Haokaphok 20

20 ¹Abrahamna chiwui eina Negebshong tāmamāna, Kadesh eina Shurwui ngachaili pamhaoda Gerarli kha̱mina pama. ²Abrahamna apreiva̱ Sarahwui pongli, "A izarva̱na" da hānga. Chiwui vang Gerarwui awunga Abimelechna ali ahokhuida Sarahli khui.

³Kha ithumwui Avāna chithang ngayā mangshongli Abimelechli rāhānga: "Nana khuikahai sha̱naowui vang eina na kathi thāda leihaira, kaja a mi akhawui preiva̱na."

⁴Abimelechna ali nganaishun makāthuwa. Ana hānga, "Amei Vare, na khayon makhalei yur akhalila sashimānrakhala? ⁵Ana khalatta ili, 'A izarva̱na' da mahāngmala? Kala akhalattala, 'A ichināna' da hānga. Ina hi ningkathar wuklung kala khayon makhalei pāng eina sāhaira."

⁶Chieina ithumwui Avāna mangshongli ali hānga, "Mha, nana hi ningsākhangazip eina sāhaira kaji ina thei, kala ili iwui mangāli morei masā khavai ina nali kayonmihaina; chiwui vang eina ina nali ali masāza̱ ngasakmana. ⁷Ara mipā chiwui preiva̱li hanungulu, kaja a marān akhana, ana nawui vang seihā sāra, kala na ringra. Nana ali mahanungmiakha, na kala nawuina saikora kachangkhat thira kaji theilu."

⁸Abimelechna ngathorthak thuida, awui rao saikorali ahokhui, kala shokkahai saikora athumli unghānga; kala mibing chi khamā ngacheenāhaowa. ⁹Abimelechna Abrahamli hokhuida ngahāna, "Nana ithumli khi sāhaokhala? Ina nawui mangāli kathada morei sāhaokhala, nana iwui kala iwui wungramli morei kahakva rāza̱haira? Nana ili masā phalungra ot chi sāhaira." ¹⁰Abimelechna Abrahamli hānglui, "Nana khi phaninglaga hikathā ot chi sāhaokhala?"

¹¹Abrahamna hānga, "Kachangkhat hili ithumwui Avāli khangacheela maleimana, kala athumna ipreiva̱wui vang ili shaothatra da ina phaning kahaina." ¹²Chi hailaga, a kachangkhat izarva̱na, ivāwui naongalāva̱na, kha ishava̱wui maningmana; kala a ipreiva̱ ngasāhaira.

¹³Ithumwui Avāna ili ivāwui shimkhur eina kuimareida zatngasak tharan, ina ali hāngmi: Ili hi lukhamashan chitheimilu; ithum kachishong zatlala, iwui pongli, "A ichināna" da hānglu.

¹⁴Abimelechna yao, sei, kala raopa mayarnao kala raopava̱ khuida Abrahamli mi, kala apreiva̱ Sarahli ali hanunga. ¹⁵Abimelechna hānga, "Iwui ngalei nawui mangāli phonglāk eina lei; nana pamsang kachipamli pamlu." ¹⁶Kala Sarahli ana hānga, "Yanglu, ina nachināli lupā thing akha mihaira. Hi nala leiping saikorawui miktāli nali khayon kasā chi rommi khavaina; mi saikorawui mangāli na kachangkhat mashunghaira."

¹⁷Abrahamna ithumwui Avāli seihā sai, kala Ana Abimelech, apreiva̱, kala awui raopava̱bingli raimisera, chiwui vang athumna naola pharāluira, ¹⁸kaja ithumwui Avāna Abrahamwui preiva̱ Sarahwui vang eina Abimelechwui shimkhurli khalei naopam saikora shungmiserhaowa.