Jonah 1

1 ¹Ithumwui Avāwui tui chi Amittaiwui naomayara Jonahli rāhānga:

²"Ngakarthuida, kahaka keinung Ninevehli vāda, chili ngakaida vaolu, kaja athumwui morei chi iwui mangāli kāshunghaira."

³Kha Jonahna ithumwui Avāwui mangāwui eina Tarshishli yāmthui khavai zatphoka. Ana Joppali tunhaowa, Tarshishli vāki kaji jahas akha samphangda, chiwui aman mi, kala jahasli tongphungda ithumwui Avāwui mangāwui eina athumli ngasoda Tarshishli vāhaowa.

⁴Chieina ithumwui Avāna shamadruli masi kahaka horshoka; siphan zingrot kahaka akha shokhaowa, kala jahas chi kaikhavai thāhaowa. ⁵Jahas kahuibing chi ngacheenāhaowa, mi kachiva̱na kachichāwui vareli khangakaona. Jahasli ngavengsang khavai jahaswui ot chi shamadrulungli horsanga. Kha Jonahna jahaswui azingshong tunhaida chili pivāhaowa. ⁶Jahaswui akhavā china zanglaga hānga, "Kathada na pihaokhala? Ngakarthuida nawui vareli ngakaolu! Varena ithumli phaningmilapai, chithākha ithum mashimānmara."

⁷Mibingna ngachaili hānga, "Rālu, hi ithumli rāza̱haira ka̱lākashi hi khipāwui vang eina khala da theikhui khavai kalā yangsa." Chieina athumna kalā yanga, kala chi Jonahli tāhaowa. ⁸Athumna ali hānga, "Ithumwuitungli hi ka̱lākashi rāza̱haira na, ithumli hānglu: na khi ot sākhala? Na kachi eina kharākhala? Nawui ram khikhala? Na khipā miyurwui mikhala?"

⁹Ana ngahānkai, "I Hebrewnao akhana, kala shamadru kala ngalei katheng kasā kazingramwui Avā, ithumwui Avāli ina khangacheena."

¹⁰Chieina mibing chi ngacheenāhaowa kala hānga, "Na khi sākahaikhala?" Kaja ana athumli hāngchitheihaiwui vang eina, Jonahna ithumwui Avāwui mangāwui eina yāmzatta kaji athumna thei.

¹¹Chieina athumna ali hānga, "Shamadru chi ithumwui vang chingrihai ngasak khavai, ithumna nali khi sārakhala?" Kaja shamadru chi mataimeida ngaphaokazamhaowa.

¹²Ana athumli hānga, "Ili ngava̱khuida shamadruli horshokmilu, chithākha chi nathumwui vang chingrihaira. Hi siphan zingrot kahaka hi iwui vang eina nathumli rāza̱haira kaji ina thei."

¹³Chithālala mibingna ngaleishong samphang khavai panglāk eina jahas hui, kha masāpaithuwa, kaja shamadru chi athumli mataimeida ngaphaokazamhaowa. ¹⁴Chiwui vang eina athumna ithumwui Avāli ngakaoda hānga, "Ina nali kapona, O Vare, mipā hiwui mirin khuiwui vang eina ithumli mathi ngasakalu. Khayon makhalei ashee hiwui vang ithumli khayon maphaamialu, kaja nana nawui kaphaning thada sākahaina." ¹⁵Chieina athumna Jonahli ngava̱khuida shamadruli horshoka, kala shamadru sākashi chi chingrihaihaowa. ¹⁶Chieina mibing chi ithumwui Avāli tarākha khangacheehaowa, ithumwui Avāli pha̱kaphayā chigata, kala khangashit sāsera.