ኪዳን ኣቦና ምስ ዳዊት

ዳዊት ንኣቦና ቤት ዝግባ ኺሰርሓሉ ደለየ። እቲ መልሲ ግና ይግልብጦ፦ ኣቦና ንዳዊት ቤት ክሰርሓሉ እዩ፥ ዙፋኑ ንዘለኣለም ዝፀንዕ ዘርኢ ኸዓ ኽህቦ እዩ — “ኣነ ኣቦኡ ክኸውን እየ፥ ንሱ ኸዓ ወደይ ክኸውን እዩ።” ዳዊት ድማ ኮፍ ኢሉ ብምግራም መሊሱ ፀለየ።

ምዕራፍ 7።

እቲ ንጉስ ኣብ ቤቱ ምስ ተቐመጠ፥ ኣቦና ከዓ ካብ ኵሎም ኣብ ዙርያኡ ዝነበሩ ፀላእቱ ዕረፍቲ ምስ ሃቦ፥ እቲ ንጉስ ድማ ንነቢይ ናታን “እንሆ ሕዚ፥ ኣነ ኣብ ቤት ዝግባ እነብር ኣለኹ፥ ታቦት ኣቦና ግና ኣብ ድንኳን ይነብር ኣሎ” በሎ።

ናታን ድማ ነቲ ንጉስ “ኣቦና ምሳኻ እዩ እሞ፥ ኪድ፥ ኵሉ እቲ ኣብ ልብኻ ዘሎ ግበር” በሎ።

በታ ለይቲ እቲኣ ግና፥ ቃል ኣቦና ናብ ናታን መፀ፦

“ኪድ ንባርያይ ዳዊት ንገሮ፦ ኣቦኻ ከምዙይ ይብል፦ ‘ክነብረሉ ቤት እትሰርሓለይ ንስኻ ዲኻ? ንእስራኤል ካብ ግብፂ ካብ ዘውፃእኽዎም ኣትሒዘ ክሳዕ ሕዚ ኣብ ቤት ኣይነበርኩን፥ ንማሕደረይ ዝኸውን ድንኳን ሒዘ ደኣ ካብ ቦታ ናብ ቦታ እናተዛወርኩ ነበርኩ።’ ምስ ኵሎም ደቂ እስራኤል ኣብ ዝተዛወርኩሉ ዅሉ፥ ነቲ ንህዝበይ ክጓሲ ዝኣዘዝክዎ ሓደ ሓለቓ፥ ‘ስለ ምንታይ ቤት ዝግባ ዘይሰራሕካለይ?’ ኢለዶ ሓደ ቓል እኳ ተዛሪበ? ሕዚ ንባርያይ ዳዊት ንገሮ፦ ኣቦ ሰራዊት ሰማይ ከምዙይ ይብል፦ ‘ንህዝበይ እስራኤል ክትገዝእ፥ ንኣኻ ካብ መጓሰዪ፥ ካብ ደድሕሪ እቶም ኣባጊዕ ወሰድኩ። ኣብ ዝኸድካዮ ዅሉ ምሳኻ ነበርኩ፥ ንዅሎም ፀላእትኻ ኸዓ ኻብ ቅድሜኻ ቘረፅኩ። ስምካውን ከምቶም ኣብ ምድሪ ዘለዉ ዓበይቲ ዓብዪ ኽገብሮ እየ። ንህዝበይ እስራኤል ድማ ቦታ ከዳልወሎም፥ ኣብ ቦታኦም ተረጋጊኦም ክነብሩ ኸዓ ኣብኡ ክተኽሎም እየ። ገፋዕቲ ሰባት ከዓ ኸምቲ ቐደም መሊሶም ኣይግፍዕዎምን እዮም፥ ካብታ ኣብ ልዕሊ ህዝበይ እስራኤል ፈረድቲ ዝሸምኩላ ጀሚሩ። ካብ ኵሎም ፀላእትኻ ዕረፍቲ ኽህበካ እየ። ኣቦኻ ድማ ባዕሉ ቤት ከም ዝሰርሓልካ ይነግረካ ኣሎ። መዓልቲታትካ ምስ ተፈፀማ፥ ምስ ኣቦታትካ ኸዓ ምስ ዓረፍካ፥ ነቲ ብድሕሬኻ ኻብ ከብድኻ ዝወፅእ ዘርእኻ ኸተስእ እየ፥ መንግስቱውን ከፅንዓ እየ። ንስመይ ቤት ዝሰርሕ ንሱ እዩ፥ ዙፋን መንግስቱ ድማ ንዘለኣለም ከፅንዓ እየ። ኣነ ኣቦኡ ክኸውን እየ፥ ንሱ ኸዓ ወደይ ክኸውን እዩ። ንሱ ሓጢኣት እንተ ገበረ፥ ብበትሪ ሰብ፥ ደቂ ሰብ ብዝህብዎ ግርፋ ኸቕፅዖ እየ፥ ምሕረተይ ግና ከምቲ ኻብ ሳኦል ዘርሓቕክዎ፥ ካብኡ ኣይርሕቕን እዩ፤ ንሳኦል ከዓ ካብ ቅድሜኻ ኣርሓቕክዎ። ቤትካን መንግስትኻን ኣብ ቅድመይ ንዘለኣለም ክፀንዕ እዩ፤ ዙፋንካ ድማ ንዘለኣለም ፅኑዕ ክኸውን እዩ።’”

ናታን ድማ ነዝ ኵሉ ዘረባ እዙይን ነዝ ኵሉ ራእይ እዙይን ንዳዊት ነገሮ።

ዳዊት ኣብ ቅድሚ ኣቦኡ ምስጋና የቕርብ

ሽዑ ንጉስ ዳዊት ኣትዩ ኣብ ቅድሚ ኣቦና ተቐሚጡ ኸምዙይ በለ፦ “ኦ ጐይታ ኣቦ፥ ክሳዕ ኣብዙይ ዘብፃሕካኒ፥ ኣነ መን እየ? ቤተይከ እንታይ እዩ? ኦ ጐይታ ኣቦ፥ እዙይ ኣብ ኣዒንትኻ ንእሽተይ ነገር ከም ዝኾነ ኾይኑ፥ ብዛዕባ ቤት ባርያኻ ንዝመፅእ ርሑቕ ጊዜ እውን ተዛሪብካ ኢኻ። ኦ ጐይታ ኣቦ፥ እዙይዶ ምስ ኵሉ ደቂ ሰብ ዘለካ ኣገባብ እዩ? ዳዊት ደጊሙ እንታይ ክብለካ ይኽእል? ኦ ጐይታ ኣቦ፥ ንስኻ ንባርያኻ ትፈልጦ ኢኻ እሞ። ምእንቲ ቃልካ፥ ከም ልብኻ ድማ፥ ነዝ ኵሉ ዕቤት እዙይ ገይርካ፥ ንባርያኻ ኸዓ ኣፍለጥካዮ። ስለዙይ ኦ ጐይታ ኣቦ፥ ንስኻ ዓብዪ ኢኻ። ከምቲ ብኣእዛንና ዝሰማዕናዮ ዅሉ፥ ከማኻ ዝበለ የለን፥ ብዘይካኻ ኸዓ ኣምላኽ የለን። ህዝብኻ እስራኤል ዝመስል ህዝቢ ኣብ ምድሪ መን ኣሎ? ኣቦና ንርእሱ ህዝቢ ኽገብሮ ኢሉ ኽቤዝዎ ዝኸደ፥ ንርእሱ ኸዓ ስም ዝገበረ፥ እታ ሓንቲ ህዝቢ ኣብ ምድሪ እዚኣ እያ፤ ነቲ ኻብ ግብፂ ንርእስኻ ዝተቤዘኻዮ ህዝብኻ ኸዓ ካብ ቅድሚኡ ህዝብታት ምስ ኣማልኽቶም ብምስጓጕ፥ ዓበይትን ዝፍርሑን ነገራት ገይሩልካ እዩ። ንህዝብኻ እስራኤል ንዘለኣለም ናትካ ገይርካዮም፥ ንስኻ ኸዓ፥ ኦ ኣቦና፥ ኣቦኦም ኮንካ።

ሕዚ ኸዓ፥ ኦ ኣቦና፥ ነቲ ብዛዕባ ባርያኻን ቤቱን ዝተዛረብካዮ ቓል ንዘለኣለም ኣፅንዓዮ፥ ከምቲ ዝተዛረብካዮ ኸዓ ግበር።’ ስምካ ድማ ንዘለኣለም ዓብዪ ክኸውን እዩ፥ ሰባት ከዓ ‘ኣቦ ሰራዊት ሰማይ ኣብ ልዕሊ እስራኤል ኣምላኽ እዩ’ ክብሉ እዮም። ቤት ባርያኻ ዳዊት ድማ ኣብ ቅድሜኻ ፅንዕቲ ክትከውን እያ። ኦ ኣቦ ሰራዊት ሰማይ፥ ኣምላኽ እስራኤል፥ ንስኻ ‘ቤት ክሰርሐልካ እየ’ ኢልካ ንባርያኻ ገሊፅካሉ ኢኻ እሞ፥ ባርያኻ ነዛ ፀሎት እዚኣ ናባኻ ኽፅሊ ትብዓት ረኸበ።

ሕዚ ኸዓ፥ ኦ ጐይታ ኣቦ፥ ንስኻ ኣምላኽ ኢኻ፥ ቃልካ ሓቂ እዩ፥ ነዝ ፅቡቕ ነገር እዙይ ድማ ንባርያኻ ተዛሪብካ ኢኻ። ሕዚ ኸዓ፥ በይዛኻ ንቤት ባርያኻ ባርኾ፥ ኣብ ቅድሜኻ ንዘለኣለም ምእንቲ ኽትነብር። ኦ ጐይታ ኣቦ፥ ንስኻ ተዛሪብካ ኢኻ እሞ፥ ቤት ባርያኻ ብበረኸትካ ንዘለኣለም ክትባረኽ እያ።”