Dawid Kyerɛ Mefiboset Apam Adɔe

Dawid bisa sɛ obi wɔ Saul fie a ɔda so te ase anaa, na ɔnyɛ no yɛn Agya ayamye. Siba bɔ Mefiboset din, ɔbubuafoɔ a n'anan mmienu nyinaa adi dɛm, a ɔte Lo-Debar. Dawid de Saul asase san ma no, na ɔma ɔtena ɔhene didipon ho—na ɔfrɛ ne ho kraman funu.

Ti 9.

Dawid bisaa se, “Obi da so aka wɔ Saul abusua mu a mɛtumi akyerɛ no adɔe Yonatan nti anaa?” Saul fifo no wɔ akoa bi a wɔfrɛ no Siba, na wɔfrɛɛ no baa Dawid nkyɛn. Ɔhene no bisaa no se, “Wone Siba?” Obuae se, “Wʼakoa ni.”

Ɔhene no bisaa se, “Obiara nkaa Saul fi mu a mɛtumi akyerɛ no yɛn Agya adɔe anaa?” Siba buaa ɔhene no se, “Yonatan babarima bi da so wɔ hɔ; ne nan abien nyinaa bubu.” ^a

Ɔhene no bisaa se, “Ɛhe na ɔwɔ?” Siba buae se, “Ɔwɔ Amiel babarima Makir fi wɔ Lo-Debar.”

Enti Ɔhene Dawid somaa ma wɔkɔfaa no fii Amiel babarima Makir fi wɔ Lo-Debar de no bae. Bere a Saul nana Yonatan babarima Mefiboset baa Dawid nkyɛn no, ɔde nʼanim butuw fam kotowee. Dawid frɛɛ no se, “Mefiboset!” Obuae se, “Wʼakoa ni.”

Dawid ka kyerɛɛ no se, “Nsuro,” na ɔtoaa so se, “efisɛ ampa ara mɛkyerɛ wo adɔe wʼagya Yonatan nti. Mede wo nanabarima Saul nsase nyinaa bɛsan ama wo, na daa wobɛdidi wɔ me pon so.”

Mefiboset kotowee kae se, “Wʼakoa yɛ dɛn a wobɛhwɛ ɔkraman funu te sɛ me?”

Afei ɔhene no frɛɛ Saul akoa Siba ka kyerɛɛ no se, “Mede biribiara a na ɛyɛ Saul ne ne fifo nyinaa dea ama wo wura nana. Wo ne wo mmabarima ne wʼasomfo na ɛsɛ sɛ moyɛ asase no so adwuma ma no, na mutwa nnɔbae no de ba, sɛnea wo wura nana benya aduan adi. Nanso wo wura nana Mefiboset de, daa ɔbɛdidi wɔ me pon so.” Siba wɔ mmabarima dunum ne asomfo aduonu.

Siba ka kyerɛɛ ɔhene no se, “Biribiara a me wura ɔhene no hyɛ no, mɛyɛ.” Enti Mefiboset didii wɔ Dawid pon so sɛ ɔhene mmabarima no mu baako. Mefiboset wɔ babarima ketewa bi a wɔfrɛ no Mika, na wɔn a wɔwɔ Siba fi nyinaa somm Mefiboset. Mefiboset tenaa Yerusalem, efisɛ daa na ɔdidi wɔ ɔhene no pon so; na ne nan abien nyinaa bubu.