Alherin Alkawari na Dawuda ga Mefiboshet

Dawuda ya tambaya ko akwai wani da ya ragu na gidan Shawulu, don ya nuna masa alherin Ubanmu. Ziba ya ambaci Mefiboshet, gurgu a ƙafafu biyu, mazaunin Lo-debar. Dawuda ya mayar masa da ƙasar Shawulu ya zaunar da shi a teburin sarki — shi kuwa ya kira kansa mataccen kare.

Babi na 9.

Dawuda ya yi tambaya, “Akwai wani da ya ragu daga gidan Shawulu da zan iya nuna masa alheri saboda Yonatan?” A gidan Shawulu akwai wani bawa mai suna Ziba, aka kira shi wurin Dawuda. Sarki ya tambaya, “Kai ne Ziba?” Ya amsa ya ce, “Ni ne, bawanka.”

Sarki ya tambaya, “Babu wani da ya ragu daga gidan Shawulu da zan iya nuna masa alherin Ubanmu?” Ziba ya amsa wa sarki ya ce, “Har yanzu akwai wani ɗan Yonatan; ƙafafunsa biyu duk sun nakasa.” ^a

Sarki ya tambaya, “Ina yake?” Ziba ya amsa ya ce, “Yana a gidan Makir ɗan Ammiyel, a Lo-debar.”

Sai Sarki Dawuda ya aika aka kawo shi daga gidan Makir ɗan Ammiyel a Lo-debar. Da Mefiboshet ɗan Yonatan, ɗan Shawulu, ya zo wurin Dawuda, sai ya faɗi rubda ciki ya yi sujada. Dawuda ya ce, “Mefiboshet!” Ya amsa ya ce, “Ga bawanka.”

Dawuda ya ce masa, “Kada ka ji tsoro, gama lalle zan nuna maka alheri saboda mahaifinka Yonatan. Zan mayar maka da dukan ƙasar kakanka Shawulu, kullum kuma za ka riƙa ci a teburina.”

Mefiboshet ya yi sujada ya ce, “Mene ne bawanka, da za ka kula da wani mataccen kare kamar ni?”

Sa'an nan sarki ya kirawo Ziba, bawan Shawulu, ya ce, “Na ba wa jikan maigidanka duk abin da yake na Shawulu da dukan gidansa. Kai, da 'ya'yanka, da bayinka, za ku nome masa ƙasar ku kuma kawo girbin, domin jikan maigidanka yă sami abinci. Amma Mefiboshet, jikan maigidanka, kullum zai riƙa ci a teburina.” Ziba yana da 'ya'ya maza goma sha biyar da bayi ashirin.

Ziba ya ce wa sarki, “Zan yi duk abin da maigidana sarki ya umarce ni.” Saboda haka Mefiboshet ya riƙa ci a teburin Dawuda kamar ɗaya daga cikin 'ya'yan sarki. Mefiboshet yana da ƙaramin ɗa mai suna Mika, kuma dukan mazaunan gidan Ziba suna bauta wa Mefiboshet. Mefiboshet ya zauna a Urushalima, domin kullum yana ci a teburin sarki; shi kuwa gurgu ne a ƙafafunsa biyu.