ኢሳይያስ 39

39 ¹በዚያን ጊዜ የባላዳን ልጅ የባቢሎን ንጉሥ መሮዳ ባላዳን፣ ሕዝቅያስ ታምሞ እንደ ዳነ ሰምቶ ለእርሱ ደብዳቤዎችንና ስጦታን ላከ። ²ሕዝቅያስም በደስታ ተቀበላቸው፤ የመዝገብ ቤቱንም አሳያቸው፦ ብሩን፣ ወርቁን፣ ሽቱን፣ መልካሙን ዘይት፣ የጦር ዕቃ ቤቱን ሁሉ፣ በማከማቻ ቤቶቹ ውስጥ ያለውንም ሁሉ አሳያቸው። በቤቱም ሆነ በመንግሥቱ ውስጥ ሕዝቅያስ ያላሳያቸው ምንም ነገር አልነበረም። ³ከዚያም ነቢዩ ኢሳይያስ ወደ ንጉሥ ሕዝቅያስ መጥቶ፣ “እነዚህ ሰዎች ምን አሉ? ከወዴትስ መጡ?” ብሎ ጠየቀ። ሕዝቅያስም፣ “ከሩቅ አገር፣ ከባቢሎን መጡ” አለ።

⁴እርሱም፣ “በቤትህ ውስጥ ምን አዩ?” ብሎ ጠየቀ። ሕዝቅያስም፣ “በቤቴ ውስጥ ያለውን ሁሉ አዩ። በማከማቻ ቤቶቼ ውስጥ ያላሳየኋቸው ምንም ነገር የለም” ብሎ መለሰ።

⁵ከዚያም ኢሳይያስ ሕዝቅያስን፣ “የሰማይ ሰራዊት አባት ቃል ስማ፦

⁶እነሆ፣ በቤትህ ውስጥ ያለው ሁሉ፣ አባቶችህ እስከ ዛሬ ድረስ ያከማቹት ሁሉ ወደ ባቢሎን የሚወሰድበት ዘመን ይመጣል። ምንም የሚቀር ነገር አይኖርም፣ ይላል አባታችን። ⁷ከገዛ ልጆችህ፣ ከዘርህም አንዳንዶቹ ተወስደው በባቢሎን ንጉሥ ቤተ መንግሥት ውስጥ ሹማምት ሆነው ያገለግላሉ” አለው።

⁸ከዚያም ሕዝቅያስ ኢሳይያስን፣ “የተናገርከው የአባታችን ቃል መልካም ነው” አለው። “በሕይወት ዘመኔ ሰላምና ደኅንነት ይኖራል” ብሎ አስቦ ነበርና።