Yesaya 10 FHB Father's Heart Bible™

10 ¹Mabienga kwena bana bisi yidika nzengulu zakonda masonga, kwena basoniki bana bisi hana mitsiku mya mbi, ²hanga bakatula ndonga kwena baphutu amana bwisa baphutu ba batu bama kiyeka kyawu, mu kukitula bafwidi ba yakala ni bima bya bawu amana batsona ni bima bya bawu bisi bwotula. ³Biki lusáka mu kilumbu kya mpfundusu, tangwa kuzangana kukwisa mu kyana? Kwena nati lutínina mu kulomba lusadisu? Kweti lusísila kimvwama kyenu? ⁴Ka kima ku kyasala, kaka kudikulumuna ha kati dya batu ba boloku ho ni kubwa ha kati dya bana bafwidi. Kaasi, mu byosu byabina, khabu zandi zivutwaku; koku dyandi dilambulukini mbata.

Asiliya, Fimbu dya mu Koku Kyandi

⁵«Mabienga kwena Asiliya, fimbu dya khabu zama, dina koku kyandi kyenina yi khetika kya nganzi yama! ⁶Yikúmutuma mu kunwanisa nati wakonda kala mu kinzambi; mu kunwanisa batu ba khabu zama yikumuzimbula, hanga kabotula bima amana kanata bima bisi bwotula, amana kabadyatikisa hanga thoba muna nzila.»

⁷Kaasi ka bwabu ku kabánza; ka bwabu ku kabánzila mbundu yandi. Luzolu lwandi lwenina lwa kuzanga, lwa kuzenga nati ha nima dya nati. ⁸Mukuma yandi wuzimbudi: «Bapfumu bama ba baphumbulu boosu, ni ka kinga ku? ⁹Kalino, ni kafwaniku yi Kalikemisi? Hamati, ni kafwaniku yi Alipadi? Samadiya, ni kafwaniku yi Tamasi? ¹⁰Bwosu koku kyama kyábonga bipfumu bya biteki, bina bifwanisu byabyo biluti byabina bya Yelusalemi yi Samadiya, ¹¹ni yilusadila Yelusalemi yi bifwanisu byandi, bwosu yásadila Samadiya yi biteki byandi?»

¹²Tangwa Tata, Pfumu wa ngolu zoosu, kamanisa kisalu kyandi kyosu mu kunwanisa mongu wa Siyoni yi Yelusalemi, yikáhyula kibundu kya mbundu ya lulendu ya kinga kya Asiliya yi kuhuna musamu kwa mesu mandi ma mbuta.

¹³Mukuma yandi wuzimbudi: «Mu ngolu za koku kyama yásala bwabu, amana mu mudimu wama, mukuma yenina yi mbakisilu. Yákatula muma ma batu amana yábotula bima bya thalu bya bawu; yákulumuna bana bazenga hana bikundu bya kinga hanga mukwa ngolu. ¹⁴Koku kyama kyálambuka muna kimvwama kya batu hanga muna zamba; bwosu mutu kasa tikisa maki masiswa, bwabuna yákutikisa tsi yosu. Ka mosi ku wánika mahela ho ni wázibula munwa mu kubika. ¹⁵Ni kisoka kyaditombula ha thandu ya wuna wukisi kwangisa? Ni phuba yaditsikisa mu kunwanisa wuna wukiyalaka? Bwosu ni fimbu dilenda nikisa wuna wusi tombula, bwosu ni koka dilenda tombula dina disiku miti!» ¹⁶Yi hakana, Tata, Pfumu wa ngolu zoosu, katúma disemisa mu kati dya banwani bandi ba ngolu, amana ku tsi ya khembu yandi mbawu yalema hanga muleku wa mbawu wisi yoka. ¹⁷Kyezila kya Kiseledi kakítuka mbawu, Mutoma wetu mbawu yisi yoka; mu kilumbu kimosi kyazyoka amana kyazinisa bisendi byandi yi minsende myandi. ¹⁸Khembu ya musitu wandi yi kilanga kyandi kyabulawu Tata kazánga, moya yi lutu byosu; byakala bwosu mbefu kazanganina. ¹⁹Miti mina misala mya musitu wandi myakala makeya-keya, hanga mwana kafwana kumitanga.

Kuzyaminina Hika kwena Tata wetu

²⁰Muna kilumbu kina ndambu ya Kiseledi yi bana básala ba kanda dya Yakobi kabázyamininaku dyaka kwena wuna wábabanda, kaasi kabázyaminina mu kyedika kwena Tata wetu, Watoma wa Kiseledi. ²¹Ndambu yavútuka, ndambu ya Yakobi, kwena Nzambi Mukwa Ngolu. ²²Keti bweti batu baku ba Kiseledi bavudi hanga tsekengi kuna kabeta ka yanga dya mbuta, ndambu kaka yavútuka. Kuzangana kwázengama, kwazala ni masonga. ²³Mukuma Tata, Pfumu, Tata Mukwa Ngolu Zoosu, kamánisa kuzangana kwázengama mu tsi yosu.

²⁴Bwabuna Tata, Pfumu, Tata Mukwa Ngolu Zoosu, wuzimbudi: «Batu bama bana bazíngila mu Siyoni, luyukaku bweya kwena Asidiya, wuna wukulubetisa fimbu amana wutombula koka hana thandu yenu bwosu Ngiphiti kásala. ²⁵Mukuma mu fitangwa fyakeyi khabu zama zazímana, amana nganzi yama yasoba mu kuzangana kwa bawu.» ²⁶Tata Mukwa Ngolu Zoosu kanikisa fimbu hana thandu ya bawu, bwosu kábanda Madyani kuna tadi dya Olebi; kazangula koka dyandi hana thandu ya yanga bwosu kásala mu Ngiphiti. ^a a v26 Tadi dya Olebi dyákala homa bibuka bya basuta ba Ngideyo báhonda bapfumu ba Madyani (Bazusi 7:25). ²⁷Muna kilumbu kina zitu dya bawu dyakatuka ha dihembu dyaku, muteti wa bawu ha tsingu yaku; muteti wabukana.

²⁸Wisini kwena Ayati, wuhitini mu Migoloni, wulumbikini bima byandi ku Mikimasi. ²⁹Bahitini nzila: «Tulala ku Ngeba.» Lama dibati tekita; Ngibeya dya Sawulu ditini. ³⁰Bekita, mwana wa ndumba wa Ngalimi! Yuka, Layisa! A Anatoti wa phasi! ³¹Madimena dibati tina; batu ba Ngebimi babati swama. ³²Mu kilumbu kyaki-kyaki wutelamini ku Nobi, wunikisa koku kwandi kwena mongu wa mwana wa ndumba wa Siyoni, tunda dya Yelusalemi. ³³Tala, Tata, Pfumu, Tata Mukwa Ngolu Zoosu, kakwanga mihandi ni ngolu za bweya; miti mina mileyi mibwa, mina mitombukini mikúlumuka. ³⁴Kakwanga miti mya musitu ni kisoka, amana Libani dyabwa ku thwala ya Mukwa Khembu.