Kĩrĩĩkanĩro kĩa Ithe witũ na Daudi

Daudi nĩeendaga gwakĩra Ithe witũ nyũmba ya mĩtarakwa. Icookio rĩkagarũra ũhoro ũcio: Ithe witũ nĩwe ũgaakĩra Daudi nyũmba, rũciaro rũrĩa gĩtĩ gĩake kĩa ũthamaki gĩgatũũra tene na tene — Niĩ nĩngatuĩka Ithe wake, nake atuĩke mũrũ wakwa. Daudi agaikara thĩ, akamũcookeria ũhoro ũcio na ihooya akĩgegete.

Gĩcunjĩ 7.

Rĩrĩa mũthamaki aikarĩte wega nyũmba yake, na Ithe witũ aamũheete ũhurũko kuuma kũrĩ thũ ciake ciothe iria ciamũthiũrũrũkĩirie, mũthamaki akĩĩra Nathani ũrĩa mũnabii atĩrĩ, “Ta rora rĩu, niĩ ndũũraga nyũmba ya mĩtarakwa, no ithandũkũ rĩa Ithe witũ rĩikaraga hema.”

Nathani akĩĩra mũthamaki atĩrĩ, “Thiĩ, wĩke ũrĩa wothe ũrĩ ngoroinĩ yaku, nĩgũkorwo Ithe witũ arĩ hamwe nawe.”

No ũtukũ o ũcio kiugo kĩa Ithe witũ gĩgĩkinyĩra Nathani, atĩrĩ:

“Thiĩ wĩre ndungata yakwa Daudi atĩrĩ: Ũũ nĩguo Ithe waku ekuuga: ‘Wee nĩwe ũngĩnjakĩra nyũmba ya gũtũũra? Ndirĩ ndatũũra nyũmba kuuma rĩrĩa ndaarutire Isiraeli kuuma bũrũri wa Misiri nginya rĩu, no ndũũrĩte ngĩthaamaga kuuma handũ nginya handũ ndĩ na hema ĩrĩ gĩikaro kĩakwa.’ Kũrĩa guothe ndathiiaga hamwe na Isiraeli othe, hihi nĩ kũrĩ mũtongoria o na ũmwe ũrĩa ndaathire arĩĩthie andũ akwa ndeerire atĩrĩ, ‘Nĩkĩĩ ũtanjakĩire nyũmba ya mĩtarakwa?’ Rĩu wĩre ndungata yakwa Daudi atĩrĩ: Ũũ nĩguo Ithe wa mbũtũ cia ita cia igũrũ ekuuga: ‘Ndaakuoire kuuma ũrĩithioinĩ, kuuma kũrũmĩrĩra rũũru rwa ng'ondu, nĩguo wathe andũ akwa a Isiraeli. Ndaarĩ hamwe nawe kũrĩa guothe wathiiaga, na ngĩniina thũ ciaku ciothe mbere yaku. Nĩngatũma rĩĩtwa rĩaku rĩgĩe inene, ta rĩĩtwa rĩa andũ arĩa anene mũno gũkũ thĩ. Nĩngaheaana handũ nĩ ũndũ wa andũ akwa a Isiraeli na ndĩmahaande hau nĩguo matũũre matarĩ na thĩĩna handũ hao ene. Andũ a ũhinya matigacooka kũmahinyĩrĩria ta ũrĩa kwarĩ mbere, kuuma rĩrĩa ndaigire atuĩri a ciira igũrũ rĩa andũ akwa a Isiraeli. Nĩngakũhe ũhurũko kuuma kũrĩ thũ ciaku ciothe. Ningĩ Ithe waku nĩakwĩraga atĩ we mwene nĩagagwakĩra nyũmba. Rĩrĩa matukũ maku magaathira na ũkoma hamwe na maithe maku, nĩngarahũra rũciaro rwaku thutha waku, ũrĩa ũkoima mwĩrĩinĩ waku mwene, na nĩngahaanda ũthamaki wake. Nĩakanjakĩra nyũmba nĩ ũndũ wa rĩĩtwa rĩakwa, na nĩngahaanda gĩtĩ kĩa ũnene kĩa ũthamaki wake nginya tene. Niĩ nĩngatuĩka Ithe wake, nake atuĩke mũrũ wakwa. Rĩrĩa ekehia, nĩngamũherithia na rũthanju rwa andũ, na mahũũra ma moko ma andũ, no wendo wakwa wa kĩrĩĩkanĩro ndũkamweherera, ta ũrĩa ndaawehereirie Saũlũ, ũrĩa ndeeheririe mbere yaku. Nyũmba yaku na ũthamaki waku nĩigatũũra nginya tene mbere yakwa; gĩtĩ gĩaku kĩa ũnene nĩgĩkahaandwo kĩrũme nginya tene.’”

Nathani akĩĩra Daudi ciugo icio ciothe na kĩoneki kĩu gĩothe.

Daudi Acookia Ngaatho Mbere ya Ithe wake

Hĩndĩ ĩyo mũthamaki Daudi agĩtoonya agĩikara thĩ mbere ya Ithe witũ, akiuga atĩrĩ: “Niĩ nĩ niĩ ũ, Mwathani Ithe witũ, nayo nyũmba yakwa nĩ kĩĩ, atĩ nĩũndeheete nginya haha? Ta atĩrĩ ũndũ ũyũ warĩ mũnini maithoinĩ maku, Mwathani Ithe witũ, nĩwaarĩtie o na ũhoro wa nyũmba ya ndungata yaku nĩ ũndũ wa matukũ marĩa magooka maingĩ. Ĩĩ ũyũ nĩguo mũtugo waku kũrĩ andũ othe, Mwathani Ithe witũ? Daudi angĩkwĩra atĩa makĩria? Nĩgũkorwo wee nĩũĩ ndungata yaku, wee Mwathani Ithe witũ. Nĩ ũndũ wa kiugo kĩaku na kũringana na ngoro yaku we mwene, nĩwĩkĩte ũnene ũyũ wothe, ũkĩũmenyithia ndungata yaku. Nĩ ũndũ ũcio wee ũrĩ mũnene, Mwathani Ithe witũ. Gũtirĩ ũngĩ ũhaanaine nawe, na gũtirĩ Ngai ũngĩ tiga wee, kũringana na ũrĩa twĩ twiguĩte na matũ maitũ. Nĩ rũrĩrĩ rũrĩkũ rũhaanaine na andũ aku a Isiraeli, rũrĩrĩ rũu rũmwe gũkũ thĩ rũrĩa Ithe witũ aathiire gũkũũra rũtuĩke andũ ake we mwene, akĩĩgĩĩra rĩĩtwa, agĩgwĩkĩra maũndũ manene na ma kũmakania—akĩingata ndũrĩrĩ na ngai ciacio mbere ya andũ aku, arĩa wekũũrĩire wee mwene kuuma Misiri? Wee nĩwatũmire andũ aku a Isiraeli matuĩke aku we mwene nginya tene, nawe, Ithe witũ, ũgĩtuĩka Ithe wao.

Na rĩu, Ithe witũ, tũũria nginya tene kiugo kĩrĩa waarĩtie igũrũ rĩa ndungata yaku na nyũmba yake, na wĩke o ta ũrĩa weranĩire.’ Narĩo rĩĩtwa rĩaku nĩrĩkagĩa inene nginya tene, nao andũ nĩmakoiga atĩrĩ, ‘Ithe wa mbũtũ cia ita cia igũrũ nĩ we Ngai wa Isiraeli.’ Nayo nyũmba ya ndungata yaku Daudi nĩĩkehaanda ĩrũme mbere yaku. Nĩgũkorwo wee, Ithe wa mbũtũ cia ita cia igũrũ, Ngai wa Isiraeli, nĩwaguũrĩirie ndungata yaku ũndũ ũyũ atĩrĩ: ‘Nĩngagwakĩra nyũmba.’ Nĩ ũndũ ũcio ndungata yaku nĩyonire ũmĩrĩru wa gũkũhooya mahooya maya.

Na rĩu, Mwathani Ithe witũ, wee nĩwe Ngai, nacio ciugo ciaku nĩ cia ma, na nĩweranĩire ũndũ ũyũ mwega kũrĩ ndungata yaku. Nĩ ũndũ ũcio rĩu, ndagũthaitha rathima nyũmba ya ndungata yaku, nĩguo ĩtũũre nginya tene mbere yaku. Nĩgũkorwo wee, Mwathani Ithe witũ, nĩwaarĩtie, na nĩ ũndũ wa kĩrathimo kĩaku nyũmba ya ndungata yaku nĩĩkaraathimwo nginya tene.”