መዝሙር 56

56 ¹አባቴ ሆይ፣ ማረኝ፤ ሰዎች ይረግጡኛልና፤ ተዋጊ ቀኑን ሙሉ ያስጨንቀኛል። ²ጠላቶቼ ቀኑን ሙሉ ይረግጡኛል፤ ብዙዎች በትዕቢታቸው ይዋጉኛል። ³በፈራሁ ጊዜ፣ በአንተ እታመናለሁ።

⁴ቃሉን በማመሰግንበት በአባቴ — በአባቴ እታመናለሁ፤ አልፈራም። ሟች ሰው ምን ሊያደርገኝ ይችላል? ⁵ቀኑን ሙሉ ቃሌን ያጣምማሉ፤ በእኔ ላይ ያላቸው ሐሳብ ሁሉ ክፉ ነው። ⁶ይሰበሰባሉ፣ ያደባሉ፤ ርምጃዬን ይጠባበቃሉ፤ ነፍሴን ለመውሰድ ተስፋ አድርገዋል።

⁷በክፋታቸው ያመልጣሉን? አባቴ ሆይ፣ በቍጣ አሕዛብን አዋርድ። ⁸መንከራተቴን ቈጥረሃል፤ እንባዬን በአቍማዳህ አኑር። በመጽሐፍህ የሉምን?

⁹በጠራሁ ቀን ጠላቶቼ ወደ ኋላ ይመለሳሉ። ይህን አውቃለሁ፤ አባቴ ከጎኔ ነውና። ¹⁰በአባቴ ቃሉን አመሰግናለሁ፤ በአባቴ ቃሉን አመሰግናለሁ።

¹¹በአባቴ እታመናለሁ፤ አልፈራም። ሟች ሰው ምን ሊያደርገኝ ይችላል? ¹²አባቴ ሆይ፣ ለአንተ የተሳልሁት ስእለት አለብኝ፤ የምስጋና መሥዋዕት አቀርብልሃለሁ። ¹³ነፍሴን ከሞት አድነሃልና፤ አዎን፣ እግሮቼን ከመሰናከል — በሕይወት ብርሃን በአባቴ ፊት እመላለስ ዘንድ።