Gatda yozilgan Miktam

Nagʻmachilar rahbari uchun: “Uzoqdagi emanlardagi kaptar” kuyiga koʻra. Dovudniki. Oltin zabur, filistlar uni Gatda tutib olgan paytda.

Gatda Filistlar qo'liga tushib, kun bo'yi oyoq osti qilingan Dovud ko'z yoshlarini idishga yig'ib, qayd etib qo'yishni so'raydi. U o'zini tinchlantiruvchi so'zini ikki marta takrorlaydi: Otamga ishonaman — oddiy bandalar menga nima qila olardi?

56-bob.

Menga rahm qilgin, Otam, chunki odamlar meni oyoqosti qilmoqda; kun boʻyi hujumkor menga tazyiq oʻtkazmoqda. Dushmanlarim kun boʻyi meni oyoqosti qilmoqda; koʻplari takabburligi bilan menga qarshi kurashmoqda. Qoʻrqqan paytimda, Senga tayanaman.

Soʻzini ulugʻlaydigan Otamga — Otamga tayanaman; qoʻrqmayman. Oddiy odamlar menga nima ham qila olardi? Kun boʻyi soʻzlarimni buzib talqin qiladilar; menga qarshi barcha fikrlari yovuzdir. Ular til biriktirib, pistirmada yotadilar; jonimni olishga umidvor boʻlib, qadamlarimni poylaydilar.

Yovuzliklari uchun ular qutulib ketarmikan? Gʻazabingda xalqlarni qulatgin, Otam. Sarsonliklarimni sanab chiqqansan; koʻz yoshlarimni idishingga solib qoʻygin. Ular daftaringda emasmi?

Shunda chaqirgan kunim, dushmanlarim ortga chekinadi. Men shuni bilaman: Otam men tarafimda. Otamga suyanib, Uning soʻzini ulugʻlayman; Otamga suyanib, Uning soʻzini ulugʻlayman.

Otamga tayanaman; qoʻrqmayman. Oddiy odamlar menga nima ham qila olardi? Senga bergan vaʼdalarim zimmamda, Otam; Senga shukrona qurbonliklarini keltiraman. Zero, jonimni oʻlimdan qutqarding — ha, oyoqlarimni qoqilishdan ham — toki hayot nurida Otam huzurida yurishim uchun.