Isaya 10

10 ¹Ole wao watungao amri zisizo za haki, na waandishi watoao sheria za udhalimu, ²ili kuwanyima maskini haki na kuwapokonya wahitaji miongoni mwa watu wangu haki zao, wakiwafanya wajane mateka wao na yatima mawindo yao. ³Mtafanya nini katika siku ya hesabu, uharibifu utakapokuja kutoka mbali? Mtakimbilia kwa nani mpate msaada? Mtaacha wapi utajiri wenu? ⁴Hakuna lililobaki ila kuinama miongoni mwa mateka au kuanguka miongoni mwa waliouawa. Lakini pamoja na haya yote hasira yake haikugeukia mbali; mkono wake bado umenyooshwa.

Ashuru, Fimbo Mkononi Mwake

⁵"Ole wako Ashuru, fimbo ya hasira yangu, ambaye mkononi mwake mna rungu la ghadhabu yangu! ⁶Ninamtuma juu ya taifa lisilomcha Mungu; ninamwamuru juu ya watu wa ghadhabu yangu, akatwae nyara na kuchukua mateka, na kuwakanyaga kama matope ya barabarani."

⁷Lakini si hivyo anavyokusudia; si hivyo moyo wake unavyopanga. Nia yake ni kuharibu, kukatilia mbali taifa baada ya taifa. ⁸Kwa maana husema, "Je, maakida wangu wote si wafalme? ⁹Je, Kalno si kama Karkemishi? Je, Hamathi si kama Arpadi? Je, Samaria si kama Dameski? ¹⁰Kama vile mkono wangu ulivyoyakamata falme za sanamu, ambazo vinyago vyao vya kuchonga vilizidi vile vya Yerusalemu na Samaria, ¹¹je, sitautendea Yerusalemu na sanamu zake kama nilivyoutendea Samaria na sanamu zake?"

¹²Baba Mwenye Enzi atakapomaliza kazi yake yote juu ya Mlima Sayuni na Yerusalemu, nitaadhibu tunda la kiburi cha moyo wa mfalme wa Ashuru na majivuno ya macho yake ya kujigamba.

¹³Kwa maana husema: "Kwa nguvu za mkono wangu nimefanya haya, na kwa hekima yangu, kwa maana nina ufahamu. Niliondoa mipaka ya mataifa na kuteka hazina zao; niliwaangusha waliokaa katika viti vya enzi kama shujaa. ¹⁴Mkono wangu ulifikia utajiri wa mataifa kama kufikia kwenye kiota; kama mtu akusanyavyo mayai yaliyoachwa, niliikusanya dunia yote. Hakuna hata kimoja kilichopapatika kwa bawa au kufungua mdomo wake kulia. ¹⁵Je, shoka hujitukuza juu ya yule alishikaye? Je, msumeno hujisifu juu ya yule autumiaye? Kana kwamba fimbo ingeweza kumtikisa yule aiinuaye, kana kwamba gongo lingeweza kukiinua kile kisicho mti!" ¹⁶Kwa hiyo Baba Mwenye Enzi, Baba wa majeshi ya mbinguni, atapeleka ugonjwa wa kukonda miongoni mwa mashujaa wake wenye nguvu, na chini ya utukufu wake moto utawaka kama mwali uwakao. ¹⁷Nuru ya Israeli itakuwa moto, Mtakatifu wetu mwali; katika siku moja utawaka na kuviteketeza miiba yake na michongoma yake. ¹⁸Utukufu wa msitu wake na wa shamba lake lenye rutuba Baba yetu atauharibu, nafsi na mwili pia; utakuwa kama vile mtu mgonjwa adhoofikavyo. ¹⁹Miti iliyobaki ya msitu wake itakuwa michache mno hata mtoto aweze kuihesabu.

Kumtegemea Baba Yetu Tena

²⁰Katika siku ile mabaki ya Israeli na waliosalia wa nyumba ya Yakobo hawatamtegemea tena yule aliyewapiga, bali watamtegemea kweli Baba yetu, Mtakatifu wa Israeli. ²¹Mabaki watarudi—mabaki ya Yakobo—kwa Mungu Mwenye Nguvu. ²²Ijapokuwa watu wako Israeli ni kama mchanga wa bahari, mabaki tu ndio watakaorudi. Uharibifu umeamriwa, ukifurika kwa haki. ²³Kwa maana Baba Mwenye Enzi, Baba wa majeshi ya mbinguni, atatimiza uharibifu ulioamriwa katika nchi yote.

²⁴Kwa hiyo Baba Mwenye Enzi, Baba wa majeshi ya mbinguni, asema: "Enyi watu wangu mnaokaa Sayuni, msiogope Ashuru, anayewapiga kwa fimbo na kuinua gongo juu yenu kama Misri ilivyofanya. ²⁵Kwa maana bado kitambo kidogo sana ghadhabu yangu itakoma, na hasira yangu itageukia uharibifu wao." ²⁶Baba wa majeshi ya mbinguni atawainulia mjeledi, kama vile alipowapiga Wamidiani penye mwamba wa Orebu; naye atainua gongo lake juu ya bahari kama alivyofanya katika Misri. ^a a v26 Mwamba wa Orebu ndipo majeshi ya Gideoni yalipowaua maakida wa Wamidiani (Waamuzi 7:25). ²⁷Katika siku ile mzigo wao utaondolewa begani mwako, na nira yao shingoni mwako; nira itavunjwa.

²⁸Anakuja juu ya Aiathi, anapita katikati ya Migroni, anahifadhi mahitaji yake huko Mikmashi. ²⁹Wanavuka njia ya kupita: "Tutapiga kambi Geba." Rama inatetemeka; Gibea ya Sauli inakimbia. ³⁰Paza sauti, binti Galimu! Sikiliza, Laisha! Maskini Anathothi! ³¹Madmena inakimbia; watu wa Gebimu wanajificha. ³²Siku ile ile atasimama Nobu, akitikisa ngumi yake juu ya mlima wa binti Sayuni, kilima cha Yerusalemu. ³³Tazama, Baba Mwenye Enzi, Baba wa majeshi ya mbinguni, atazikatilia mbali matawi kwa nguvu za kutisha; miti mirefu itaangushwa, ile ya juu itashushwa chini. ³⁴Naye atavikata vichaka vya msitu kwa shoka, na Lebanoni utaanguka mbele za Yule Mtukufu.