ኣቦ ንዳዊት ዓወት ይህቦ

ጥርናፈ ውግኣት ዳዊት እዩ — ፍልስጥኤም፥ ብገመድ ዝተዓቀነ ሞኣብ፥ ሱባ፥ ሶርያ፥ ኤዶም — ሓደ ዘረባ ኸዓ ክልተ ጊዜ ተደጊሙ፦ ኣቦና ንዳዊት ናብ ዝኸዶ ዘበለ ዅሉ ዓወት ሃቦ። እቲ ምርኮ ይቕደስ፥ ዳዊት ንብዘሎ ህዝቡ ብፍትሒ ይገዝእ፥ ሹመኛታቱ ኸዓ ተሰምዮም።

ምዕራፍ 8።

ድሕሪዙይ ዳዊት ንፍልስጥኤማውያን ስዒሩ ኣዋረዶም፤ ንሜቴግ ኣማ ኸዓ ካብ ፍልስጥኤማውያን ወሰደ። ንሞኣብውን ሰዓሮም። ኣብ ምድሪ ኣደቂስዎም ድማ ብገመድ ዓቀኖም፤ ክልተ ገመድ ንሞት፥ ሓደ ምሉእ ገመድ ድማ ንህይወት ፈለየ። ስለዙይ ሞኣብ ባሮት ዳዊት ኮኑ፤ ግብሪ ኸዓ ኣምፅኡ።

ዳዊት ድማ ንኣድርኣዛር ወዲ ረሆብ፥ ንጉስ ሱባ፥ ኣብ ሩባ ኤፍራጥስ ግዝኣቱ ኽመልስ ክኸይድ እንተሎ ሰዓሮ። ዳዊት ድማ ካብኡ ሽሕን ሸውዓተ ሚእትን ፈረሰኛታትን ዕስራ ሽሕ ኣጋር ተዋጋእትን ማረኸ፤ ቋንጃ ኵሎም ኣፍራስ ሰረገላ ድማ በተኸ፤ ንሚእቲ ሰረገላ ዝኸውን ግና ኣትረፈ። ሶርያውያን ደማስቆ ንኣድርኣዛር ንጉስ ሱባ ክረድኡ ምስ መፁ፥ ዳዊት ካብ ሶርያውያን ዕስራን ክልተን ሽሕ ሰባት ቀተለ። ዳዊት ድማ ኣብ ሶርያ ደማስቆ ሰፈር ወተሃደራት ኣንበረ፤ ሶርያውያን ከዓ ባሮቱ ኮኑ፤ ግብሪ ኸዓ ኣምፅኡ። ኣቦና ድማ ዳዊት ናብ ዝኸዶ ዘበለ ኵሉ ዓወት ሃቦ። ዳዊት ድማ ነቶም ናይ ኣገልገልቲ ኣድርኣዛር ዝነበሩ ዋልታታት ወርቂ ወሲዱ ናብ ኢየሩሳሌም ኣምፅኦም። ካብ ቤታሕን ካብ ቤሮታይን ድማ፥ ከተማታት ኣድርኣዛር፥ ንጉስ ዳዊት የመና ብዙሕ ነሃስ ወሰደ።

ቶዒ ንጉስ ሓማት፥ ዳዊት ንብምሉኡ ሰራዊት ኣድርኣዛር ከም ዝሰዓሮ ምስ ሰምዐ፥ ንወዱ ንኢዮራም ናብ ንጉስ ዳዊት ሰደዶ፤ ንኣድርኣዛር ተዋጊኡ ስለ ዝሰዓሮ፥ ሰላም ክብሎ ድማ ክምርቖ ኢሉ። ኣድርኣዛር ከዓ ምስ ቶዒ ውግእ ዝነበሮ እዩ። ኢዮራም ድማ ኣቕሑ ብሩርን ወርቅን ነሃስን ኣምፅአ። ንጉስ ዳዊት ድማ ነዚኣቶም ከዓ ምስቲ ኻብ ኵሎም እቶም ዘዋረዶም ኣህዛብ ዝቐደሶ ብሩርን ወርቅን ሓቢሩ ንኣቦና ቐደሶም። ካብ ሶርያን ካብ ሞኣብን ካብ ደቂ ኣሞንን ካብ ፍልስጥኤማውያንን ካብ ኣማሌቅን፥ ካብ ምርኮ ኣድርኣዛር ወዲ ረሆብ ንጉስ ሱባን።

ዳዊት ድማ ኣብ ለሰ ጨው ዓሰርተ ሸሞንተ ሽሕ ኤዶማውያን ቀቲሉ ክምለስ እንተሎ ንርእሱ ስም ኣጥረየ። ኣብ ኵላ ኤዶም ድማ ሰፈር ወተሃደራት ኣንበረ፤ ኣብ ብምሉኡ ኤዶም ሰፈር ወተሃደራት ኣንበረ፤ ኵሎም ኤዶማውያን ከዓ ባሮት ዳዊት ኮኑ። ኣቦና ድማ ዳዊት ናብ ዝኸዶ ዘበለ ኵሉ ዓወት ሃቦ።

ኣሕሉቕ ዳዊት

ከምዙይ ዳዊት ኣብ ብምሉኡ እስራኤል ነገሰ፤ ንብምሉኡ ህዝቡ ፍትሕን ፅድቅን ገበረሎም። ኢዮኣብ ወዲ ፅሩያ ነቲ ሰራዊት ይእዝዝ ነበረ፤ ኢዮሳፍጥ ወዲ ኣሒሉድ ድማ ተሓዚ መዝገብ ነበረ፤ ሳዶቅ ወዲ ኣኪጡብን ኣቢሜሌክ ወዲ ኣብያታርን ካህናት ነበሩ፤ ሰራያስ ከዓ ፀሓፊ ነበረ፤ በናያስ ወዲ ዮዳሄ ሓለቓ ክረታውያንን ጵለታውያንን ነበረ፤ ደቂ ዳዊት ከዓ ካህናት ነበሩ። ^a