Gẹnẹsisi 20

20 ¹Abrahamu sì ti ibẹ̀ rìnrìn àjò lọ sí ìhà gúúsù, ó sì tẹ̀dó sáàrin Kadeṣi àti Ṣuri, ó sì ṣe àtìpó ní Gerari. ²Abrahamu sì wí nípa Sara aya rẹ̀ pé, “Arábìnrin mi ni.” Nítorí náà Abimeleki ọba Gerari ránṣẹ́ sí i, ó sì mú Sara.

³Ṣùgbọ́n Baba wa tọ Abimeleki wá nínú àlá ní òru náà, ó sì wí pé, “Kíyèsíi, òkú ènìyàn ni ìwọ nítorí obìnrin tí ìwọ mú, nítorí tí ó ti lọ́kọ.”

⁴Ṣùgbọ́n Abimeleki kò tí ì súnmọ́ ọn; ó sì wí pé, “Olódùmarè Ọlọ́run, ìwọ ha óò pa àní orílẹ̀-èdè aláìlẹ́ṣẹ̀ run bí? ⁵Ọ̀un tìkára rẹ̀ kò ha sọ fún mi pé, ‘Arábìnrin mi ni’? Òun pẹ̀lú, obìnrin náà fúnra rẹ̀ sì wí pé, ‘Arákùnrin mi ni.’ Ọkàn òtítọ́ àti ọwọ́ mímọ́ ni mo fi ṣe èyí.”

⁶Nígbà náà ni Baba wa wí fún un nínú àlá pé, “Bẹ́ẹ̀ ni, mo mọ̀ pé ọkàn pípé ni ìwọ fi ṣe èyí, mo sì ti pa ọ́ mọ́ kúrò nínú ẹ̀ṣẹ̀ sí mi; nítorí náà ni èmi kò ṣe jẹ́ kí o fọwọ́ kàn án. ⁷Nísinsìnyí, dá aya ọkùnrin náà padà, nítorí wòlíì ni, yóò sì gbàdúrà fún ọ, ìwọ yóò sì yè. Ṣùgbọ́n bí ìwọ kò bá dá a padà, mọ̀ dájúdájú pé ìwọ yóò kú, ìwọ àti gbogbo àwọn tí í ṣe tìrẹ.”

⁸Abimeleki sì dìde ní kùtùkùtù òwúrọ̀, ó pe gbogbo àwọn ìránṣẹ́ rẹ̀, ó sì sọ gbogbo nǹkan wọ̀nyí fún wọn létí; ẹ̀rù sì ba àwọn ọkùnrin náà gidigidi. ⁹Abimeleki sì pe Abrahamu, ó sì béèrè pé, “Kí ni ìwọ ṣe sí wa yìí? Báwo ni mo ṣe dẹ́ṣẹ̀ sí ọ, tí ìwọ fi mú ẹ̀ṣẹ̀ ńlá wá sórí mi àti ìjọba mi? Ìwọ ti ṣe sí mi ohun tí kò yẹ kí a ṣe láé.” ¹⁰Abimeleki sì tún wí fún Abrahamu pé, “Kí ni ìwọ rí tí ìwọ fi ṣe irú nǹkan yìí?”

¹¹Abrahamu sì wí pé, “Èmi rò pé, dájúdájú kò sí ìbẹ̀rù Baba wa níbí yìí, wọn yóò sì pa mí nítorí aya mi.” ¹²Yàtọ̀ síyẹn, lóòótọ́ ni arábìnrin mi ni, ọmọbìnrin baba mi, ṣùgbọ́n kì í ṣe ọmọ ìyá mi; ó sì di aya mi.

¹³Nígbà tí Baba wa mú mi rìn kiri kúrò ní ilé baba mi, mo wí fún un pé kí ó ṣe àánú yìí fún mi—níbikíbi tí a bá dé, kí ó máa wí nípa mi pé, “Arákùnrin mi ni.”

¹⁴Abimeleki sì mú àgùntàn àti màlúù, àti àwọn ìránṣẹ́kùnrin àti ìránṣẹ́bìnrin, ó fi wọ́n fún Abrahamu, ó sì dá Sara aya rẹ̀ padà fún un. ¹⁵Abimeleki sì wí pé, “Ilẹ̀ mi wà ní ṣíṣí sílẹ̀ fún ọ; máa gbé ibikíbi tí ó bá wù ọ́.” ¹⁶Ó sì wí fún Sara pé, “Wò ó, mo fi ẹgbẹ̀rún ẹyọ fàdákà fún arákùnrin rẹ. Èyí ni láti bo ẹ̀ṣẹ̀ tí a ṣe sí ọ ní ojú gbogbo àwọn tí ó wà pẹ̀lú rẹ; níwájú gbogbo ènìyàn, a ti dá ọ láre pátápátá.”

¹⁷Abrahamu sì gbàdúrà sí Baba wa, òun sì mú Abimeleki lára dá, àti aya rẹ̀, àti àwọn ìránṣẹ́bìnrin rẹ̀, kí wọn lè máa bímọ padà, ¹⁸nítorí Baba wa ti ti gbogbo inú pa pátápátá nínú agbo ilé Abimeleki nítorí Sara aya Abrahamu.