2 ሳሙኤል 7

7 ¹ንጉሡ በቤቱ ከተቀመጠና አባታችን በዙሪያው ካሉ ጠላቶቹ ሁሉ ዕረፍት ከሰጠው በኋላ፣ ²ንጉሡ ነቢዩን ናታንን እንዲህ አለው፤ “እነሆ፣ እኔ በዝግባ ቤት እኖራለሁ፤ የአባታችን ታቦት ግን በድንኳን ውስጥ ይኖራል።”

³ናታንም ንጉሡን፣ “ሂድ፤ በልብህ ያለውን ሁሉ አድርግ፤ አባታችን ከአንተ ጋር ነውና” አለው።

⁴በዚያው ሌሊት ግን የአባታችን ቃል ወደ ናታን እንዲህ ሲል መጣ፤

⁵“ሂድና ባሪያዬን ዳዊትን እንዲህ በለው፤ አባትህ እንዲህ ይላል፤ ‘የምኖርበትን ቤት የምትሠራልኝ አንተ ነህን? ⁶እስራኤልን ከግብፅ ካወጣሁበት ቀን ጀምሮ እስከ ዛሬ ድረስ በቤት ውስጥ አልኖርሁም፤ ነገር ግን ድንኳኑን ማደሪያዬ አድርጌ ከስፍራ ወደ ስፍራ ስዘዋወር ኖርሁ።’ ⁷ከእስራኤል ሁሉ ጋር በተዘዋወርሁበት ስፍራ ሁሉ፣ ሕዝቤን እንዲጠብቅ ካዘዝሁት መሪዎች ለአንዱ፣ ‘ለምን የዝግባ ቤት አልሠራህልኝም?’ የሚል ቃል ተናግሬ አውቃለሁን? ⁸አሁንም ባሪያዬን ዳዊትን እንዲህ በለው፤ የሰማይ ሠራዊት አባት እንዲህ ይላል፤ ‘በሕዝቤ በእስራኤል ላይ ትገዛ ዘንድ ከግጦሽ፣ በጎችን ከመከተል አመጣሁህ። ⁹በሄድህበት ስፍራ ሁሉ ከአንተ ጋር ነበርሁ፤ ጠላቶችህንም ሁሉ ከፊትህ አጠፋሁ። ስምህንም በምድር ላይ እንዳሉት ታላላቆች ታላቅ አደርገዋለሁ። ¹⁰ለሕዝቤ ለእስራኤል ስፍራ አዘጋጃለሁ፤ በራሳቸው ስፍራ ሳይታወኩ ይኖሩ ዘንድ በዚያ እተክላቸዋለሁ። ጨካኞችም እንደ ቀድሞው ከእንግዲህ አያስጨንቋቸውም፤ ¹¹በሕዝቤ በእስራኤል ላይ መሳፍንትን ከሾምሁበት ዘመን ጀምሮ እንዳደረጉት ማለት ነው። ከጠላቶችህም ሁሉ ዕረፍት እሰጥሃለሁ። አባትህም እርሱ ራሱ ቤት እንደሚሠራልህ ይነግርሃል። ¹²ዘመንህ አልቆ ከአባቶችህ ጋር ባረፍህ ጊዜ፣ ከአንተ በኋላ ከገዛ ሰውነትህ የሚወጣውን ዘርህን አስነሣለሁ፤ መንግሥቱንም አጸናለሁ። ¹³እርሱ ለስሜ ቤት ይሠራል፤ እኔም የመንግሥቱን ዙፋን ለዘላለም አጸናለሁ። ¹⁴እኔ አባት እሆነዋለሁ፤ እርሱም ልጅ ይሆነኛል። በበደለ ጊዜ በሰው በትር፣ የሰው ልጆችም እጅ በሚመታው ምት እገሥጸዋለሁ፤ ¹⁵ነገር ግን ከፊትህ ካስወገድሁት ከሳኦል ምሕረቴን እንዳስወገድሁ፣ ከእርሱ ምሕረቴ አይለይም። ¹⁶ቤትህና መንግሥትህ በፊቴ ለዘላለም ጸንተው ይኖራሉ፤ ዙፋንህም ለዘላለም ይጸናል።’”

¹⁷ናታንም ይህን ቃል ሁሉና ይህን ራእይ በሙሉ ለዳዊት ነገረው።

ዳዊት በአባቱ ፊት ምስጋና አቀረበ

¹⁸ንጉሥ ዳዊትም ገብቶ በአባታችን ፊት ተቀመጠ፤ እንዲህም አለ፤ “ጌታ አባት ሆይ፣ እስከዚህ ድረስ እንድደርስ ያደረስኸኝ፣ እኔ ማን ነኝ? ቤቴስ ምንድን ነው? ¹⁹ጌታ አባት ሆይ፣ ይህ በዓይኖችህ እንደ ትንሽ ነገር ሆኖ ሳለ፣ ስለ ባሪያህ ቤት ስለ መጪው ሩቅ ዘመን ደግሞ ተናግረሃል። ጌታ አባት ሆይ፣ ይህ ከሰው ሁሉ ጋር ያለህ መንገድ ነውን? ²⁰ዳዊት ከዚህ በላይ ምን ሊልህ ይችላል? ጌታ አባት ሆይ፣ አንተ ባሪያህን ታውቃለህና። ²¹ስለ ቃልህና እንደ ገዛ ልብህ ፈቃድ ይህን ታላቅ ነገር ሁሉ አድርገሃል፤ ለባሪያህም አስታውቀኸዋል። ²²ስለዚህ ጌታ አባት ሆይ፣ አንተ ታላቅ ነህ። በገዛ ጆሮአችን እንደ ሰማነው ሁሉ፣ እንደ አንተ ያለ የለም፤ ከአንተም በቀር አምላክ የለም። ²³ለራሱም ስም ያገኝ ዘንድ አባታችን ለራሱ ሕዝብ አድርጎ ይቤዥ ዘንድ የወጣለት፣ በምድር ላይ ያለ ብቸኛው ሕዝብ እንደ ሕዝብህ እንደ እስራኤል ያለ ማን ነው? ከግብፅ ለራስህ ለቤዠኸው ለሕዝብህ ፊት፣ አሕዛብንና አማልክቶቻቸውን እያስወጣህ ታላቅና የሚያስፈራ ነገር አደረግህላቸው። ²⁴ሕዝብህን እስራኤልን ለዘላለም የራስህ አደረግህ፤ አንተም አባታችን ሆይ፣ አባታቸው ሆንህ።

²⁵አሁንም አባታችን ሆይ፣ ስለ ባሪያህና ስለ ቤቱ የተናገርኸውን ቃል ለዘላለም ጠብቅ፤ እንደ ተናገርኸውም አድርግ።’ ²⁶ስምህም ለዘላለም ታላቅ ይሆናል፤ ሰዎችም፣ ‘የሰማይ ሠራዊት አባት በእስራኤል ላይ አምላክ ነው’ ይላሉ። የባሪያህም የዳዊት ቤት በፊትህ ጸንቶ ይኖራል። ²⁷የሰማይ ሠራዊት አባት፣ የእስራኤል አምላክ ሆይ፣ አንተ ለባሪያህ፣ ‘ቤት እሠራልሃለሁ’ ብለህ ይህን ገልጠህለታልና። ስለዚህ ባሪያህ ይህን ጸሎት ወደ አንተ ለመጸለይ ድፍረት አገኘ።

²⁸አሁንም ጌታ አባት ሆይ፣ አንተ አምላክ ነህ፤ ቃላትህም እውነት ናቸው፤ ይህንም መልካም ነገር ለባሪያህ ተስፋ ሰጥተሃል። ²⁹አሁንም እባክህ የባሪያህን ቤት ባርክ፤ በፊትህም ለዘላለም ይኖር ዘንድ። ጌታ አባት ሆይ፣ አንተ ተናግረሃልና፤ በበረከትህም የባሪያህ ቤት ለዘላለም ይባረካል።”