Davidwui Huikhavai Khavao
Laawui akhokali. Tingteilābing eina. Davidwui thangkhamei laa kasā, Ziphnaobingna Saulli vāda, "Davidna ithumwui alungli raipan sālaga pamda maleimala?" da hāngkahai atamli.
Ziphnaobingna Davidli Saulwui pāngli mikhavai hāngkahai. Awui seihā chi kasoma kala mangasamkhai — nawui ming eina ili huimilu — kala kashit akhali leichinga: kachangkhata iwui Avā iwui ngachonkhamena, iwui kharing phārikhamena.
54 1O iwui Avā, nawui ming eina ili huimilu, kala nawui pangshap eina ili mashun hāngsangmilu. 2O iwui Avā, iwui seihā kasā nganāmilu; ikhamorwui tuili nāshunglu. 3Kaja kha̱mibingna ili mamayāthura, kala sākashe mibingna ili shaothat khavai sai; athumna ithumwui Avāli matheimimana.
4Yanglu, iwui Avā ili ngachonkhamena; Proho Avā iwui mirin yangkhamena. 5Ana makaphā chi ili rimda leibingwuitungli tāngasakra; nawui ningtong eina, athumli thitchang ngasakmilu. 6Lemmet kachigat eina ina nali pha̱phayāra; namingli ina masot chikatra, O iwui Avā, kaja hi kaphā otna. 7Kaja kachotkachāng saikorawui eina ana ili ngatangmihaira, kala iwui yangkashebingli ina mathānda yanghaira.
