Uba Ya Ba Dawuda Nasara

Taƙaitaccen bayanin yaƙe-yaƙen Dawuda — Filistiya, Mowab da aka auna da igiya, Zoba, Aram, Edom — da magana ɗaya da aka faɗa sau biyu: Ubanmu ya ba Dawuda nasara duk inda ya tafi. Aka keɓe ganimar, Dawuda ya yi mulki da adalci ga dukan mutanensa, aka kuma ambaci sunayen shugabanninsa.

Babi na 8.

Bayan wannan, Dawuda ya ci Filistiyawa da yaƙi ya kuma mallake su, ya ƙwace Meteg-amma daga hannun Filistiyawa. Ya kuma ci Mowab da yaƙi. Ya sa su kwanta a ƙasa ya auna su da igiya: tsawo biyu su mutu, cikakken tsawo ɗaya su rayu. Ta haka Mowabawa suka zama bayin Dawuda, suna kuma kawo haraji.

Dawuda ya kuma ci Hadadezer ɗan Rehob, sarkin Zoba, da yaƙi, sa'ad da ya tafi don yă maido da ikonsa a Kogin Yufiretis. Dawuda ya kame mahayan dawakai dubu ɗaya da ɗari bakwai daga gare shi, da sojojin ƙasa dubu ashirin, ya kuma yanke jijiyoyin dukan dawakan karusai, sai dai ya bar isashe domin karusai ɗari. Da Arameyawan Dimashƙu suka zo don su taimaki Hadadezer sarkin Zoba, sai Dawuda ya kashe Arameyawa dubu ashirin da biyu. Dawuda ya kafa rundunonin soja a Aram ta Dimashƙu, Arameyawa kuma suka zama bayinsa, suna kawo haraji. Ubanmu ya ba Dawuda nasara duk inda ya tafi. Dawuda ya ɗauki garkuwoyin zinariya da suke na bayin Hadadezer, ya kawo su Urushalima. Sarki Dawuda kuma ya ɗauki tagulla mai yawa ƙwarai daga Beta da Berotai, biranen Hadadezer.

Da Toyi sarkin Hamat ya ji cewa Dawuda ya ci dukan sojojin Hadadezer da yaƙi, sai ya aiki ɗansa Yoram wurin Sarki Dawuda don yă gaishe shi yă kuma yi masa barka saboda yă yi yaƙi ya ci Hadadezer, wanda dā yake yaƙi da Toyi. Yoram ya kawo kayan azurfa, da zinariya, da tagulla. Waɗannan ma Sarki Dawuda ya keɓe wa Ubanmu, tare da azurfa da zinariyar da ya keɓe daga dukan al'umman da ya mallaka, daga Aram, da Mowab, da Ammonawa, da Filistiyawa, da Amalek, da ganimar Hadadezer ɗan Rehob, sarkin Zoba.

Dawuda ya yi wa kansa suna sa'ad da ya dawo daga kashe Edomawa dubu goma sha takwas a Kwarin Gishiri. Ya kafa rundunonin soja ko'ina a Edom — a dukan Edom ya kafa rundunoni — dukan Edomawa kuma suka zama bayin Dawuda. Ubanmu ya ba Dawuda nasara duk inda ya tafi.

Hafsoshin Dawuda

Ta haka Dawuda ya yi mulki a kan dukan Isra'ila, yana yin shari'a da adalci ga dukan mutanensa. Yowab ɗan Zeruya shi ne shugaban soja; Yehoshafat ɗan Ahilud shi ne mai rubuta tarihin fada; Zadok ɗan Ahitub da Ahimelek ɗan Abiyatar su ne firistoci; Seraya shi ne magatakardan fada; Benaya ɗan Yehoyada shi ne shugaban Keretawa da Peletawa; 'ya'yan Dawuda kuma su ne firistoci. ^a