2 ሳሙኤል 9

9 ¹ዳዊትም፣ “ስለ ዮናታን ስል ቸርነት የማሳየው ከሳኦል ቤተ ሰብ የቀረ ማንም አለን?” ብሎ ጠየቀ። ²በሳኦል ቤተ ሰብም ዚባ የተባለ አገልጋይ ነበረ፤ ወደ ዳዊትም ተጠራ። ንጉሡም፣ “ዚባ አንተ ነህን?” ብሎ ጠየቀ። እርሱም፣ “አገልጋይህ ይኸውልህ” ብሎ መለሰ።

³ንጉሡም፣ “የአባታችንን ቸርነት የማሳየው ከሳኦል ቤት የቀረ ማንም የለምን?” ብሎ ጠየቀ። ዚባም ንጉሡን፣ “ገና የዮናታን ልጅ አለ፤ በሁለቱም እግሮቹ አንካሳ ነው” ብሎ መለሰለት። ^a a v3 ዳዊት አባታችን የሚያሳየውን ያንኑ የኪዳን ቸርነት ለሜምፊቦስቴ ለማሳየት ይናፍቃል፤ ይህም አቅም በሌላቸውና በተገፉ ሰዎች ላይ የሚፈስ ያልተገባ ፍቅር ነው።

⁴ንጉሡም፣ “እርሱ የት ነው?” ብሎ ጠየቀ። ዚባም፣ “በሎዴባር፣ በአሚኤል ልጅ በማኪር ቤት ነው” ብሎ መለሰ።

⁵ንጉሥ ዳዊትም ልኮ ከሎዴባር ከአሚኤል ልጅ ከማኪር ቤት አስመጣው። ⁶የሳኦል ልጅ የዮናታን ልጅ ሜምፊቦስቴ ወደ ዳዊት በመጣ ጊዜ፣ በግንባሩ ተደፍቶ ሰገደ። ዳዊትም፣ “ሜምፊቦስቴ!” አለው። እርሱም፣ “አገልጋይህ ይኸውልህ” ብሎ መለሰ።

⁷ዳዊትም፣ “አትፍራ፤ ስለ አባትህ ስለ ዮናታን ስል ቸርነትን በእርግጥ አሳይሃለሁ። የአያትህን የሳኦልን መሬት ሁሉ እመልስልሃለሁ፤ አንተም ሁልጊዜ በገበታዬ ላይ ትበላለህ” አለው።

⁸ሜምፊቦስቴም ሰግዶ፣ “እንደ እኔ ያለውን የሞተ ውሻ ታስብ ዘንድ፣ አገልጋይህ ምንድር ነው?” አለ።

⁹ንጉሡም የሳኦልን አገልጋይ ዚባን ጠርቶ እንዲህ አለው፤ “የሳኦልና የቤተ ሰቡ ሁሉ የነበረውን ሁሉ ለጌታህ የልጅ ልጅ ሰጥቼዋለሁ። ¹⁰አንተና ልጆችህ፣ አገልጋዮችህም መሬቱን ለእርሱ አርሳችሁ ፍሬውን ታስገባላችሁ፤ ስለዚህ የጌታህ የልጅ ልጅ የሚበላው ምግብ ይኖረዋል። የጌታህ የልጅ ልጅ ሜምፊቦስቴ ግን ሁልጊዜ በገበታዬ ላይ ይበላል።” ዚባም ዐሥራ አምስት ልጆችና ሃያ አገልጋዮች ነበሩት።

¹¹ዚባም ንጉሡን፣ “ጌታዬ ንጉሡ ያዘዘውን ሁሉ አገልጋይህ ያደርጋል” አለው። ስለዚህ ሜምፊቦስቴ ከንጉሡ ልጆች እንደ አንዱ በዳዊት ገበታ ላይ በላ። ¹²ሜምፊቦስቴም ሚካ የተባለ ታናሽ ልጅ ነበረው፤ በዚባ ቤትም ያሉ ሁሉ ሜምፊቦስቴን ያገለግሉ ነበር። ¹³ሜምፊቦስቴ ሁልጊዜ በንጉሡ ገበታ ላይ ይበላ ስለ ነበር፣ በኢየሩሳሌም ኖረ፤ በሁለቱም እግሮቹም አንካሳ ነበር።