Gathli Miktam akha
Laa sāmibingwui akhavāli: 'Ram katāva̱wui shirimthingli Nāsha̱' kaho laa thāda. Davidwui laana. Sinā laa akha, Philistinenaobingna Gathli ali tukkhui tharan.
Gathli Philistinenaobingna Davidli manlaga ngathaomanglā zāngamanda, ana awui chāra̱ thaokhongli thaimida lairikli khuikhavai seihā sai. Awui ning ngachonkhami tui chi kani hāngluiya: iwui Avāli ina shitsanga — phasā khavaiana ili khi sāthukra?
56 1Ili lumashanmilu, iwui Avā, kaja mibingna ili naikazamra; langpongda yangkashe akhana ili singkharenghaora. 2Iwui khangararbing langpongda ili naikazamra; kachungkhana langkaso eina ili ngararra. 3Ina ngachee tharan, ina nali shitsanga.
4Iwui Avāli, awui tuili ina sochikata—iwui Avāli ina shitsanga; ina mangacheemara. Mikumona ili khi sāshapkhala? 5Langpongda athumna iwui tuili yonngasaka; iwuitungli athumwui ningphanin saikora makaphāna. 6Athumna ngarumda, rimda lei; imanglā khuithui khavai, iwui pheikarli athumna mayonpama.
7Athumwui makaphāwui vang, athum yāmshoprakhala? Malungkhavāt eina miyurbingli khuitālu, iwui Avā. 8Nana iwui kuiung-kuivā mashing shānhaira; iwui chāra̱ nawui thaokhongli hailu. Chi nawui lairikli maleimala?
9Chieina ina kaho tharan iwui yangkashebing ngalanra. Hi ina thei, iwui Avā iwui vangna. 10Iwui Avāli, awui tuili ina sochikata; iwui Avāli awui tuili ina sochikata.
11Iwui Avāli ina shitsanga; ina mangacheemara. Mikumona ili khi sāshapkhala? 12Nawui khangashit iwuitungli lei, iwui Avā; nali ningkashiwui pha̱kaphayā ina chigatra. 13Kaja nana kathiwui eina imanglā kanshokmihaira—mha, iphei khangaphokwui eina—chieina iwui Avāwui mangāli kharingwui kahorli ina zatra.
