Ndingcatshwe Ngumhlobo Wam Siqu

Kumongameli weemvumi: ngezixhobo ezinemitya. Umhobe wobulumko kaDavide.

Uloyiko nokungcangcazela; umdumisi unqwenela amaphiko ehobe ukuze abhabhe aye entlango. Intlungu enkulu asilogonyamelo elizalise isixeko kodwa ngumntu olingana naye, umhlobo osenyongweni owayehamba naye esiya endlwini kaBawo wethu waza waphula ukholo.

Isahluko 55.

Uwuve umthandazo wam, Bawo wam, ungazifihli kwisibongozo sam senceba. Ndiphulaphule undiphendule; andizolanga kwisikhalazo sam, ndiyagcuma, ngenxa yezwi lotshaba, ngenxa yengcinezelo yabakhohlakeleyo. Kuba bandithululela inkathazo, baze ngomsindo bandibambele igqubu. Intliziyo yam iyajija ngaphakathi kum; iinkwankqiso zokufa ziwele phezu kwam. Uloyiko nokungcangcazela kundifikele, nonkwantyo lundigubungele. Ndathi: “Akwaba bendinamaphiko njengehobe! Ngendibhabha ndemke ndiye kuphumla.

Ewe, ngendibhadula ndiye kude; ngendizimela entlango. ^a Ngendikhawuleza ndiye kwindawo yam yokuzimela, kude komoya ovuthuzayo nesiphango.” Baphazamise, Bawo oLawulayo; wahlule intetho yabo, kuba ndibona ubundlobongela nengxabano esixekweni. Emini nasebusuku bazulazula ezindongeni zaso; inkohlakalo nenkxwaleko ziphakathi kwaso. Intshabalalo iphakathi kwaso; ingcinezelo nenkohliso azisuki ezitratweni zaso. Kuba asilotshaba elindingcikivayo—leyo into bendingayinyamezela; asingomntu undithiyayo oziphakamisa phezu kwam— ngendimzimela kuye. Kodwa nguwe, umntu olingana nam, umlingane wam nomhlobo wam osenyongweni. Thina esasinobudlelane obumnandi kunye, esasihamba nesihlwele siye endlwini kaBawo wethu. Makubafikele ukufa; mabehle baye engcwabeni bephila, kuba ububi busendaweni yabo yokuhlala, phakathi kanye kwabo. Kodwa mna ndibiza kuBawo wam, yaye uBawo wam uya kundisindisa. Ngokuhlwa nasekuseni nasemini emaqanda ndiyakhala ndigcume, yaye uyaliva ilizwi lam. Uwukhulule umphefumlo wam ngoxolo kwimfazwe ebikhutshwe ngakum, nangona babebaninzi ababenxamnye nam.

uBawo wethu uya kuva aze abathobe—yena ohleli esihlalweni sobukhosi kwasemandulo. Ngenxa yokuba bengaze batshintshe, abanalo uloyiko lukaBawo wethu. Umngcatshi uphakamise izandla zakhe ngakwabo babenoxolo naye; uwaphule umnqophiso wakhe. Intetho yakhe ibigude kunebhotolo, kodwa imfazwe ibisentliziyweni yakhe; amazwi akhe ebethambile kunamafutha, kodwa ebengamakrele arholiweyo. Phosa umthwalo wakho kuBawo wethu, yaye uya kukuxhasa; akasoze avumele ukuba ilungisa lishukunyiswe. Kodwa wena, Bawo wam, uya kubehlisela emhadini wentshabalalo; amadoda aphalaza igazi nanenkohliso akayi kuyiphila nesiqingatha semihla yawo. Kodwa mna ndiya kuthemba kuwe.