Jona Satkeije Ngaabü
Thuseibü cheei Israel dangbou shuong to ngekala Bou aubü ka satkei, ngau yaangbü cheei hao suikei, hoba himshuongeibü onou weko seneibü Bou onou laman widei dogo telongaiko ngekei.
1 1Hobaje seneibü Boueibü ngüh Amittaieibü shou Jona jungto louan laukei:
2“Meimeiashi, Ninevi ho sangyaang to hauashi, hoba kho khulimbo ngekashi, aishanga haoeneibü amaibü kü thedanga longa.”
3Lausikei Jonaei seneibü Bou thedang ka Tarshish to satla meimeikei. Haoei Jopa to yankei, hoba Tarshish to haulabü longchem che hapbei, hoba khoeibü mu kukei, hoba haoen yoa Tarshish to haula, seneibü Bou thedang ka, longchema setkei.
4Kheijinei seneibü Bouei yungnyu to yei yaangbü che litikukei; hoba yungnyua ngokan yaangbü che longkei, hoba longchem netla yeila khangkei. 5Lausikei longleibü shuong aeibou hatkei, hoba mütpem weko jembü mühghaü to ngekkei. Haoenei longchem songoktham yeitila shanga, longchema kibü peisilei yungnyu to attikei. Lausikei Jonaei longchem leinei yanan, khünei aeibou yepan kikei. 6Longchem leiyeibouei louan laukei, “Nyi lai küman yepan kida? Meimeiashi, kaibü mühghaü to ngaashi! Aingenyu haoei sen to chühlabü, hoba sen amaulabü.”
7Müt shuongei lulu kanglanga laukei, “Kaiya, aoeibü shanga ho thushed sen thükto loukeije ngela shanga, phaang pakko.” Haoenei phaang pakkei, hoba phaang kho Jona to shatkei. 8Haoenei hao to laukei, “Ho thushed sen thükto leibou no, kün la lenshi, nyi ai kümsilei kümda? Nyi laeto ka louda? Kaibü kaodak ai ki? Nyi ao mütli ka ki?”
9Haoei jongaikei, “Ngo Ibribü che ki, hoba ngo seneibü Bou, yungnyu hoba kao ulangbü yaübou khuthükbü Bou to soumo hatda.”
10Kheijinei müt shuong aeibou hatkei hoba laukei, “Nyi ai kümbei?” Aishanga haoei seneibü Bou thedang ka satla kümda dogo haoenei ngeakei, aishanga haoei haoen to lenkei.
11Kheijinei haoenei hao to laukei, “Yungnyu sen shanga hakso kutila shanga, senei nyi to ai kümla?” Aishanga yungnyu ngokan aei aei kiko haako haukei.
12Haoei haoen to lenkei, “Ngo phonan yungnyu to attiashi, hoba kho kan shanga hakso kilabü. Ngei ngeakei, ho ngokan yaangbü kü shanga kan thükto loukei.”
13Aeiko müt shuongei kao to loula shanga aeibou khangkei, lausikei haoen athük, aishanga yungnyu haoen khulimbo ngokan aei aei kiko haako haukei. 14Khoei haoenei seneibü Bou to ngekkei, “O Mühghaü, sudajada, ho müteibü langkei louda shanga kün ühai tekiti. Shed akibü sii shanga kün shedbü teyeitishi, aishanga nyi maang haibü tegü kümbei.” 15Kheijinei haoenei Jona lapan yungnyu to litikukei, hoba ngokan kibü yungnyu nyetkei. 16Kheijinei müt shuongei seneibü Bou to aeibou soumo hatkei, hoba seneibü Bou to lembü kukei, hoba den takletkukei.
17Hobaje seneibü Bouei Jona shauan apla shanga ngauyaang che pienkei, hoba Jona ngauyaangeibü shimung ka chalou sem hoba langyang sem kikei.
