ଦାଉଦଙ୍କ ସହିତ ପିତାଙ୍କ ନିୟମ

ଦାଉଦ ଆମ୍ଭମାନଙ୍କ ପିତାଙ୍କ ନିମନ୍ତେ ଏରସ କାଠର ଏକ ଗୃହ ନିର୍ମାଣ କରିବାକୁ ଚାହାଁନ୍ତି। ଉତ୍ତରଟି ତାହା ଓଲଟାଇ ଦିଏ: ଆମ୍ଭମାନଙ୍କ ପିତା ଦାଉଦଙ୍କ ନିମନ୍ତେ ଏକ ଗୃହ ନିର୍ମାଣ କରିବେ, ଏକ ବଂଶଧର ଯାହାର ସିଂହାସନ ସଦାକାଳ ସ୍ଥିର ରହିବ — ମୁଁ ତାହାର ପିତା ହେବି ଓ ସେ ମୋହର ପୁତ୍ର ହେବ। ଦାଉଦ ବସି ବିସ୍ମୟରେ ତାହା ପ୍ରାର୍ଥନାରେ ଫେରାଇ କୁହନ୍ତି।

ଅଧ୍ୟାୟ 7।

ଯେତେବେଳେ ରାଜା ଆପଣା ଗୃହରେ ବାସ କରିବାକୁ ଲାଗିଲେ ଓ ଆମ୍ଭମାନଙ୍କ ପିତା ତାହାଙ୍କ ଚତୁର୍ଦ୍ଦିଗସ୍ଥ ସମସ୍ତ ଶତ୍ରୁଠାରୁ ତାହାଙ୍କୁ ବିଶ୍ରାମ ଦେଲେ, ସେତେବେଳେ ରାଜା ନାଥନ ଭବିଷ୍ୟଦ୍‍ବକ୍ତାଙ୍କୁ କହିଲେ, “ଏବେ ଦେଖ, ମୁଁ ତ ଏରସକାଠର ଗୃହରେ ବାସ କରୁଅଛି, ମାତ୍ର ଆମ୍ଭମାନଙ୍କ ପିତାଙ୍କ ସିନ୍ଦୁକ ତମ୍ବୁ ମଧ୍ୟରେ ରହୁଅଛି।”

ତହିଁରେ ନାଥନ ରାଜାଙ୍କୁ କହିଲେ, “ଯାଅ, ଆପଣା ମନରେ ଯାହା ଅଛି, ସେସବୁ କର, କାରଣ ଆମ୍ଭମାନଙ୍କ ପିତା ତୁମ୍ଭ ସଙ୍ଗରେ ଅଛନ୍ତି।”

ମାତ୍ର ସେହି ରାତ୍ରିରେ ଆମ୍ଭମାନଙ୍କ ପିତାଙ୍କ ବାକ୍ୟ ନାଥନଙ୍କ ନିକଟରେ ଉପସ୍ଥିତ ହୋଇ କହିଲା,

“ଯାଇ ଆମ୍ଭର ଦାସ ଦାଉଦକୁ କୁହ, ତୁମ୍ଭର ପିତା ଏହା କହନ୍ତି, ‘ଆମ୍ଭର ବାସ ନିମନ୍ତେ ଆମ୍ଭ ପାଇଁ ଗୃହ ନିର୍ମାଣ କରିବାକୁ ତୁମ୍ଭେ କି? ଆମ୍ଭେ ଇସ୍ରାଏଲକୁ ମିସରରୁ ବାହାର କରି ଆଣିବା ଦିନଠାରୁ ଆଜି ପର୍ଯ୍ୟନ୍ତ କୌଣସି ଗୃହରେ ବାସ କରି ନାହୁଁ, ମାତ୍ର ତମ୍ବୁକୁ ଆପଣା ବାସସ୍ଥାନ କରି ସ୍ଥାନରୁ ସ୍ଥାନକୁ ଗମନ କରିଅଛୁ।’ ଆମ୍ଭେ ସମସ୍ତ ଇସ୍ରାଏଲ ସଙ୍ଗରେ ଯେଉଁ ଯେଉଁ ସ୍ଥାନକୁ ଗମନ କଲୁ, ସେଠାରେ ଆମ୍ଭର ଲୋକମାନଙ୍କୁ ପ୍ରତିପାଳନ କରିବା ନିମନ୍ତେ ଆଜ୍ଞା ଦେଇଥିବା କୌଣସି ଅଧ୍ୟକ୍ଷଙ୍କୁ କି ‘ତୁମ୍ଭେମାନେ ଆମ୍ଭ ପାଇଁ ଏରସକାଠର ଗୃହ କାହିଁକି ନିର୍ମାଣ କରି ନାହଁ?’ ବୋଲି ଆମ୍ଭେ କେବେ ଗୋଟିଏ ବାକ୍ୟ କହିଥିଲୁ? ଏଣୁ ତୁମ୍ଭେ ଆମ୍ଭର ଦାସ ଦାଉଦକୁ କୁହ, ସ୍ୱର୍ଗସ୍ଥ ସୈନ୍ୟବାହିନୀର ପିତା ଏହା କହନ୍ତି, ‘ଆମ୍ଭର ଲୋକ ଇସ୍ରାଏଲ ଉପରେ ଶାସନ କରିବା ନିମନ୍ତେ ଆମ୍ଭେ ତୁମ୍ଭକୁ ଚରାସ୍ଥାନରୁ, ମେଷପଲ ପଛରେ ଯିବାରୁ ଆଣିଲୁ। ପୁଣି ତୁମ୍ଭେ ଯେଉଁ ଯେଉଁ ସ୍ଥାନକୁ ଗଲ, ସେଠାରେ ଆମ୍ଭେ ତୁମ୍ଭ ସଙ୍ଗରେ ଥିଲୁ ଓ ତୁମ୍ଭ ସମ୍ମୁଖରୁ ତୁମ୍ଭର ସମସ୍ତ ଶତ୍ରୁଙ୍କୁ ଉଚ୍ଛିନ୍ନ କଲୁ। ଆମ୍ଭେ ତୁମ୍ଭର ନାମ ପୃଥିବୀସ୍ଥ ମହାନମାନଙ୍କ ନାମ ତୁଲ୍ୟ ମହତ୍ କରିବା। ଆମ୍ଭେ ଆପଣା ଲୋକ ଇସ୍ରାଏଲ ନିମନ୍ତେ ଗୋଟିଏ ସ୍ଥାନ ନିରୂପଣ କରିବା ଓ ସେମାନେ ଯେପରି ଆପଣା ନିଜ ସ୍ଥାନରେ ବାସ କରି ଆଉ ଅସ୍ଥିର ନ ହେବେ, ଏଥିପାଇଁ ସେମାନଙ୍କୁ ସେଠାରେ ରୋପଣ କରିବା। ଅଧର୍ମର ସନ୍ତାନମାନେ ଆଗ ପରି ସେମାନଙ୍କୁ ଆଉ କ୍ଲେଶ ଦେବେ ନାହିଁ, ଯେଉଁ ଦିନଠାରୁ ଆମ୍ଭେ ଆପଣା ଲୋକ ଇସ୍ରାଏଲ ଉପରେ ବିଚାରକର୍ତ୍ତାମାନଙ୍କୁ ନିଯୁକ୍ତ କଲୁ, ସେହି ଦିନ ପରି ଆଉ କ୍ଲେଶ ଦେବେ ନାହିଁ। ଆମ୍ଭେ ତୁମ୍ଭର ସମସ୍ତ ଶତ୍ରୁଠାରୁ ତୁମ୍ଭକୁ ବିଶ୍ରାମ ଦେବା। ଆହୁରି ତୁମ୍ଭର ପିତା ତୁମ୍ଭ ପ୍ରତି ଏହା ପ୍ରକାଶ କରୁଅଛନ୍ତି ଯେ, ସେ ଆପେ ତୁମ୍ଭ ପାଇଁ ଗୋଟିଏ ଗୃହ ନିର୍ମାଣ କରିବେ। ତୁମ୍ଭର ଦିନ ସମ୍ପୂର୍ଣ୍ଣ ହେଲେ ଓ ତୁମ୍ଭେ ଆପଣା ପିତୃପୁରୁଷଙ୍କ ସହିତ ବିଶ୍ରାମ କଲେ, ତୁମ୍ଭ ଉତ୍ତାରେ ତୁମ୍ଭ ନିଜ ଶରୀରରୁ ଉତ୍ପନ୍ନ ତୁମ୍ଭର ବଂଶଜକୁ ଆମ୍ଭେ ଉତ୍ପନ୍ନ କରିବା ଓ ତାହାର ରାଜ୍ୟ ସ୍ଥିର କରିବା। ସେ ଆମ୍ଭ ନାମ ନିମନ୍ତେ ଗୋଟିଏ ଗୃହ ନିର୍ମାଣ କରିବ ଓ ଆମ୍ଭେ ତାହାର ରାଜ୍ୟର ସିଂହାସନ ଅନନ୍ତକାଳ ପର୍ଯ୍ୟନ୍ତ ସ୍ଥିର କରିବା। ଆମ୍ଭେ ତାହାର ପିତା ହେବା ଓ ସେ ଆମ୍ଭର ପୁତ୍ର ହେବ। ସେ ଅଧର୍ମ କଲେ, ଆମ୍ଭେ ମନୁଷ୍ୟର ବାଡ଼ି ଦ୍ୱାରା ଓ ମନୁଷ୍ୟସନ୍ତାନମାନଙ୍କର ପ୍ରହାର ଦ୍ୱାରା ତାହାକୁ ଶାସନ କରିବା, ମାତ୍ର ଆମ୍ଭର ଦୟା ତାହାଠାରୁ ଦୂର ହେବ ନାହିଁ, ଯେପରି ଆମ୍ଭେ ତୁମ୍ଭ ସମ୍ମୁଖରୁ ଯାହାଙ୍କୁ ଦୂର କଲୁ, ସେହି ଶାଉଲଠାରୁ ତାହା ଦୂର କରିଥିଲୁ। ଆମ୍ଭ ସମ୍ମୁଖରେ ତୁମ୍ଭର ଗୃହ ଓ ତୁମ୍ଭର ରାଜ୍ୟ ଅନନ୍ତକାଳ ପର୍ଯ୍ୟନ୍ତ ସ୍ଥାୟୀ ହେବ; ତୁମ୍ଭର ସିଂହାସନ ଅନନ୍ତକାଳ ପର୍ଯ୍ୟନ୍ତ ସ୍ଥିର ହୋଇ ରହିବ।’”

ଏହିସବୁ ବାକ୍ୟ ଓ ଏହି ସମସ୍ତ ଦର୍ଶନ ଅନୁସାରେ ନାଥନ ଦାଉଦଙ୍କୁ ଜଣାଇଲେ।

ଦାଉଦ ଆପଣା ପିତାଙ୍କ ଛାମୁରେ ଧନ୍ୟବାଦ ଦିଅନ୍ତି

ତେବେ ଦାଉଦ ରାଜା ଭିତରକୁ ଯାଇ ଆମ୍ଭମାନଙ୍କ ପିତାଙ୍କ ଛାମୁରେ ବସି କହିଲେ, “ହେ ସାର୍ବଭୌମ ପିତା, ଆପଣ ଯେ ମୋତେ ଏତେ ଦୂର ପର୍ଯ୍ୟନ୍ତ ଆଣିଅଛନ୍ତି, ଏଥିପାଇଁ ମୁଁ କିଏ ଓ ମୋହର ଗୃହ ବା କଅଣ? ହେ ସାର୍ବଭୌମ ପିତା, ଏହା ଆପଣଙ୍କ ଦୃଷ୍ଟିରେ କ୍ଷୁଦ୍ର ବିଷୟ ବୋଲି ଗଣ୍ୟ ହୋଇ ଆପଣ ଆପଣା ଦାସର ଗୃହ ବିଷୟରେ ବହୁ ଦୂର ଭବିଷ୍ୟତ ପର୍ଯ୍ୟନ୍ତ ମଧ୍ୟ କହିଅଛନ୍ତି। ହେ ସାର୍ବଭୌମ ପିତା, ଏହା କି ସମଗ୍ର ମନୁଷ୍ୟଜାତି ପ୍ରତି ଆପଣଙ୍କ ବ୍ୟବହାର? ଦାଉଦ ଆପଣଙ୍କୁ ଆଉ କଅଣ କହିପାରେ? କାରଣ ହେ ସାର୍ବଭୌମ ପିତା, ଆପଣ ତ ଆପଣା ଦାସକୁ ଜାଣନ୍ତି। ଆପଣ ଆପଣା ବାକ୍ୟ ସକାଶେ ଓ ଆପଣା ନିଜ ମନ ଅନୁସାରେ ଏହିସବୁ ମହତ୍ କର୍ମ ସାଧନ କରି ଆପଣା ଦାସକୁ ଜଣାଇଅଛନ୍ତି। ଅତଏବ ହେ ସାର୍ବଭୌମ ପିତା, ଆପଣ ମହାନ୍; କାରଣ ଆମ୍ଭେମାନେ ଆପଣା କର୍ଣ୍ଣରେ ଯାହା ଯାହା ଶୁଣିଅଛୁ, ତଦନୁସାରେ ଆପଣଙ୍କ ତୁଲ୍ୟ କେହି ନାହିଁ ଓ ଆପଣ ବିନା ଆଉ କୌଣସି ଈଶ୍ୱର ନାହାନ୍ତି। ପୃଥିବୀରେ ଆପଣଙ୍କ ଲୋକ ଇସ୍ରାଏଲ ତୁଲ୍ୟ କେଉଁ ଗୋଷ୍ଠୀ ଅଛି, ଯାହାକୁ ଆମ୍ଭମାନଙ୍କ ପିତା ଆପଣା ନିମନ୍ତେ ଗୋଟିଏ ଲୋକ ରୂପେ ମୁକ୍ତ କରିବାକୁ ଯାଇ ଆପଣା ପାଇଁ ନାମ ସ୍ଥାପନ କଲେ ଓ ମିସରରୁ ଆପଣଙ୍କ ପାଇଁ ମୁକ୍ତ କରିଥିବା ଆପଣଙ୍କ ଲୋକଙ୍କ ସମ୍ମୁଖରୁ ଗୋଷ୍ଠୀସମୂହ ଓ ସେମାନଙ୍କର ଦେବତାମାନଙ୍କୁ ତଡ଼ିଦେଇ ଆପଣଙ୍କ ପାଇଁ ମହତ୍ ଓ ଭୟଙ୍କର କର୍ମ ସାଧନ କଲେ? ପୁଣି ଆପଣ ଆପଣା ଲୋକ ଇସ୍ରାଏଲକୁ ଅନନ୍ତକାଳ ପର୍ଯ୍ୟନ୍ତ ଆପଣଙ୍କ ନିଜ ଲୋକ କରି ସ୍ଥିର କଲେ ଓ ହେ ଆମ୍ଭମାନଙ୍କ ପିତା, ଆପଣ ସେମାନଙ୍କର ପିତା ହେଲେ।

ଏବେ ହେ ଆମ୍ଭମାନଙ୍କ ପିତା, ଆପଣ ଆପଣା ଦାସ ଓ ତାହାର ଗୃହ ବିଷୟରେ ଯେଉଁ ବାକ୍ୟ କହିଅଛନ୍ତି, ତାହା ଅନନ୍ତକାଳ ପର୍ଯ୍ୟନ୍ତ ସ୍ଥିର କରନ୍ତୁ ଓ ଆପଣ ଯେପରି ପ୍ରତିଜ୍ଞା କରିଅଛନ୍ତି, ସେପରି କରନ୍ତୁ। ତହିଁରେ ଆପଣଙ୍କ ନାମ ଅନନ୍ତକାଳ ପର୍ଯ୍ୟନ୍ତ ମହତ୍ ହେବ ଓ ଲୋକମାନେ କହିବେ, ‘ସୈନ୍ୟବାହିନୀର ପିତା ଇସ୍ରାଏଲ ଉପରେ ଈଶ୍ୱର ଅଟନ୍ତି।’ ପୁଣି ଆପଣଙ୍କ ଦାସ ଦାଉଦର ଗୃହ ଆପଣଙ୍କ ସମ୍ମୁଖରେ ସୁସ୍ଥିର ହୋଇ ରହିବ। ହେ ସୈନ୍ୟବାହିନୀର ପିତା, ହେ ଇସ୍ରାଏଲର ଈଶ୍ୱର, ଆପଣ ଆପଣା ଦାସ ନିକଟରେ ଏହା ପ୍ରକାଶ କରି କହିଅଛନ୍ତି, ‘ଆମ୍ଭେ ତୁମ୍ଭ ପାଇଁ ଗୋଟିଏ ଗୃହ ନିର୍ମାଣ କରିବା।’ ଏଥିପାଇଁ ଆପଣଙ୍କ ଦାସ ଆପଣଙ୍କ ନିକଟରେ ଏହି ପ୍ରାର୍ଥନା କରିବା ପାଇଁ ସାହସ ପାଇଲା।

ଏବେ ହେ ସାର୍ବଭୌମ ପିତା, ଆପଣ ହିଁ ଈଶ୍ୱର ଓ ଆପଣଙ୍କ ବାକ୍ୟ ସତ୍ୟ ଅଟେ ଓ ଆପଣ ଆପଣା ଦାସ ନିକଟରେ ଏହି ମଙ୍ଗଳ ପ୍ରତିଜ୍ଞା କରିଅଛନ୍ତି। ଅତଏବ ଏବେ ଆପଣା ଦାସର ଗୃହ ଆପଣଙ୍କ ସମ୍ମୁଖରେ ଯେପରି ଅନନ୍ତକାଳ ପର୍ଯ୍ୟନ୍ତ ସ୍ଥାୟୀ ହେବ, ଏଥିପାଇଁ ଅନୁଗ୍ରହ କରି ତାହାକୁ ଆଶୀର୍ବାଦ କରନ୍ତୁ; କାରଣ ହେ ସାର୍ବଭୌମ ପିତା, ଆପଣ କହିଅଛନ୍ତି ଓ ଆପଣଙ୍କ ଆଶୀର୍ବାଦରେ ଆପଣଙ୍କ ଦାସର ଗୃହ ଅନନ୍ତକାଳ ପର୍ଯ୍ୟନ୍ତ ଆଶୀର୍ବାଦଯୁକ୍ତ ହେବ।”