ንፅጉማት ዝዘምቱ ሕግጋት

ኣሶር እታ ኣብ ኢድ ኣቦና ዘላ በትሪ እያ፥ ንሱ ግና ኣይፈልጦን — ከምታ ኣብ ልዕሊ እቲ ዝገብር ዘለዋ ዝምካሕ ማሕፀ — ስለዙይ ትዕቢት እቲ ኣቕሓ ድማ ይፍረድ። ጒዕዞ እቲ ወራሪ ኸተማ ብኸተማ ይስኣል፥ ክሳዕ ኣብ ልዕሊ ኢየሩሳሌም ኢዱ ዘወዛውዝ።

ምዕራፍ 10።

ወይለኦም ነቶም ዓመፀኛ ሕግጋት ዝገብሩ፥ ነቶም ጨቋኒ ሕጊ ዝፅሕፉ ፀሓፍቲ፥ ንድኻታት ፍርዶም ንምኽልካል፥ ነቶም ኣብ ህዝበይ ዘለዉ ፅጉማት መሰሎም ንምዝማት፥ ንመበለታት ምርኮኦም ንደኽታማትውን ግዳዮም ይገብሩ። በታ መዓልቲ መቕሰፍቲ እንታይ ክትገብሩ ኢኹም፥ እቲ ጥፍኣት ካብ ርሑቕ ክመፅእ እንተሎ? ንረዳኤት ናብ መን ክትሃድሙ ኢኹም? ሃብትኹምከ ኣበይ ክትገድፉ ኢኹም? ኣብ ማእኸል ምሩኻት ካብ ምድናን፥ ወይ ኣብ ማእኸል ቅቱላት ካብ ምውዳቕ ሓሊፉ ዝተርፍ የለን። ምስ እዙይ ኵሉ ግና ቍጥዓኡ ኣይተመለሰን፤ ኢዱ ገና ተዘርጊሓ ኣላ።

ኣሶር፥ እታ ኣብ ኢዱ ዘላ በትሪ

“ወይለኣ ንኣሶር፥ በትሪ ቍጥዓይ፥ እቲ ኣብ ኢዱ ዘሎ ዘንጊ ነድረይ! ናብ ዓመፀኛ ህዝቢ እሰዶ፤ ናብ ህዝቢ ቍጥዓይ፥ ምርኮ ንኽማርኽ ዘመተውን ንኽወስድ እእዝዞ፥ ከም ጭቃ መንገዲ ኸዓ ንኽረግፆም።”

ንሱ ግና ከምዙይ ኣይሓስብን፤ ልቡ ኸዓ ከምዙይ ኣይሓስብን። ሓሳቡ ንምጥፋእ፥ ህዝቢ ድሕሪ ህዝቢ ንምቍራፅ እዩ። ንሱ ኸዓ ከምዙይ ይብል ኣሎ፦ “ኵሎም ሓለቓታተይ ነገስታት ደዮም? ካልኖዶ ኸም ካርከሚሽ ኣይኮነትን? ሓማትዶ ኸም ኣርጳድ ኣይኮነትን? ሰማርያዶ ኸም ደማስቆ ኣይኮነትን? ከምቲ ኢደይ ንመንግስታት ጣኦታት ዝሓዘት፥ ቅርፂ ምስልታተን ከዓ ኻብ ናይ ኢየሩሳሌምን ሰማርያን ዝበለፀ ነበረ፤ ከምቲ ንሰማርያን ንጣኦታታን ዝገበርኩ፥ ንኢየሩሳሌምን ንምስልታታን ኣይገብረንዶ?”

እቲ ልዑል ኣቦ ኣብ እምባ ፅዮንን ኢየሩሳሌምን ዘለዎ ኵሉ ግብሩ ምስ ወድአ፥ ነቲ ፍረ ትዕቢተኛ ልቢ ንጉስ ኣሶርን ነቲ ዕቡይ ትዕቢት ዓይኑን ክቐፅዖ እየ።

ንሱ ኸዓ ከምዙይ ይብል ኣሎ፦ “ብሓይሊ ኢደይ እዙይ ገይረ፥ ብጥበበይውን፥ ኣስተውዓልኩ እሞ፤ ዶባት ኣህዛብ ኣልዓልኩ፥ መዛግብቶም ድማ ዘመትኩ፤ ነቶም ኣብ ዙፋን ዝተቐመጡ ኸም ሓያል ኣውረድኩዎም። ኢደይ ከም ናብ እንዳ ዒፍ ናብ ሃብቲ ኣህዛብ በፅሐት፤ ከምቲ ሰብ ዝተሓደገ እንቍላሊሕ ዝእክብ፥ ንብምሉኣ ምድሪ ኣከብክዋ። ክንፊ ዘንቀሳቐሰ፥ ወይ ኣፉ ኸፊቱ ዝጭውጭወ ሓደ እኳ ኣይነበረን። ማሕፀዶ ኣብ ልዕሊ እቲ ዝሰብረሉ ሰብ ርእሱ የልዕል? መጋዝዶ ኣብ ልዕሊ እቲ ዝጥቀመሉ ይምካሕ? በትሪ ነቲ ዘልዕሎ ኸም ዘንቀሳቕሶ፥ ዘንጊ ኸዓ ነቲ ዕንፀይቲ ዘይኮነ ኸም ዘልዕሎ ኮይኑ!” ስለዙይ እቲ ልዑል ኣቦ፥ ኣቦ ሰራዊት ሰማይ፥ ዘማስን ሕማም ክሰድድ እዩ ኣብ ማእኸል ሓያላት ተዋጋእቱ፤ ኣብ ትሕቲ ኽብሩ ኸዓ ሓዊ ኸም ዝነድድ ሃልሃልታ ክውላዕ እዩ። ብርሃን እስራኤል ሓዊ ክኸውን እዩ፥ እቲ ቅዱስና ድማ ሃልሃልታ፤ ብሓንቲ መዓልቲ ኸዓ ንእሾዅን ተዀርባኡን ኣንዲዱ ክበልዖ እዩ። ክብሪ ዱሩን ፍርያም ግራቱን፥ ነፍስን ስጋን ኣቦና ከጥፍኦ እዩ፤ ከምቲ ሕሙም ሰብ ዝመክኽ ከዓ ክኸውን እዩ። እቶም ዝተረፉ ኣእዋም ዱሩ የመና ውሑዳት ክኾኑ እዮም፥ ክሳዕ ቈልዓ ክቘፅሮም ዝኽእል።

ከም ብሓድሽ ናብ ኣቦና ምፅጋዕ

በታ መዓልቲ እቲኣ ተረፍ እስራኤልን ዝደሓኑ ቤት ያእቆብን ኣብ ልዕሊ እቲ ዝወቕዖም ደጊም ኣይፅግዑን፤ ናብ ኣቦና፥ ናብ እቲ ቅዱስ እስራኤል፥ ብሓቂ ደኣ ይፅግዑ እምበር። ተረፍ ክምለስ እዩ፥ እቲ ተረፍ ያእቆብ ናብ እቲ ሓያል ኣምላኽ ክምለስ እዩ። ህዝብኻ እስራኤል ከም ሑፃ ባሕሪ እኳ እንተ ኾኑ፥ ተረፎም ጥራሕ ክምለስ እዩ። ጥፍኣት ተወሲኑ ኣሎ፤ ብፅድቂ ከዓ ዝተመልአ እዩ። እቲ ልዑል ኣቦ፥ ኣቦ ሰራዊት ሰማይ፥ ነቲ ዝተወሰነ ጥፍኣት ኣብ ኵላ ምድሪ ክፍፅም እዩ እሞ።

ስለዙይ እቲ ልዑል ኣቦ፥ ኣቦ ሰራዊት ሰማይ፥ ከምዙይ ይብል ኣሎ፦ “ኣብ ፅዮን እትነብሩ ህዝበይ፥ ከምቲ ግብፂ ዝገበሮ ብበትሪ ዝወቕዓኩምን ምርኵሱ ኣብ ልዕሌኹም ዘልዕልን ካብ ዝኾነ ኣሶር ኣይትፍርሑ። ድሕሪ ኣዝዩ ቍሩብ እዋን ነድረይ ክውዳእ እዩ፤ ቍጥዓይ ከዓ ናብ ጥፍኣቶም ክቕየር እዩ።” ኣቦ ሰራዊት ሰማይ መግረፊ ከልዕለሎም እዩ፥ ከምቲ ኣብ ኰዅሒ ሔሬብ ንምድያም ዝወቕዐ፤ ነቲ ምርኵሱ ከዓ ከምቲ ኣብ ግብፂ ዝገበሮ ኣብ ልዕሊ ባሕሪ ከልዕል እዩ። ^a በታ መዓልቲ እቲኣ ፆሮም ካብ ማእገርካ ክልዓል እዩ፥ ኣርዑቶም ከዓ ካብ ክሳድካ፤ እቲ ኣርዑት ክስበር እዩ።

ናብ ዓያት ይመፅእ፥ ብመጌዶል ይሓልፍ፥ ኣብ ሚክማስ ኣቑሑ የቐምጥ። ነቲ መሳገሪ ይሳገሩ፦ “ኣብ ጌባ ክንሰፍር ኢና።” ራማ ትርዕድ ኣላ፤ ጊብዓ ሳኦል ትሃድም ኣላ። ኣቲ ጓል ጋሊም፥ ዓው ኢልኪ ኣእውዪ! ኣቲ ላይሻ፥ ስምዒ! ኣቲ ምስኪን ኣናቶት! ማድሜና ትሃድም ኣላ፤ ሰብ ጌቢም ተሓቢኦም ኣለዉ። ልክዕ ሎሚ መዓልቲ ኣብ ኖብ ደው ይብል፥ ኢዱ ናብ እምባ ጓል ፅዮን፥ ናብ ኰረብታ ኢየሩሳሌም እናወዝወዘ። እንሆ እቲ ልዑል ኣቦ፥ ኣቦ ሰራዊት ሰማይ፥ ነቲ ጨናፍር ብዘፍርሕ ሓይሊ ክቘርፅ እዩ፤ እቶም ነዋሕቲ ኣእዋም ክወድቁ፥ እቶም ልዑላትውን ክዋረዱ እዮም። ነቲ ጥቕቕ ዝበለ ዱር ብማሕፀ ክቘርፆ እዩ፥ ሊባኖስ ድማ ኣብ ቅድሚ እቲ ግሩም ክወድቕ እዩ።