Gerar te Abraham
Abraham pora aru ekbar Sarah ke tar bhoini koise, aru Abimelech pora tai ke loi jai. Tai ke chubole age amar Pitri pora raja ke sapna te sabdhan kori dise, aru Abimelech pora nijor nirdosh ase koi kene koise. Abraham pora mani loise je tai khali eneka bhabise ita te kun bhi amar Pitri ke bhoi nokore.
20 1Abraham tu ta pora Negev phale jaise, aru Kadesh aru Shur laga majot te bohise, aru Gerar te ekjon bidekhi manuh nisena thakise. 2Abraham pora tar laga maiki Sarah laga kotha te koise, “Tai moi laga bhoini ase.” Etu karne Gerar laga raja Abimelech pora tai ke mati pathaise aru Sarah ke loi loise.
3Kintu hei rati te amar Pitri tu sopna te Abimelech logote ahhise, “Tumi loi luwa hei maiki laga karne tumi mora nisena ase, kilemane tai ekjon shadi kora maiki ase.”
4Abimelech tu tai usorte ja nai. Tai koise, “He Sorbo-Shaktiman Isor, Apuni ekta nirdosh desh ke bhi khotom kori dibo naki? 5Tai nijor pora moi ke kowa nai naki, ‘Tai moi laga bhoini ase’? Aru tai nijor bhi koise, ‘Tai moi laga bhai ase.’ Moi etu sapha mon aru nirdosh hath pora korise.”
6Tetiya amar Pitri tu sopna te tai ke koise, “Hoi, Moi jane tumi etu sapha mon pora korise, aru Moi tumi ke Moi laga birudh te paap kora pora rukhaise—etu karne Moi tumi ke tai ke chubole dia nai. 7Etiya hei manuh laga maiki ke wapas di dibi, kilemane tai ekjon bhabobadi ase jun pora tumi laga karne prathana koribo, aru tumi jinda thakibo. Jodi tumi tai ke wapas nadiye, tene tumi aru tumi laga sob manuh hosa pora moribo, etu jani lobi.”
8Abimelech tu hei phojur te joldi uthise, tar laga sob noukar khan ke matise, aru ki hoise etu sob tarkhan ke koise; aru manuh khan bisi bhoi khaise. 9Abimelech pora Abraham ke matise aru hudise, “Tumi amikhan ke ki korise? Moi tumi laga birudh te ki paap korise, je tumi moi aru moi laga rajyo uporte ekta dangor paap anise? Tumi moi logote kitia bhi koribo nalaga kaam korise.” 10Abimelech pora Abraham ke aru koise, “Tumi mon te ki bhabise, je tumi eneka kaam korise?”
11Abraham koise, “Moi bhabise: hosa pora yate amar Pitri laga bhoi nai, aru tarkhan moi laga maiki laga karne moi ke morai dibo.” 12Etu bade, tai hosa pora moi laga bhoini ase, moi laga baba laga suali kintu moi laga ama laga nohoi, aru tai moi laga maiki hoise.
13Jitia amar Pitri tu moi ke moi laga baba laga ghor pora idhar-udhar phuribole dise, tetiya moi tai ke koise: Moi ke etu morom dikhabi—amikhan jun jagate jabo, ta te moi laga kotha te kobi, “Tai moi laga bhai ase.”
14Abimelech pora mer, goru, aru mota aru maiki noukar khan loise, etu khan Abraham ke dise, aru tar laga maiki Sarah ke tai logote wapas kori dise. 15Abimelech koise, “Moi laga desh tumi karne khula ase; tumi kun jagate itcha ta te thakibi.” 16Aru tai Sarah ke koise, “Sabi, Moi tumi laga bhai ke 1,000 tukra chandi di ase. Etu tumi logote thaka sob manuh laga suku age te tumi uporte kora golti ke dhakibole ase; sob manuh age te tumi pura sapha ase.”
17Abraham tu amar Pitri logote prathana korise, aru Tai Abimelech, tar laga maiki, aru tar laga maiki noukar khan ke bhal kori dise, titia tarkhan aru bacha jonom dibo parise, 18kilemane amar Pitri tu Abraham laga maiki Sarah laga karne Abimelech laga ghor laga sob maiki laga pet ke pura bondh kori disele.