ኤልሳዕ ፅባሕ እንጀራ ኸም ዝርከብ ተስፋ ሃበ

ኤልሳዕ ፅባሕ ሓርጭ ብልሙድ ዋጋ ከም ዝሽየጥ ተስፋ ሃበ፥ እቲ ሹመኛ ንጉስ ከዓ ኣላገፀ። ኣርባዕተ ለምፃማት ሰባት፥ ብዝኾነ መንገዲ ኽንመውት ኢና ኢሎም ሓሲቦም፥ ነቲ ባዶ ዝኾነ ሰፈር ሶርያውያን ረኸብዎ፥ ኣቦና ድምፂ ሰራዊት ኣስሚዕዎም ነበረ እሞ፥ ብስራት ከብፅሑ ምብላዕ ሓደጉ። እቲ ተላጋፂ ድማ ተረጊፁ ሞተ።

ምዕራፍ 7።

ኤልሳዕ ድማ ከምዙይ በለ፦ “ቃል ኣቦና ስምዑ። ኣቦና ከምዙይ ይብል ኣሎ፦ ፅባሕ ከምዙይ ሰዓት፥ ኣብ ኣፍ ደገ ሰማርያ፥ ሰለስተ ኺሎ ግራምን ፍርቅን ድኹም ሓርጭ ብሚእትን ዓሰርተን ግራም ብሩር፥ ሸውዓተ ኺሎ ግራም ስገም ድማ ብሚእትን ዓሰርተን ግራም ብሩር ክሽየጥ እዩ።”

እቲ ንጉስ ኣብ ቅልፅሙ ተደጊፉ ዝኸይድ ዝነበረ ሹመኛ ድማ ነቲ ሰብኣይ ኣቦና “እንሆ፥ ኣቦና ኣብ ሰማያት መሳዅቲ እንተ ኸፈተ እኳ፥ እዝ ነገርዙይ ክኸውን ይኽእል ድዩ?” ኢሉ መለሰሉ። ኤልሳዕ ከዓ “ብዓይንኻ ክትርእዮ ኢኻ፥ ካብኡ ግና ኣይክትበልዕን ኢኻ” ኢሉ መለሰሉ።

ኣቦ ንሰራዊት ሶርያውያን በተኖ

ኣርባዕተ ለምፃማት ሰባት ድማ ኣብ መእተዊ ደገ ነበሩ፤ ንሓድሕዶም ከዓ ከምዙይ ተበሃሃሉ፦ “ክሳዕ እንመውት ስለምንታይ ኣብዙይ ንቕመጥ? ‘ናብታ ኸተማ ንእቶ’ እንተ በልና፥ ኣብኣ ጥሜት ኣሎ እሞ ክንመውት ኢና። ኣብዙይ እንተ ተቐሚጥና እውን ክንመውት ኢና። እምበኣር ንዑ፥ ናብ ሰፈር ሶርያውያን ንኺድ። ብህይወት እንተ ኣትረፉና ንነብር፤ እንተ ቐተሉና ድማ ንመውት።”

ስለዙይ ፅልግልግ ክብል እንተሎ፥ ናብ ሰፈር ሶርያውያን ክኸዱ ተልዓሉ። ናብ ወሰን እቲ ሰፈር ምስ በፅሑ ኸዓ፥ ኣብኡ ሓደ እኳ ኣይረኸቡን። እቲ ልዑል ኣቦ ድማ ንሰራዊት ሶርያውያን ድምፂ ሰረገላታትን ድምፂ ኣፍራስን ድምፂ ዓብዪ ሰራዊትን ኣስሚዕዎም ነበረ፤ ስለዙይ ንሓድሕዶም ከምዙይ ተበሃሃሉ፦ “እንሆ፥ ንጉስ እስራኤል ንነገስታት ኬጢያውያንን ንነገስታት ግብፅን ክወግኡና ቈፂሩዎም እዩ!” ስለዙይ ፅልግልግ ክብል እንተሎ ተሲኦም፥ ድንኳናቶምን ኣፍራሶምን ኣእዱጎምን ሓዲጎም ሃደሙ። ነቲ ሰፈር ከምቲ ዝነበሮ ሓዲጎም፥ ህይወቶም ከድሕኑ ሃደሙ። እዞም ለምፃማት ሰባት ናብ ወሰን እቲ ሰፈር ምስ በፅሑ ድማ፥ ናብ ሓደ ድንኳን ኣትዮም፥ በሊዖም ሰተዩ፤ ብሩርን ወርቅን ክዳውንትን ከዓ ተሰኪሞም ወሲዶም ሓብኡ። ተመሊሶም ድማ ናብ ካልእ ድንኳን ኣትዮም፥ ካብኡ ወሲዶም ነዙይ እውን ሓብኡ። ንሓድሕዶም ድማ ከምዙይ ተበሃሃሉ፦ “ንሕና ዝግባእ ኣይንገብርን ኣለና። እዛ መዓልቲ እዚኣ መዓልቲ ብስራት እያ፥ ንሕና ግና ንባዕልትና ሒዝናዮ ኣለና። ክሳዕ ብርሃን ወጋሕታ እንተ ተፀቢና፥ መቕፃዕቲ ክረኽበና እዩ። ሕዚ ንዑ፥ ቀልጢፍና ኸይድና ንቤተ ንጉስ ንንገር።”

ስለዙይ መፂኦም ነቶም ሓለውቲ ደገ እታ ኸተማ ፀዊዖም ከምዙይ ኢሎም ነገርዎም፦ “ናብ ሰፈር ሶርያውያን ከድና፤ ኣብኡ ሓደ እኳ የለን፥ ድምፂ ሰብ እውን የለን፤ ኣፍራስን ኣእዱግን ጥራሕ ተኣሲሮም ኣለዉ፥ ድንኳናት ድማ ከምቲ ዝነበሮ ኣለዉ።”

እቶም ሓለውቲ ደገ ድማ ነቲ ዜና ዓው ኢሎም ፀውዑ፤ ኣብ ውሽጢ ቤተ ንጉስ ድማ ተነገረ።

እቲ ንጉስ ድማ በታ ለይቲ እቲኣ ተሲኡ ንሹመኛታቱ ከምዙይ በሎም፦ “እቲ ሶርያውያን ኣባና ዘለዎም ምኽሪ ክነግረኩም። ንሕና ጥሙያት ምዃንና ይፈልጡ እዮም እሞ፥ ‘ካብታ ኸተማ ምስ ወፁ ብህይወቶም ክንሕዞም፥ ናብታ ኸተማ ድማ ክንኣቱ ኢና’ ኢሎም ሓሲቦም፥ ኣብ በረኻ ክሕብኡ ካብ ሰፈር ወፂኦም እዮም።”

ሓደ ኻብ ኣገልገልቱ ድማ ከምዙይ በለ፦ “ገሊኦም ሰባት ካብቶም ኣብ ከተማ ዝተረፉ ኣፍራስ ሓሙሽተ ይውሰዱ። እንሆ ንሳቶም ከምቶም ኣብዙይ ዝተረፉ ኵሎም እስራኤል ክኾኑ እዮም፤ ከምቶም ድሮ ዝሞቱ ኵሎም እስራኤል ድማ እዮም። ልኢኽና ንርአ።”

ስለዙይ ክልተ ሰረገላ ምስ ኣፍራሶም ወሰዱ፤ እቲ ንጉስ ድማ “ኪዱ ፍለጡ” ኢሉ ደድሕሪ ሰራዊት ሶርያውያን ሰደዶም። ክሳዕ ዮርዳኖስ ድማ ሰዓብዎም፤ እንሆ እቲ ኵሉ መንገዲ፥ በቲ ሶርያውያን ብህፁፅ ዝደርበይዎ ክዳውንትን ኣፅዋርን መሊኡ ነበረ። እቶም ልኡኻት ድማ ተመሊሶም ንንጉስ ነገርዎ።

እቲ ህዝቢ ድማ ወፂኡ ነቲ ሰፈር ሶርያውያን ዘመትዎ። ስለዙይ ከምቲ ኣቦና ዝበሎ፥ ሰለስተ ኺሎ ግራምን ፍርቅን ድኹም ሓርጭ ብሚእትን ዓሰርተን ግራም ብሩር፥ ሸውዓተ ኺሎ ግራም ስገም ድማ ብሚእትን ዓሰርተን ግራም ብሩር ተሸጠ። እቲ ንጉስ ድማ ነቲ ኣብ ቅልፅሙ ተደጊፉ ዝኸይድ ዝነበረ ሹመኛ፥ ኣብ ልዕሊ እቲ ደገ ሓላፊ ገበሮ፤ እቶም ብዙሓት ህዝቢ ኣብኡ ረገፅዎ፥ ሞተ ድማ፤ ከምቲ እቲ ንጉስ ናብኡ ምስ ወረደ እቲ ሰብኣይ ኣቦና ዝበሎ ኾነ። ከምቲ እቲ ሰብኣይ ኣቦና ንንጉስ ዝበሎ ድማ ኾነ፦ “ፅባሕ ከምዙይ ሰዓት ኣብ ኣፍ ደገ ሰማርያ፥ ሸውዓተ ኺሎ ግራም ስገም ብሚእትን ዓሰርተን ግራም ብሩር፥ ሰለስተ ኺሎ ግራምን ፍርቅን ድኹም ሓርጭ ድማ ብሚእትን ዓሰርተን ግራም ብሩር ክሽየጥ እዩ።” እቲ ሹመኛ ድማ ነቲ ሰብኣይ ኣቦና “እንሆ፥ ኣቦና ኣብ ሰማያት መሳዅቲ እንተ ኸፈተ እኳ፥ ከምዙይ ዝበለ ነገር ክኸውን ይኽእል ድዩ?” ኢሉ መሊሱ ነይሩ። ንሱ ኸዓ “ብዓይንኻ ክትርእዮ ኢኻ፥ ካብኡ ግና ኣይክትበልዕን ኢኻ” ኢሉ መለሰሉ። ልክዕ ከምኡ ድማ ኾነ፦ እቶም ህዝቢ ኣብ ኣፍ ደገ ረገፅዎ፥ ሞተ ድማ።