Iburahĩmu kũu Gerari
Aburahamu o rĩngĩ agĩĩta Sara mwarĩ wa nyina, naake Abimeleki akĩmuoya. Ithe witũ agĩkaania mũthamaki kĩrootoinĩ atanamũhutia, naake Abimeleki akiuga atĩ ndarĩ na mahĩtia. Aburahamu agĩĩtĩkĩra atĩ eeciiragia o ũguo atĩ gũkũ gũtirĩ mũndũ wĩtigĩrĩte Ithe witũ.
20 1Naake Iburahĩmu akiuma kũu agĩthiĩ bũrũri wa Negevu, agĩtũũra gatagatĩ ka Kadeshi na Shuri, agĩikara ta mũgeni kũu Gerari. 2Nake Iburahĩmu akiuga ũhoro wa Sara mũtumia wake atĩrĩ, “Ũyũ nĩ mwarĩ wa maitũ.” Nĩ ũndũ ũcio Abimeleku mũthamaki wa Gerari agĩtũma andũ makamũgĩĩre, akĩoya Sara.
3No Ithe witũ agĩũka kũrĩ Abimeleku kĩroto-inĩ ũtukũ ũcio, akĩmwĩra atĩrĩ, “Wee ũhaana ta mũndũ ũrĩ o gũkua nĩ ũndũ wa mũtumia ũcio woyire, amu nĩ mũtumia ũhikĩte.”
4Na rĩrĩ, Abimeleku ndaakuhĩrĩirie harĩ we. Nake akiuga atĩrĩ, “Mwathani Ngai, no wanange o na rũrĩrĩ rũtarĩ na mahĩtia? 5Githĩ we mwene ndaanjĩĩrire atĩrĩ, ‘Ũyũ nĩ mwarĩ wa maitũ’? Nake o nake mwene akiuga atĩrĩ, ‘Ũyũ nĩ mũrũ wa maitũ.’ Niĩ njĩkĩte ũũ ndĩ na ngoro theru na moko matarĩ na mahĩtia.”
6Nake Ithe witũ akĩmwĩra kĩroto-inĩ atĩrĩ, “Ĩĩ, nĩnjũũĩ atĩ wĩkire ũũ ũrĩ na ngoro nũngarũ, na nĩ niĩ ndakũgirĩrĩirie ũndeehĩrie; nĩkĩo itaakwĩtĩkĩririe ũmũhutie. 7Rĩu-rĩ, cookia mũtumia wa mũndũ ũcio, amu nĩ mũnabii ũrĩa ũgaagũhooera, na nĩũgũtũũra muoyo. No ũngĩkorwo ndũkũmũcookia, menya atĩ ti-itherũ nĩũgũkua, wee na arĩa othe marĩ aku.”
8Nake Abimeleku agĩũkĩra rũciinĩ tene, agĩĩta ndungata ciake ciothe, akĩmeera maũndũ macio mothe meekĩkĩte; nao arũme acio makĩĩyũrwo nĩ guoya mũnene. 9Nake Abimeleku agĩĩta Iburahĩmu, akĩmũũria atĩrĩ, “Nĩ atĩa ũtwĩkĩte? Nĩ kĩĩ ngwĩhĩirie, nĩgeetha ũndeehere mehia manene ũũ, niĩ na ũthamaki wakwa? Nĩwĩkĩte harĩ niĩ maũndũ matakĩagĩrĩire gwĩkwo.” 10Ningĩ Abimeleku akĩũria Iburahĩmu atĩrĩ, “Nĩ kĩĩ wonaga, nĩ ũndũ nĩwĩkire ũndũ ta ũcio?”
11Nake Iburahĩmu akiuga atĩrĩ, “Ndeeciiririe atĩ, ti-itherũ gũtirĩ wĩtigĩri Ithe witũ gũkũ, na nĩmakũnjũraga nĩ ũndũ wa mũtumia wakwa.” 12Na makĩria ma ũguo, ti-itherũ nĩ mwarĩ wa baaba, mwarĩ wa baaba no ti mwarĩ wa maitũ; nake agĩtuĩka mũtumia wakwa.
13Na rĩrĩa Ithe witũ aandũmire njũrũũre ngĩũma nyũmba ya baaba, ndaamwĩrire atĩrĩ: Njĩka wega ũyũ—kũrĩa guothe tũgaathiĩ, uugage ũhoro wakwa atĩrĩ, “Ũyũ nĩ mũrũ wa maitũ.”
14Nake Abimeleku akĩoya ng'ondu, na ng'ombe, na ndungata cia arũme na cia andũ-a-nja, agĩciheana kũrĩ Iburahĩmu, na akĩmũcookeria Sara mũtumia wake. 15Nake Abimeleku akiuga atĩrĩ, “Bũrũri wakwa ũrĩ mbere yaku; ikara o harĩa hothe ũngĩenda.” 16Nake akĩĩra Sara atĩrĩ, “Atĩrĩrĩ, nĩngũhe mũrũ wa nyũkwa icunjĩ ngiri ĩmwe cia betha. Ũndũ ũyũ nĩ wa kũhumbĩra ũũru ũrĩa wĩkĩirwo maitho-inĩ ma arĩa othe marĩ hamwe nawe; mbere ya andũ othe nĩwathirĩkio biũ.”
17Nake Iburahĩmu akĩhooya Ithe witũ, nake akĩhonia Abimeleku, na mũtumia wake, na ndungata ciake cia andũ-a-nja, nĩgeetha macooke gũciara ciana rĩngĩ, 18amu Ithe witũ nĩahingĩte biũ nda ciothe cia nyũmba ya Abimeleku nĩ ũndũ wa Sara mũtumia wa Iburahĩmu.