Laa 55

55 ¹Iwui Avā, iwui seihā kasā nganāmilu, kala iwui kapowui eina nakhalatta mathumhaialu. ²Ili nganāda ngahānkāmilu; iwui maringkaphālungli I ngasāmkakhui maleimana, kala I chapngachai, ³yangkashewui khon chiwui vang eina, makaphā-makhayābingwui rekakharekwui vang eina. Kaja athumna iwuitungli kakhanang tā ngasaka, kala malungvāt eina athumna ili ningkachai. ⁴Iwuklungli ining ngaleopama; kathiwui khangachee khangachā china iwuitungli tāhaira. ⁵Khangachee kala ngacheerarang ili zangki, kala khangachee khangachāna ili khakshingakhaira. ⁶Kala ina hānga, "Iyavo, ina nāsha̱ thāda angachāng kaisi kaje! Ina yongthuida ngasām kaje.

⁷Mha, ina tālak eina yaozata kaje; ina lamhāngli ngayinkhui kaje. ^a a v7 Selah: laa lah khorumwui tui akha, chiwui alangkhana mashunga matheilakmana; ningphaninkhui khavai kashaptok lah laawui kachaili kashaptok ngasāsi kaje. ⁸Siphan zingrot kala sur chiwui eina, ina iwui ngayin khavai pamli thākta vai kaje." ⁹Athumli pa̱ngapā ngasakmilu, O Proho Avā; athumwui tuikhur ngayarmilu, kaja ina keinungli khangashao kala nganang theihaira. ¹⁰Ngashun ngayā athumna awui phākhotungli yaozata; makaphā makhayā kala kakhanang awui alunglina. ¹¹Kashimān awui ngachaili lei; rekakharek kala mikhanam awui chānreiwui eina khipākha mathuilakmana. ¹²Kaja ili kakharara chi yangkashe maleimana—chiakha ina phungrarasi; kaja ili ningkakachaiya chi iwuitungli akhalatta yetkakhuia maleimana—awui eina ina ngathumkhuirasi. ¹³Kha na chi, ili ngaraicha mi akha, iwui khavāknao kala iwui ngahānkhangai ngasotnaona. ¹⁴Ithum akha eina akha leishirihai ngarumsak leibing, ithumwui Avāwui shimli yarui eina ngasoda zatkahaibing. ¹⁵Kathina athumwuitungli tāranu; athum kharing eina chikhurli tāranu, kaja athumwui pamkhavaili, mha athumwui alung khalattali makaphā lei. ¹⁶Kha ina iwui Avāli ngakaowa, kala iwui Avāna ili huimira. ¹⁷Ngazin, ngathor, kala ngashun katā eina ina vaoda chapngachai, kala ana iwui akhon shāmira. ¹⁸Ana imanglā chingri kahai eina, ili mamayāmada sākahai rai chiwui eina ngatangmihaira, kachungkhana ili mamayāmada leilala.

¹⁹Achālakhawui eina wungpamkhongli chipam kahaia ithumwui Avāna nganāra kala athumli hamngasakra. Khikhalajila athum makhangachei, athumwui ningli ithumwui Avāli khayākashiwui khangacheela maleimana. ²⁰Yorkazāna ali chingri kahaibingwuitungli apāng khāngkāhaira; awui tuingashit ana sākhaihaira. ²¹Awui tuimatui makhanli nganaimei, kha awui ningli rai lei; awui tuibing thaoli nganaimei, kha chi sutshok kahai raighaina. ²²Nawui kharit otphun ithumwui Avāwuitungli horsanglu, chithākha ana nali yangmira; ana khamashung khangaronga chili mangatha̱ ngasaklakmara. ²³Kha na, iwui Avā, nana athumli ngachakyāng kahai chomli horsangra; ashee katā kala khayon sā mibing athumwui zimiksho tangkhaila maokpeilakmara. Kha ina nali shitsanga.