ኢሳይያስ 38 FHB Father's Heart Bible™

38 ¹በተን መዓልቲታት እቲኣተን ሕዝቅያስ ንሞት ዘብፅሕ ሕማም ሓሚሙ ነበረ። ነቢይ ኢሳይያስ ወዲ ኣሞፅ ድማ ናብኡ መፂኡ፥ “ኣቦና ከምዙይ ይብል ኣሎ፦ ክትመውት ኢኻ እምበር ኣይክትሓውን ኢኻ እሞ፥ ንቤትካ ኣዳሉ” በሎ።

²ሽዑ ሕዝቅያስ ገፁ ናብ መንደቕ መሊሱ፥ ናብ ኣቦና ፀለየ፥ ³ከምዙይ ድማ በለ፦ “በጃኻ ኦ ኣቦይ፥ ኣብ ቅድሜኻ ብምሉእ ልቢ ብሓቅነት ከም ዝተመላለስኩ፥ ኣብ ቅድሚ ዓይንኻ ድማ ፅቡቕ ከም ዝገበርኩ ዘክር።” ሕዝቅያስ ከዓ መሪር ብኽያት በኸየ።

⁴ሽዑ ቃል ኣቦና ናብ ኢሳይያስ ከምዙይ ኢሉ መፀ፦

⁵“ናብ ሕዝቅያስ ከይድካ ኸምዙይ ኢልካ ንገሮ፦ ‘ኣቦና፥ ኣቦ ዳዊት ኣቦሓጎኻ፥ ከምዙይ ይብል ኣሎ፦ ፀሎትካ ሰሚዐ፥ ንብዓትካ ድማ ረአኹ። እንሆ ኣብ ዕድሜኻ ዓሰርተ ሓሙሽተ ዓመት ክውስኸልካ እየ።’ ⁶ንኣኻን ነዛ ኸተማ እዚኣን ካብ ንጉስ ኣሶር ከድሕነኩም እየ፤ ነዛ ኸተማ እዚኣ ድማ ክከላኸለላ እየ።

⁷“ኣቦና ነቲ ዝተዛረቦ ነገር ከም ዝፍፅሞ፥ ካብኡ ዝኾነ ምልክትካ እዙይ እዩ፦ ⁸እንሆ፥ ነቲ ፀሓይ ኣብ መሳልል ኣካዝ ዝወረደቶ ፅላሎት፥ ዓሰርተ መደያይቦ ንድሕሪት ክመልሶ እየ።” ሽዑ እታ ፀሓይ ነቲ ዝወረደቶ ዓሰርተ መደያይቦ ንድሕሪት ተመለሰት።

⁹ድሕሪ ሕማሙን ምሕዋዩን፥ ናይ ሕዝቅያስ ንጉስ ይሁዳ ፅሕፈት እዙይ እዩ፦ ¹⁰ኣነ ኸዓ “ኣብ ማእኸል መዓልቲታተይ ናብ ደገ መቓብር ክኣቱ እየ፤ ካብ ዝተረፈ ዓመታተይ ተገፊፈ” በልኩ። ¹¹ኣነ ኸዓ “ንኣቦና ባዕሉ ኣብ ምድሪ ህያዋን ኣይርእን እየ፤ ኣብ ማእኸል እቶም ኣብዛ ሓላፊት ዓለም ዝነብሩ ድማ፥ ደጊመ ንሰብ ኣይርእን እየ” በልኩ። ¹²ማሕደረይ ከም ድንኳን ጓሳ ተነቒሉ ካባይ ተወሲዱ። ንህይወተይ ከም ኣላማይ ጠቕሊለያ፤ ካብ ማእለማ ይቘርፀኒ ኣሎ፤ ካብ መዓልቲ ክሳዕ ለይቲ ተወድኣኒ ኣለኻ። ¹³ክሳዕ ንግሆ ስቕ ኢለ ተፀቤኹ፤ ንሱ ግና ከም ኣንበሳ ዅሉ ኣዕፅምተይ ይሰብሮ፤ ካብ መዓልቲ ክሳዕ ለይቲ ተወድኣኒ ኣለኻ። ¹⁴ከም ዛግራ ወይ ራዛ እጭርር ኣለኹ፤ ከም ርግቢ ድማ ኣንባህቕ ኣለኹ። ኣዒንተይ ንላዕሊ እናጠመታ ፈዘዛ። ኦ ጐይታ ኣቦ! ተፀቒጠ ኣለኹ፤ ዋሕስ ድሕነተይ ኩን! ¹⁵እንታይ ክብል? ንሱ ተዛሪቡኒ፥ ባዕሉ ድማ ገይርዎ። ብሰሪ ምረት ነፍሰይ ብዅሉ ዓመታተይ ሰለይ እናበልኩ ክኸይድ እየ። ¹⁶ኦ ጐይታ ኣቦ! ሰብ በዘን ነገራት እዚኣተን ይነብር፥ ህይወት መንፈሰይ ከዓ ኣብ ኵለን እዚኣተን ኣሎ። ስለዙይ ናብ ጥዕናይ መልሰኒ፥ ህያው ድማ ግበረኒ! ¹⁷ነቲ ዝተሳቐኽዎ መሪር ነገር፥ ብርግፅ ንሰናይተይ እዩ ነይሩ። ብፍቕርኻ ንህይወተይ ካብ ጕድጓድ ጥፍኣት ከልከልካያ፥ ኵሉ ሓጢኣተይ ናብ ድሕሪ ዝባንካ ደርቢኻዮ ኢኻ እሞ። ¹⁸መቓብር ኣየመስግነካን እዩ፤ ሞትውን ምስጋናኻ ኣይዝምርን እዩ። እቶም ናብ ጕድጓድ ዝወርዱ ንሓቅነትካ ተስፋ ክገብሩ ኣይኽእሉን። ¹⁹ህያዋን፥ ህያዋን እዮም ዘመስግኑኻ፥ ከምቲ ኣነ ሎሚ ዝገብሮ፤ ኣቦ ንደቁ ሓቅነትካ የፍልጦም። ²⁰ኣቦና ከድሕነኒ እዩ፤ መዝሙራተይ ድማ ኣብ ቤት ኣቦና ብዅሉ መዓልቲታት ህይወትና ብመሳርሒ ኣውታር ክንፃወት ኢና።

²¹ኢሳይያስ ከዓ “ጎጎ በለስ ወሲዶም ኣብቲ ዕብጠት ይግበርዎ፥ ሽዑ ኽሓዊ እዩ” ኢሉ ነበረ። ²²ሕዝቅያስ ድማ “እቲ ናብ ቤት ኣቦና ኸም ዝድይብ ዝሕብር ምልክት እንታይ እዩ?” ኢሉ ሓቲቱ ነበረ።