Kü Jenabou Loloei Khümbo Kua
Chia leiyeibou la: chi insiaubu yoa. Dawideibü songsihon chi.
Hatbü hoba lühbü; sopbouei dukutukbü kaak kuan kaodak thonbü to sengeian satbo ühailamkei. Hatlamoktham maangmau kho sangnyua shenbü lühbü aying, lausikei jetei kibü müt, seneibü Bou chem to hao yoa khulimba hauko kibü kü jenabou, aoei maialembei.
55 1Kü Bou, kü welaubü ditashi, hoba ngeibü onou subüjabü ka nyi himshuong tehuma. 2Kü to nou haangan jongaishi; ngeibü maangpona ngo satbümau, hoba ngo ngühkuda, 3Dangboueibü ngühlang laüa, amaibü shuong khonkutibü laüa. Aishanga haoenei kü to maangmau yoshaida, hoba angeko haoenei kü khulimbo maangshat aida. 4Ngeibü maangpon kü maangpona na hapda; hailabü hatlabü shuong kü to baukei. 5Hatbü hoba lühbü kü to shenkei, hoba kongaei ngo khüpbei. 6Hoba ngei laukei, “O, ngo to dukutuk tegü kaak kibou yingalonga! Ngo sengeian apan haksolabü.
7Haü, ngo lounyu shoonglabü; ngo yamlamanga satenlabü. a a v7 Selah: chiabü ayingsi lembübü ngüh che, kho maang ngühmaang angekei; maimai kho damanla hakso jih ayingsi chiabü jiha che kilabü. 8Ngo kü satenshang to haulabü, ngokbü hak hoba yeishi ka sateilabü.” 9Haoen to molousühtoshi, O Abou; haoeneibü ngühyem shomashi, aishanga ngei sangnyua ik shatyobü hoba oyophetyobü hapda. 10Chalou si nangnak haoenei khübü banyu kaian paida; amaibü hoba maangmau khonei maangpona kia. 11Leilubü kho khonei jenyua kia; khonkutibü hoba khüpsilang khongnyu ka ladangkei akuklabü. 12Aishanga kü to nyikubü kho dangbou aying— kho ngei natenlabü; kü thüka himshuong yaangentikubü kho, kü to mangsenbü aying— hao the ka ngo hulabü. 13Lausikei kho no ki, ngo yoa jetei kibü müt, kü jenabou hoba kü maimaibü thangbou. 14Künei liko teibü takshatan janyinkei, mütshang yoa seneibü Bou chem to paikei. 15Hailabü haoen to baukutiashi; haoen lang kibüa hee to yantiashi, aishanga amaibü haoeneibü kishang ka, haoen jenyutham ka kia. 16Lausikei ngei kü Bou to ngekda, hoba kü Bouei ngo khümenlabü. 17Chasem, ngeyang hoba chajiha ngo ngekda hoba ngühkuda, hoba haoei kü ngüh ditda. 18Juongei ngo khulimbo lotikei, ngo khulimbo wapyobü lason ka Haoei ngeibü soushou sangmaia püetkei.
19Shangieda setbou seneibü Bouei ditlabü hoba haoen semtiamtilabü. Aishanga haoen ladangkei asepei, haoenei seneibü Bou to ahatda. 20Yaakshaubouei hao yoa sangmaia kibü shuong khulimbo jembü ik shingkei; haoei jembü theyolanyobü leilukei. 21Haoeibü ngüh sendei to lenglengbou kikei, lausikei jembü maangpona wapyo kikei; haoeibü ngüh shuong onang to inyaibü kikei, lausikei khübü kho inlou jungbü kikei. 22Seneibü Bou thüka kaibü onat jinkushi, hoba haoei no haangngaitilabü; haoei saopobü müt ladangkei anyaakeitilabü. 23Lausikei no, kü Bou, haoen mautilabü püngkhün to sungbalabü; sii angbü hoba thamtham lubü mütshuong jembü chalou jamde lang akilabü. Lausikei ngei ka to mailemlabü.
