Abraham Gerara
Abrahamei nyibou Sara hao na dogo laukei, hoba Abimelekei sao lekei. Seneibü Bouei sao meitila shaang mangha choba to lenkei, hoba Abimelekei hao lolo shedbü akibü dogo loenkei. Abrahamei ho yena aoeikei seneibü Bou to atehütti dogo haoei thineikei dogo ngankei.
20 1Hobaje Abraham khüka yungthang Negeb aeto meimeijung haukei, hoba Kadesh si Shur kanglanga settikei, hoba Gerara yen la kikei. 2Hobaje Abrahamei hao yak Sara shanga laukei, “Sao küna.” Kheijinei Gerar Choba Abimelekei sao ngaan Sara lekei.
3Lausikei khüyou Bouei mangha Abimelek jungto longan laukei, “Nyi lebü yaksa loei no haibü tegü ki, aishanga sao lao kibü yaksa ki.”
4Hobaje Abimelekei sao to alousühti kikei, hoba haoei laukei, “O Bunyubou Mühghaü, nyi shedbü akibü phang che ongkei mautilabü lo? 5Haoei himshuong kü to, ‘Sao küna,’ dogo alen lo? Hoba saoei himshuong tokei, ‘Hao küna,’ dogo laukei. Ngei ho maangpon hinseibü hoba ik shedbü akibü kümbei.”
6Kheijinei Bouei mangha hao to laukei, “Haü, no ho maangpon tükdebüei kümbei dogo ngei ngada, hoba ngei no küla shabü shonbü ka khinkukei; khoei ong ngei no sao to meitila akuti. 7Hibü müt cheeibü yak sepeitikuashi, aishanga hao thuseibou ki, hoba haoei no shanga welaulabü, hoba no langlabü. Nyi sao asepeitikualonga, no hoba no la kibü pendou tükde hailabü dogo ngeshi.”
8Hobaje Abimelek khünyet ngeyang enyu pikei, hoba haoeibü sambü shuong pendou ngakei, hoba haüthükbü pendou haoen to lenkei; hoba müt shuong aeibou hattikei. 9Kheijinei Abimelekei Abraham ngaan laukei, “No kün to ai kümbei? Ngei no to ai shedbü kümkei hoba, no kü si kü sangle to shabü yaangbü che louakei? Akümlabü peisilei no kü to kümbei.” 10Hoba Abimelekei Abraham to laukei, “No ai maanga dambo kho tegü kümbei?”
11Abrahamei laukei, “Ngei thounoukei, maimaitham hanei Bou to souhatbü aki, hoba haoenei kü yak shanga ngo haitilabü.” 12Hoba tokei, sao tükde küna ki, kü bou nouyangshou, lausikei kü nyueibü nouyangshou aying, hoba sao kü yakla yeikei.
13Ladang Bouei kü bou chem ka ngo shoongaitikei, ngei sao to laukei, kü to ho sanou lenshi; sen lan to haulaje, ngo shanga, “Hao küna,” dogo laushi.
14Hobaje Abimelekei san, masu, hoba aao bousu si yaksa leian Abraham la kukei, hoba hao yak Sara hao to sepeitikukei. 15Hoba Abimelekei laukei, “Kü kaonyek no thedanga sühbü ki; no maiakei lan to kiashi.” 16Hoba Sara to haoei laukei, “Chühashi, ngei ka na la chandinam hajar che kuda. Ho ka yoa kibü pendoueibü nyeka ka to kümbü shedbü yuklabü shanga ki; hoba pendou thedanga no khümbo ai ayinglabü.”
17Hobaje Abrahamei seneibü Bou to welaukei, hoba Haoei Abimelek, hao yak, hoba hao sambü sao shuong maitikukei, hibü haoenei nyibou shou buklabü; 18aishanga Abraham yak Sara shanga Bouei Abimelekeibü chempen shuong pendoueibü na setshang khümbo khinkukei.
