2 ሳሙኤል 8

8 ¹ከዚህ በኋላ ዳዊት ፍልስጥኤማውያንን አሸንፎ አስገዛቸው፤ ሜቴግ-አማንም ከፍልስጥኤማውያን እጅ ወሰደ። ²ሞአብንም አሸነፈ። መሬት ላይ አስተኝቷቸው በገመድ ለካቸው፤ ሁለት የገመድ ርዝመት ለሞት፣ አንድ ሙሉ ርዝመት ለሕይወት። ስለዚህ ሞአባውያን የዳዊት አገልጋዮች ሆኑ፤ ግብርም አመጡ።

³የሶባ ንጉሥ የራኮብ ልጅ አዳድዔዘርን ደግሞ አሸነፈ፤ ይኸውም በኤፍራጥስ ወንዝ አካባቢ ግዛቱን ለማስመለስ በሄደ ጊዜ ነበር። ⁴ዳዊት ከእርሱ 1,700 ፈረሰኞችንና 20,000 እግረኛ ወታደሮችን ማረከ፤ ለመቶ ሠረገላ የሚበቁትን ትቶ የቀሩትን የሠረገላ ፈረሶች ሁሉ ጅማታቸውን ቈረጠ። ⁵የደማስቆ አራማውያን የሶባን ንጉሥ አዳድዔዘርን ሊረዱ በመጡ ጊዜ፣ ዳዊት 22,000 አራማውያንን ገደለ። ⁶ዳዊትም በደማስቆ አራም ጦር ሰፈሮችን አኖረ፤ አራማውያንም ግብር እያመጡ አገልጋዮቹ ሆኑ። ዳዊት በሄደበት ሁሉ አባታችን ድልን ሰጠው። ⁷ዳዊት የአዳድዔዘር አገልጋዮች የያዟቸውን የወርቅ ጋሻዎች ወስዶ ወደ ኢየሩሳሌም አመጣቸው። ⁸ንጉሥ ዳዊትም ከአዳድዔዘር ከተሞች ከቤጣና ከቤሮታይ እጅግ ብዙ ነሐስ ወሰደ።

⁹የሐማት ንጉሥ ቶዒ ዳዊት የአዳድዔዘርን ሰራዊት በሙሉ እንዳሸነፈ በሰማ ጊዜ፣ ¹⁰ልጁን ዮራምን ወደ ንጉሥ ዳዊት ላከ፤ ይኸውም ከቶዒ ጋር ይዋጋ የነበረውን አዳድዔዘርን ተዋግቶ ስላሸነፈ ሰላምታ እንዲያቀርብለትና እንኳን ደስ አለህ እንዲለው ነበር። ዮራምም የብር፣ የወርቅና የነሐስ ዕቃዎችን አመጣ። ¹¹ንጉሥ ዳዊትም እነዚህን ደግሞ ካስገዛቸው አሕዛብ ሁሉ ከወሰነው ብርና ወርቅ ጋር ለአባታችን ወሰነ፤ ¹²ይህም ከአራም፣ ከሞአብ፣ ከአሞናውያን፣ ከፍልስጥኤማውያን፣ ከአማሌቅና የሶባ ንጉሥ የራኮብ ልጅ ከአዳድዔዘር ምርኮ የተገኘ ነበር።

¹³ዳዊትም በጨው ሸለቆ 18,000 ኤዶማውያንን ገድሎ በተመለሰ ጊዜ ለራሱ ስም አተረፈ። ¹⁴በኤዶም ሁሉ ጦር ሰፈሮችን አኖረ፤ በኤዶም ሁሉ ጦር ሰፈሮችን አኖረ፤ ኤዶማውያንም ሁሉ የዳዊት አገልጋዮች ሆኑ። ዳዊት በሄደበት ሁሉ አባታችን ድልን ሰጠው።

የዳዊት ሹማምንት

¹⁵ዳዊትም በእስራኤል ሁሉ ላይ ነገሠ፤ ለሕዝቡም ሁሉ ፍትሕንና ጽድቅን ያደርግ ነበር። ¹⁶የጽሩያ ልጅ ኢዮአብ የሰራዊት አዛዥ ነበር፤ የአሑሉድ ልጅ ኢዮሣፍጥ ታሪክ ጸሐፊ ነበር፤ ¹⁷የአሂጦብ ልጅ ሳዶቅና የአብያታር ልጅ አቢሜሌክ ካህናት ነበሩ፤ ሠራያ የቤተ መንግሥት ጸሐፊ ነበር፤ ¹⁸የዮዳሄ ልጅ በናያስ ቀሬታውያንንና ፈሌታውያንን ያዝዝ ነበር፤ የዳዊትም ልጆች ካህናት ነበሩ። ^a a v18 የዳዊት ልጆች የሌዋውያን ካህናት አልነበሩም፤ እዚህ ላይ ቃሉ የንጉሡ ዋነኛ ሹማምትና በጎኑ የሚያገለግሉ የግል አገልጋዮች መሆናቸውን ያመለክታል።