Abraham eng' Gerar
Ki guure kogeny Abraham Sarah chepkamennyi, ak koip Abimelek ineendet. Ki mwachi Kwandanyo laitoryat eng' karwotitoet kotomo konam ineendet, ak kong'alaal Abimelek agobo muguleldanyi ne tiliil. Ki yan Abraham kole ki pwaat kole ma mi chii yu ne iywei Kwandanyo.
Ng'alaali Kwandanyo eng' mustarisyek 3, 6–7
20 1Ki iu Abraham kong'etee olooto koba Negeb, ak ki meny kwenutap Kadesh ak Shur, ak ki meny ko uu toondet eng' Gerar. 2Ki le Abraham agobo Sarah, kwondonyi, “Ineendet ko chepkamennyu.” Ki iyook anyun Abimelek laitoryatap Gerar koip Sarah, ak ko nam ineendet.
3Ago ki nyoonji Kwandanyo Abimelek eng' karwotitoet eng' kemounooto, koleenji, “Keero, imee agobo chebyoset ne ki inam, amu ineendet ko kwony ne tinyei manong'otyot.”
4Ma ki neegit Abimelek ineendet. Kole, “Kiptaiyat Kamuktaindet, tos ing'emei pororyet ne ma tinyei tengek? 5Tos ma ki mwaiwo ineendet ineegei, ‘Ineendet ko chepkamennyu’? Ak ki le agine ineendet ineegei, ‘Ineendet ko tupchennyu.’ Kaayai niito eng' muguleldo ne tiliil ak eng' eunek che tiliileen.”
6Ki leenji anyun Kwandanyo ineendet eng' karwotitoet, “Ee, angen ile kiyai niito eng' muguleldo ne litit, ak ka ariip inyee si ma iyaiywo tengekto; nooto si ma agoonin itwaa ineendet. 7Weekyi anyun chii kwondonyi, amu ineendet ko maotyot ne saaei agobo inyee, si isap. Ngot ma iweekyi ineendet, ingen ile imee iman, inyee ak tugul che koguuk.”
8Ki ng'eet Abimelek karon miising', ko kuur otwogikyik tugul, ak komwachi icheek tugul che ki yaak; ak ki iyweis piik miising'. 9Ki kuur Abimelek Abraham, ak koleenji, “Nee ne kiyaiywech? Kayaanin ano tengekto, si iwoo tengekto ne oo eng' anee ak laitornatennyu? Kaiyaiywo tuguuk che ma nyolu keyai.” 10Ki leenji agine Abimelek Abraham, “Nee ne ki ibwaat, si iyai kiy ne uu niito?”
11Ki le Abraham, “Ki abwaat ale, iman ma mi iywetap Kwandanyo yu, ak kobara agobo kwondonyu.” 12Ak kogeny, iman ineendet ko chepkamennyu, cheptap kwandanyu ago ma cheptap kamennyu, ak koek kwondonyu.
13Ye ki igoochi Kwandanyo aombeni kong'etee kootap kwandanyu, ki aleenji ineendet: Iboorwo kindoi niito—ole kebendi tugul, ile agobo anee, “Ineendet ko tupchennyu.”
14Ki nam Abimelek keechiirek, ak tuuga, ak otwogik che murenik ak che chebyoso, ko goochi Abraham, ak ko weekyi Sarah kwondonyi. 15Ki le Abimelek, “Mi emennyu taing'ung'; imeny ole imache.” 16Ak ki leenji Sarah, “Keero, agoochini tupcheng'ung' shekelisyek tausin agenge che po sirineet. Niito ko ne tuchei yaityet ne ki kiyaiywok eng' konyegap tugul che mi kobooten; ak kagichililin eng' taitap tugul.”
17Ki sa Abraham Kwandanyo, ak kosoop Abimelek, ak kwondonyi, ak otwogikyik che chebyoso, si kobiit komanach kogeny, 18amu ki rat Kwandanyo moik tugul che po kootap Abimelek, agobo Sarah, kwondap Abraham.