Isaia 10 FHB Father's Heart Bible™

10 ¹Kaĩ marĩ na haaro arĩa matuaga matua matarĩ ma kĩhooto, na andĩki arĩa maandĩkaga mawatho ma kũhinyanĩrĩria, ²nĩguo maagithie athĩĩni kĩhooto na matunye athĩĩni arĩa marĩ gatagatĩinĩ ka andũ akwa kĩhooto kĩao, magĩtua atumia a ndigwa indo ciao cia kũtaha, na ciana cia ngoriai kĩndũ kĩao gĩa kũguĩma. ³Mũgwĩka atĩa mũthenya wa ituĩro, rĩrĩa mwanangĩko ũgooka kuuma kũraya? Nĩ kũrĩ ũ mũkoorĩra mũteithio? Nĩ kũ mũgaatiga ũtonga wanyu? ⁴Gũtirĩ ũndũ ũtigarĩte tiga o gũkundama thĩinĩ wa arĩa matahĩtwo, kana kũgũa gatagatĩinĩ ka arĩa moragĩtwo. No o na ũguo guothe, marakara make matirĩ maahũndũka; guoko gwake no gũtambũrũkĩte.

Ashuri, Rũthanju rũrĩa Rũrĩ Guokoinĩ Gwake

⁵“Kaĩ Ashuri marĩ na haaro, rũthanju rwa marakara makwa, ũrĩa guokoinĩ gwake kũrĩ njũgũma ya mangʼũrĩ makwa! ⁶Ndĩmũtũmaga okĩrĩre rũrĩrĩ rũtarĩ na Ngai; ndĩmwathaga okĩrĩre andũ a marakara makwa, nĩguo ataahe indo na akuue indo cia ndaho, amarangĩrĩrie thĩ ta ndooro ĩrĩ njĩrainĩ.”

⁷No ũndũ ũyũ ti guo eeciiragia; ũndũ ũyũ ti guo ngoro yake ĩbangaga. Muoroto wake nĩ kwananga, na gũtiũranga ndũũrĩrĩ ĩmwe thuutha wa ĩngĩ. ⁸Nĩgũkorwo oigaga atĩrĩ, “Anene a ita akwa othe githĩ ti athamaki? ⁹Kalino githĩ ti ta Karikemishi? Hamathu githĩ ti ta Aripadi? Samaria githĩ ti ta Dameski? ¹⁰O ta ũrĩa guoko gwakwa kwanyiitire mothamaki ma mĩhianano, marĩa mĩhianano yao ya gwacũhio yakĩrĩte ĩrĩa ya Jerusalemu na Samaria, ¹¹githĩ ndikeeka Jerusalemu na mĩhianano yayo o ta ũrĩa ndeekire Samaria na mĩhianano yayo?”

¹²Rĩrĩa Ithe witũ ũrĩa Mũnene akaarĩĩkia wĩra wake wothe wa gũũkĩrĩra Kĩrĩma gĩa Zayuni na Jerusalemu, nĩngaaherithia maciaro ma ngoro ya mwĩtĩĩo ya mũthamaki wa Ashuri, na mwĩĩgaatho wa maitho make.

¹³Nĩgũkorwo oigaga atĩrĩ, “Njĩkĩte ũndũ ũyũ na hinya wa guoko gwakwa, na na ũũgĩ wakwa, nĩgũkorwo ndĩ na ũmenyo. Nĩndeheririe mĩhaka ya ndũũrĩrĩ na ngĩtaha igĩĩna ciao; nĩndaharũrũkirie arĩa maaikarĩire itĩ cia ũnene ta njamba ĩrĩ hinya. ¹⁴Guoko gwakwa gwakinyire harĩ ũtonga wa ndũũrĩrĩ ta ũrĩa mũndũ aakinyaga gĩtarainĩ kĩa nyoni; na o ta ũrĩa mũndũ onganagia matumbĩ marĩa matiganĩrie, noguo ndonganirie thĩ yothe. Gũtirĩ nyoni o na ĩmwe yainainirie ithagu kana yaathamia kanua gũkayũrũrũka. ¹⁵Ithanwa no rĩĩtũũgĩrie igũrũ rĩa ũrĩa ũrĩhũũragĩra? Mũthumeno no wĩrahe igũrũ rĩa ũrĩa ũũhũthagĩra? Taarĩ rũthanju rũngĩinainia ũrĩa ũrũoyaga, o taarĩ mũthĩgi ũngĩoya kĩndũ gĩtarĩ mũtĩ!” ¹⁶Nĩ ũndũ ũcio Ithe witũ ũrĩa Mũnene, o we Ithe wa ita cia igũrũ, nĩagaatũma mũrimũ wa kũhinjia gatagatĩinĩ ka njamba ciake iria irĩ hinya, na rungu rwa riiri wake nĩgũkaakana mwaki ta rũrĩrĩmbĩ rũgũakana. ¹⁷Ũtheri wa Isiraeli nĩũgaatuĩka mwaki, nake Ũrĩa witũ Mũtheru atuĩke rũrĩrĩmbĩ; mũthenya o ũmwe nĩũgaacina na ũniine mĩigua yake na ihinga ciake. ¹⁸Riiri wa mũtitũ wake na wa mũgũnda wake mũnoru, Ithe witũ nĩakaũananga, muoyo hamwe na mwĩrĩ; gũgaatuĩka ta rĩrĩa mũndũ mũrũaru athiiaga akĩhwererekaga. ¹⁹Mĩtĩ ĩrĩa ĩgaatigara ya mũtitũ wake ĩgaakorwo ĩrĩ mĩnini mũno atĩ o na kaana no kaamĩtare.

Kwĩhoka Ithe witũ Rĩngĩ

²⁰Mũthenya ũcio matigari ma Isiraeli na arĩa magaatigara a nyũmba ya Jakubu matigacooka kwĩhoka ũrĩa wamaringire, no nĩmakeehoka Ithe witũ na ma, o we Ũrĩa Mũtheru wa Isiraeli. ²¹Matigari nĩmagaacooka— matigari ma Jakubu—kũrĩ Ngai ũrĩa ũrĩ Hinya. ²²O na andũ aku a Isiraeli mangĩkorwo marĩ ta mũthanga wa iria, no matigari moiki nĩmo makaacooka. Mwanangĩko nĩmũtue, ũiyũrĩte ũthingu. ²³Nĩgũkorwo Ithe witũ ũrĩa Mũnene, o we Ithe wa ita cia igũrũ, nĩakahingia mwanangĩko ũrĩa mũtue bũrũriinĩ wothe.

²⁴Nĩ ũndũ ũcio Ithe witũ ũrĩa Mũnene, o we Ithe wa ita cia igũrũ, ekuuga atĩrĩ, “Inyuĩ andũ akwa mũtũũraga Zayuni, mũtigetigĩre Ashuri, arĩa mamũhũũraga na rũthanju na makamũoeria mũthĩgi igũrũ rĩanyu, o ta ũrĩa Misiri yeekire. ²⁵Nĩgũkorwo thuutha wa kahinda kanini mũno mangʼũrĩ makwa nĩmagaathira, namo marakara makwa magaagarũrũkĩra kũmaananga.” ²⁶Ithe wa ita cia igũrũ nĩakamahiũrĩria kĩboko, o ta rĩrĩa aaringire Midiani harĩ ihiga rĩa Orebu; nĩakoeria mũthĩgi wake igũrũ rĩa iria o ta ũrĩa eekire kũu Misiri. ^a a v26 Ihiga rĩa Orebu nĩho mbũtũ cia ita cia Gideoni ciooragĩire anene a ita a Midiani (Atiirĩrĩri 7:25). ²⁷Mũthenya ũcio mũrigo wao nĩũkeerũo kuuma kĩande gĩaku, na icooki rĩao kuuma ngingoinĩ yaku; icooki rĩu nĩrĩkoinĩka.

²⁸Okĩte agookĩrĩra Aiathu, akagerera Migironi, akaiga indo ciake kũu Mikimashu. ²⁹Nĩmaringa mũkuru: “Tũkaamba hema ciitũ kũu Geba.” Rama nĩrĩrainaina; Gibea ya Saũlũ nĩũroora. ³⁰Anĩrĩra, wee mwarĩ wa Galimu! Thikĩrĩria, wee Laisha! Kaĩ Anathothu ũrĩ na haaro-ĩ! ³¹Madimena nĩũroora; andũ a Gebimu nĩmehithĩte. ³²Mũthenya o ũyũ nĩakaarũgama Nobu, akĩinainagia ngundi yake akĩĩrĩire kĩrĩma kĩa mwarĩ wa Zayuni, karĩma ka Jerusalemu. ³³Ta rora, Ithe witũ ũrĩa Mũnene, o we Ithe wa ita cia igũrũ, nĩagaatinia honge na hinya wa kũmakania; mĩtĩ ĩrĩa mĩraihu nĩĩkaagwĩthio, nayo ĩrĩa ĩtũũgĩru ĩharũrũkio. ³⁴Nĩagaatema ihuhĩ cia mũtitũ na ithanwa, na Lebanoni ĩgwe mbere ya Ũrĩa ũrĩ Riiri.