Moi laga Nijor Sathi pora Thoga Khaise
Gana cholawa manuh karne: baja khan logote. David laga ekta gyaan laga git.
Bhoi aru kapi thaka; gana likha manuh ekta kopou laga pakhi pai kene jongol te uri jabole mon kore. Sob pora dukh to sheher bhorpur atyachar nohoi, kintu tai laga barabar, usor laga bondhu, jun tai logote amar Pitri laga ghor te berai jaise aru bhorsa bhangai dise.
55 1Moi laga Pitri, moi laga prathana huni bi, aru moi laga doya mangi thaka pora Apuni nijor ke nalukabi. 2Moi ke huni bi aru jawab dibi; moi laga dukh kotha te moi shanti nai, aru moi dukh pora kandi ase, 3dushman laga awaj nimite, biya manuh laga dukh diya nimite. Kilemane tarkhan pora moi uporte dukh ani diye, aru khong pora tarkhan moi ke dushmani rakhe. 4Moi laga mon bhitor te dukh pora kampi ase; mrityu laga bhoi khan moi uporte giri ahhise. 5Bhoi aru kapi moi uporte ahhise, aru bisi dar pora moi ke dhaki loise. 6Aru moi koise, “O, moi logot kabutar nisina pankha thakile! Moi uri jai kene aram pabo.
7Hoi, moi dur jagate berai jabo; moi jongol te lukai thakibo. a a v7 Selah: ekta baja nohoile mondoli laga sabdo, kun laga ortho sapha nai, sayad bhabi bole roka nohoile baja laga majote roka. 8Moi joldi moi laga lukai thaka jagate jabo, jor pora aha hawa aru andhi pora dur te.” 9Tarkhan ke gondugol koridibi, Sorbashokti Pitri; tarkhan laga kotha bhag kori dibi, kilemane moi sheher te marmari aru jhagara dikhi ase. 10Din aru rati tarkhan tai laga dewar uporte phure; biya kaam aru dukh tai bhitor te ase. 11Nosto kora tai majote ase; dukh diya aru thoga kitia bhi tai laga rasta pora najai. 12Kilemane moi ke sorom diya ekjon dushman nohoi—eitu moi sojibo paribo; moi uporte nijor ke dangor kora moi ke ghin kora manuh nohoi—tar pora moi lukabo paribo. 13Kintu eitu tumi ase, moi logote borabor ekjon manuh, moi laga sathi aru moi laga usor sathi. 14Amikhan kun eke logote misti sangoti korise, kun manuh laga bhir logote amar Pitri laga ghor te jaise. 15Tarkhan uporte mrityu ahok; tarkhan jinda thaki kene kobor te jaok, kilemane biya kaam tarkhan laga ghor te, tarkhan laga majote ase. 16Kintu moi, moi laga Pitri ke mate, aru moi laga Pitri pora moi ke bachabo. 17Saru aru phojur aru dupor te moi hala kori mate aru kande, aru Tar pora moi laga awaj hune. 18Tar pora moi birodh te kora lorai pora moi laga atma ke shanti te mukti dise, hoilebi bisi jon moi birodh te thakise.
19Amar Pitri pora hunibo aru tarkhan ke chutu koribo—kun purana somoy pora singhason te bohi ase. Kilemane tarkhan kitia bhi nabodle, tarkhan logote amar Pitri laga bhoi nai. 20Thoga diya manuh pora tai logote shanti te thaka khan birodh te tai laga hath uthaise; tai laga vachan bhangai dise. 21Tai laga kotha makhon pora bhi norom thakise, hoilebi tai laga mon te lorai thakise; tai laga kotha tel pora bhi norom thakise, hoilebi eitu khan ulai thaka talwar thakise. 22Tumi laga boja amar Pitri uporte di dibi, aru Tar pora tumi ke dhori rakhibo; dharmik manuh ke Tar pora kitia bhi hili bole nadibo. 23Kintu Apuni, moi laga Pitri, tarkhan ke nosto kora laga gata te nichete anibo; khoon kora aru thoga diya manuh khan tarkhan laga din laga adha bhi nathakibo. Kintu moi Apuni ke biswas koribo.