ዮናስ 1 FHB Father's Heart Bible™

1 ¹ቃል ኣቦና ናብ ዮናስ ወዲ ኣሚታይ ከምዙይ ኢሉ መፀ፦

²“ተስእ፥ ናብታ ዓባይ ከተማ ነነዌ ኺድ፥ ኣብ ልዕሊኣ ድማ ኣእዊ፤ ክፍኣቶም ኣብ ቅድመይ ተልዒሉ እዩ እሞ።”

³ዮናስ ግና ካብ ቅድሚ ኣቦና ናብ ተርሴስ ክሃድም ተልዓለ። ናብ ኢዮጴ ወሪዱ ድማ ናብ ተርሴስ እትኸይድ መርከብ ረኸበ፤ ዋግኣ ከፊሉ ኸዓ ካብ ቅድሚ ኣቦና ምስኣቶም ናብ ተርሴስ ክኸይድ ናብታ መርከብ ደየበ።

⁴ሽዑ ኣቦና ናብ ባሕሪ ብርቱዕ ንፋስ ደርበየ፤ ብርቱዕ ማዕበል ድማ ተልዓለ፤ እታ መርከብ ከዓ ክትሰባበር ቀሪባ ነበረት። ⁵እቶም መርከበኛታት ፈርሑ፤ ነፍሲ ወከፍ ድማ ናብ ኣምላኹ ኣእወየ፤ ነታ መርከብ ምእንቲ ኸቕልላ ኸዓ ፃዕነታ ናብ ባሕሪ ደርበዩ። ዮናስ ግና ናብ ውሽጢ እታ መርከብ ወሪዱ ነበረ፤ ኣብኡ ኸዓ ተጋዲሙ ደቂሱ ነበረ። ⁶እቲ ሓለቓ መርከብ ድማ መፂኡ፦ “ከመይ ኢልካ ትድቅስ ኣለኻ? ተስእ፥ ናብ ኣምላኽካ ፀውዕ! ምናልባሽ እቲ ኣምላኽ ይግደሰልና ይኸውን እሞ ኣይንጠፍእን” በሎ።

⁷እቶም ሰባት ድማ ንስንሳቶም “ንዑ፥ እዝ መከራ እዙይ ብሰሪ መን ከም ዝበፅሐና ምእንቲ ኽንፈልጥ፥ ዕፃ ነውድቕ” ተበሃሃሉ። ዕፃ ድማ ኣውደቑ፤ እታ ዕፃ ኸዓ ንዮናስ በፅሐት። ⁸ንእኡ ድማ “እዝ መከራ እዙይ ዘምፃእካልና ንስኻ፥ ስራሕኻ እንታይ ምዃኑ ንገረና? ካበይ ኢኻ እትመፅእ? ሃገርካ እንታይ እያ? ካብ ኣየናይ ህዝቢ ኢኻ?” በልዎ።

⁹ንሱ ኸዓ “ኣነ ዕብራዊ እየ፤ ነቲ ባሕርን ንቑፅ ምድርን ዝገበረ፥ ነቦና ናይ ሰማይ ኣቦ፥ እፈርሕ እየ” ኢሉ መለሰ።

¹⁰ሽዑ እቶም ሰባት የመና ፈርሑ እሞ “እንታይ ኢኻ ገይርካ?” በልዎ፤ ንሱ ነጊርዎም ነበረ እሞ፥ ካብ ቅድሚ ኣቦና ይሃድም ከም ዝነበረ ፈሊጦም ነበሩ።

¹¹እቲ ባሕሪ እናበርትዐ ይኸይድ ስለ ዝነበረ ድማ “ባሕሪ ምእንቲ ኽህድኣልና እንታይ ንግበረካ?” በልዎ።

¹²ንሱ ኸዓ “ኣልዒልኩም ናብ ባሕሪ ደርብዩኒ፥ ባሕሪ ድማ ክህድኣልኩም እዩ፤ እዝ ብርቱዕ ማዕበል እዙይ ብሰረይ ከም ዝመፀኩም እፈልጥ ኣለኹ” በሎም።

¹³እቶም ሰባት ግና ናብ ምድሪ ክበፅሑ ብርቱዕ ቀዘፉ፤ ግና ኣይከኣሉን፤ እቲ ባሕሪ ኣብ ልዕሊኦም እናበርትዐ ይኸይድ ስለ ዝነበረ። ¹⁴ስለዙይ ናብ ኣቦና ኣእዊዮም፦ “ኦ እግዚኣብሄር፥ በይዛኻ፥ ብሰሪ ህይወት እዝ ሰብኣይ እዙይ ኣይተጥፍኣና፤ ንፁህ ደም ዘፍሰስና ጌርካ ኣይትቚፀረና፤ ንስኻ ከም ዝፈተኻ ገይርካ ኢኻ እሞ” በሉ። ¹⁵ሽዑ ንዮናስ ኣልዒሎም ናብ ባሕሪ ደርበይዎ፤ እቲ ዝበርትዐ ባሕሪ ኸዓ ሃደአ። ¹⁶ሽዑ እቶም ሰባት ንኣቦና የመና ፈርሕዎ፤ ንኣቦና መስዋእቲ ኣቕረቡ፤ መብፅዓታትውን ኣተዉ።

¹⁷ኣቦና ድማ ንዮናስ ዝውሕጦ ዓብዪ ዓሳ ኣዳለወ፤ ዮናስ ከዓ ኣብ ከብዲ እቲ ዓሳ ሰለስተ መዓልትን ሰለስተ ለይትን ፀንሐ።