Ng'atuutik Che Rebei Kibananook
Assyria ko kiroktotap angeetap Kwandanyo ne mi eunnyi, ago ma ingen niito—ko uu aiywet ne yoboorji ne sutei ineendet—si keker nyalildap kiyooto age. Kichigil wendo ne po ng'emindet nganaseet ak nganaseet, agoi koiboor luch eng' Jerusalem.
Ng'alaali Kwandanyo eng' mustarisyek 5–6, 12, 24–27
10 1Woiyoni che kande kirwoogutik che ma po imanda, ak che siretei che yaei ng'atuutik che sastoei piik, 2si koisto kibananook imanda, ak korebe cheguuk che tinyei nyalilda eng' piikyuk osotikwak, si koek mosoogik koskolenynywa ak ponoon lagok logeennywa. 3Nee ne oyaei eng' peetuutap kirwooget, ye nyo pistoet kong'etee ole loo? Ng'oo ne omwechini si koretok? Ano ole opagaakta mogornatosyekwok? 4Mami ne ipkeiywo, ago koribisgei kwenutap che kinam, anan kobut kwenutap che kabar. Ago agobo tuguuchuuto tugul, ma kagoweek angeennyi; ago ta kiitei eunnyi.
Assyria, Kiroktonyi ne Mi Eunnyi
5“Woiyoni Assyria, kiroktotap angeennyu, ne mi eunnyi loindotap nereegekyuk! 6Ayooktoi ineendet koba pororyet ne ma iywei Kamuktaindet; ang'atei ineendet koba piigap nereegekyuk, si konam koskoleny ak koip pany, si koaiyat icheek ko uu ng'atateek che mi ortinwek.”
7Ago ma niito ne bwaatei ineendet; ma niito ne bwaatei muguleldanyi. Magennyi ko kobeel, si kotil pororyosyek che chang'. 8Amu mwaei ineendet kole, “Tos ma laitorinik pounikyuk tugul? 9Tos ma uu Karkemish Kalno? Tos ma uu Arpad Hamath? Tos ma uu Damasko Samaria? 10Ko uu ye konam eunnyu laitornatosyek che po sigik, che ki siir sigikwak sigigap Jerusalem ak Samaria, 11Tos ma ayaiywo Jerusalem ak sigikyik ko uu ye kayaiywo Samaria ak kamuktaikyik?”
12Ye kagobata Kiptaiyat Kwanda poisyennyi tugul ne po tulweetap Zion ak Jerusalem, atilchi let laitoryatap Assyria agobo logoegap muguleldanyi ne mendos, ak agobo menoteetap konyekyik.
13Amu mwaei ineendet kole: “Eng' kimnateetap eunnyu kayai nii, ak eng' utaatyennyu, amu atinye ng'omnateet. Kaistoi komoswegap piik, ak karebe mogornatosyekwak; kakanabu che tebee ng'echereet ko uu ne kiimeen. 14Kagoit eunnyu mogornatosyegap piik ko uu eng' keswet; ko uu ye tuiyei chii koik che kibagaakta, kityo katui ng'wony komugul. Mami age ne tuchi kebepchennyi, anan koiiny kutinnyi si korilril. 15Tos toroorgei aiywet kosiir ne sutei ineendet? Tos ichougei menjeet agobo ne poisyee ineendet? Ko uu ye kimuuchi kirokto koleela ne ing'eeti ineendet, ko uu ye kimuuchi karna koeeti ne ma po keet!” 16Nooto si iyookyi Kiptaiyat Kwanda, Kwandap lugosyegap kipsengwet, chebuonit ne lusei kwenutap murenikyik che kiimeen, ak eng' ng'wony liilindanyi, komandae maat ko uu liplibenetap maat ne beelei. 17Koegu Liilet ne po Israel maat, ak Ne Tiliilnyo koegu liplibenetap maat; ak eng' peetuut agenge, kobeel ak koam suumeekyik ak katookyik. 18Kobeel Kwandanyo liilindap timwennyi ak mbareennyi ne nyoun, kobooto saboondo ak poorto; ak koek ko uu ye lusei chii ne miandos. 19Keetiik che ng'etu eng' timwennyi, ko ng'ering' miising' kot komuuchi lakweet koken icheek.
Ketiegei Kwandanyo Kogeny
20Eng' peetuunooto, che ng'et che po Israel ak che saakte che po kootap Jakobo ma kotiegei kogeny ne kibir icheek, ago kotiegei Kwandanyo iman, Ne Tiliil ne po Israel. 21Weekyingei che ng'et—che ng'et che po Jakobo—Kamuktaindet ne Kimnotin. 22Agoiyo piiguk che po Israel kou sandanaa ne po nyanjet, che ng'et kityo che weekyingei. Kaging'at kobetaet, ne nyiitaat imanda. 23Amu Kiptaiyat Kwanda, Kwanda ne po lugosyegap kipsengwet, koyai kobetaet ne king'at eng' emet komugul.
24Mwaei anyun Kiptaiyat Kwanda, Kwanda ne po lugosyegap kipsengwet, kole: “Piiguk che menyei Zion, mat oiywei Assyria, ne birok eng' kirokto ak koeeti ng'otit eng' pandang'wong' kou ye kiyai Misiri. 25Amu eng' sait ne ming'in miising', kobet nereegekyuk, ak koek angeennyu kobetaennywa.” 26Koeeti Kwanda ne po lugosyegap kipsengwet kipchoritiit agaigai icheek, kou ye kibar Midian eng' rwandetap Oreb; koeeti ng'otinnyi eng' nyanjet kou ye kiyai Misiri. a a v26 Rwandetap Oreb ko olooto ki kibarchi lugoosyegap Gideon pounik che po Midianik (Kirwoogik 7:25). 27Eng' peetuunooto, keeb kurwennywa eng' kaateng'ung', ak chogitnywa eng' mwarikwooteng'ung'; ketil chogit.
28Konyo agaigai Aiath, kosiir Migron, koriip tuguukyik Mikmas. 29Kolanda komosi: “Kebenyi eng' Geba.” Potani Ramah; komwei Gibea ne po Saulo. 30Waach, tiibiitap Galim! Igas, Lais! Anatoth ne nyalili! 31Komwei Madmena; kounygei piigap Gebim. 32Peetuunooto ineet kotononi eng' Nob, iwaalwalji luchenyi tulweetap tiibiitap Zion, tuloonetap Jerusalem. 33Keero, Kiptaiyat Kwanda, Kwanda ne po lugosyegap kipsengwet, kotil temegap keetiik eng' kimnateet ne iywei; keeb keetiik che koen, keiming'in che toroor. 34Kotil sondisyegap timiin eng' aiywet, ak kobet Lebanon eng' taitap Ne Konyitot.