: Tumar ghor thik kori lobi, kilemane tumi moribo; tumi aru bhal nahobo.”
2Tetiya Hezekiah pora tar mukh deal phale ghurai kene amar Pitri logot te prathana korise, 3aru koise, “He moi laga Pitri, moi kineka pura mon pora Apuni laga age te biswasjogya thaki kene berai thakise, aru Apuni laga suku te ki bhal ase eitu korise, eitu monte rakhi bi, anurodh ase.” Aru Hezekiah bisi tita pora kandise.
4Tetiya amar Pitri laga kotha Isaiah logot te ahhise:
5“Jai kene Hezekiah ke kobi, ‘Tumar purbo-puruk David laga Pitri, amar Pitri eneka koi ase: Moi tumar prathana huni loise aru tumar suku-pani dikhise. Sabi, Moi tumar jivon te pondro saal aru bisi jor di ase. 6Aru Moi tumi ke aru eitu nogor ke Assyria laga raja laga hath pora bachai dibo; Moi eitu nogor ke roksha koribo.’
7“Amar Pitri ki vachan dise eitu Tai koribo koi kene, Amar Pitri pora tumar nimite eitu chihna ase: 8Sabi, Ahaz laga siri te suryo pora dosta khuj nami kene ja-a chaya ke Moi dosta khuj piche ghurai dibo.” Titia suryo nami ja-a dosta khuj piche ghuri jaise.
9Judah laga raja Hezekiah laga ekta likha kotha, tai bemar pora bhal huwa pichete: 10Moi koise, “Moi laga din khan laga majhte moi kobor laga dorja khan phale jabo lagise; moi laga baki saal khan moi pora chinai loise.” 11Moi koise, “Jinda thaka manu khan laga desh te moi amar Pitri ke nijor dikhibo napabo; eitu harai ja-a prithibi te thaka khan majhte, moi aru manu khan ke nasabo. 12Moi laga thaka ghor ekjon mer-rokhiya laga tombu nisena moi pora ulai kene loi jaise. Moi ekjon kapor bana manu nisena moi laga jivon ghuchai loise; Tai moi ke kapor bana ora pora kati diye; din pora rati tak Apuni moi ke khotom kori diye. 13Moi phojur tak chup-chap rukhi thakise, kintu ekta singho nisena Tai moi laga sob haddi khan bhangai diye; din pora rati tak Apuni moi ke khotom kori diye. 14Ekta chorai nahole bogoli nisena moi awaj kore; moi ekta kobutor nisena kandise. Upor phale sai kene moi laga suku komjur hoi jaise. He Prabhu Pitri, moi bisi dukh te ase; moi laga roksha laga jamin hoi jabi!” 15Moi ki kobo paribo? Tai moi ke koi dise, aru Tai nijor pora eitu kori loise. Moi laga atma laga dukh karone moi laga sob saal khan moi dhire dhire berai thakibo. 16He Prabhu Pitri, eneka jinis khan pora manu khan jinda thake, aru eitu sob khan bhitor te moi laga atma laga jivon ase. Etu nimite moi ke changa kori dibi aru moi ke jinda thaki bole dibi! 17Hosa pora, moi eneka tita dukh pa-a tu moi laga nijor bhal nimite he thakise. Apuni laga morom te Apuni moi laga jivon ke nosto laga gaat pora bachai loise, kilemane Apuni moi laga sob paap khan ke Apuni laga pichete phelai dise. 18Kilemane kobor pora Apuni ke stuti koribo napare; mora pora Apuni laga stuti gana koribo napare. Kon manu khan gaat te nami jai taikhan Apuni laga biswasjogyota karone asha koribo napare. 19Jinda thaka manu, jinda thaka manu—taikhan he Apuni ke stuti kore, aji moi kineka kori ase; baba pora bacha khan ke Apuni laga biswasjogyota janai diye. 20Amar Pitri pora moi ke bachai dibo, aru amikhan laga jivon laga sob din khan te, amar Pitri laga ghor te, amikhan tar baja khan te moi laga git khan bajabo.
21Isaiah pora koi disele, “Taikhan dimoru phol laga ekta pitha loi kene phura te lagai dibi, aru tai bhal hoi jabo.” 22Hezekiah pora hudisele, “Moi amar Pitri laga ghor te uthi jabo, eitu laga chihna ki ase?”