Isaiah 10

10 ¹Trouble dey for dose wey dey make law wey no correct, for di writer-dem wey dey write law wey dey oppress pipol, ²wey dey deny poor pipol dia justice, dey tief di needy among my pipol dia right, dey take widow-dem as loot and orphan-dem as prey. ³Wetin una go do for di day of judgement, wen destruction go come from far? Na who una go run go for help? Where una go keep una wealth? ⁴Nothing remain except make una bend down among di captive-dem or fall among dose wey dem don kill. Even so, afta all dis, im vex never comot; im hand still dey stretch out.

Assyria, Di Cane for Im Hand

⁵“Trouble dey for Assyria, di cane of my anger, wey hold di club of my fury for im hand! ⁶I send am go against nation wey no get God; against di pipol wey my anger dey on, I command am, make e seize loot and carry plunder go, make e trample dem down like mud for street.”

⁷But no be dis one be wetin e get for mind; no be dis one im heart dey plan. Im purpose na to destroy, to cut off nation afta nation. ⁸Bicos e talk say, “No be say all my commander-dem na king? ⁹No be say Calno resemble Carchemish? No be say Hamath resemble Arpad? No be say Samaria resemble Damascus? ¹⁰As my hand seize di kingdom-dem of di idol-dem, wey dia carve image pass dose of Jerusalem and Samaria, ¹¹abi I no go do Jerusalem and her image-dem wetin I do Samaria and her idol-dem?”

¹²Wen di Oga-Papa don finish all im work against Mount Zion and Jerusalem, I go punish di fruit of di proud heart of di king of Assyria and di haughty pride wey dey im eye.

¹³Bicos e talk say: “Na by di strength of my hand I do dis, and by my wisdom, bicos I get understanding. I comot di boundary of pipol-dem, I plunder dia treasure; I bring down dose wey siddon for throne like mighty man. ¹⁴My hand reach inside di wealth of di pipol-dem like inside bird nest; as person dey gather egg wey dem leave, na so I gather di whole earth. Not even one flap wing or open im mouth to cry. ¹⁵Abi axe fit lift imsef pass di one wey dey swing am? Abi saw fit brag against di one wey dey use am? Like say cane fit swing di one wey lift am, like say staff fit lift wetin no be wood!” ¹⁶Na im make di Oga-Papa, di Papa wey get all di army for heaven, go send sickness wey dey waste person among im strong warrior-dem, and under im glory, fire go blaze like flame wey dey burn. ¹⁷Di Light of Israel go turn to fire, our Holy One go be flame; for just one day e go burn, e go finish im thorn and briar-dem. ¹⁸Di glory of im forest and im rich field, our Papa go destroy, both soul and body; e go be like wen sick man dey waste away. ¹⁹Di tree wey remain for im forest go few well well so tey small pikin fit count dem.

Come Lean on our Papa Again

²⁰For dat day di remnant of Israel and dose wey survive for di house of Jacob no go lean again on di one wey beat dem, but dem go truly lean on our Papa, di Holy One of Israel. ²¹Remnant go return—remnant of Jacob go come back to di Mighty God. ²²Even if your pipol Israel plenty like di sand for beach, na only remnant go return. Dem don decree destruction, wey full with correct-and-holy way. ²³Bicos di Oga-Papa, di Papa wey get all di army for heaven, go carry out di destruction wey dem don decree for di whole land.

²⁴Na im make di Oga-Papa, di Papa wey get all di army for heaven, talk say: “My pipol wey dey live for Zion, make una no fear Assyria, wey dey beat una with cane and dey lift staff against una as Egypt do. ²⁵Bicos small time remain, my fury go end, and my anger go turn go dia destruction.” ²⁶Di Papa wey get all di army for heaven go swing whip against dem, like wen e strike Midian for di rock of Oreb; e go raise im staff over di sea like wetin e do for Egypt. ^a a v26 Di rock of Oreb na where Gideon im army kill di Midian commander-dem (Judges 7:25). ²⁷For dat day, dia load go comot from your shoulder, dia yoke from your neck; di yoke go break.

²⁸E come against Aiath, e pass through Migron, e store im supply for Michmash. ²⁹Dem cross di pass: “We go camp for Geba.” Ramah dey shake; Gibeah of Saul dey run. ³⁰Cry out, daughter of Gallim! Listen, Laishah! Poor Anathoth! ³¹Madmenah dey run; di pipol of Gebim dey find where to hide. ³²Today sef e stop for Nob, e dey shake im fist at di mountain of di daughter of Zion, di hill of Jerusalem. ³³Look, di Oga-Papa, di Papa wey get all di army for heaven, go cut off di branch-dem with force wey dey fear person; dem go fell di tallest tree-dem, dem go bring di high ones down. ³⁴E go cut down di thick forest with axe, and Lebanon go fall before di Majestic One.